މޯލްޑިވްސް އިންޑަސްޓްރިއަލް ޑިވެލޮޕްމެންޓް ފްރީޒޯން ކުންފުނިން ސްޓޯރެޖް ސަރަހައްދުތައް ކަނޑައަޅައި އެ ވަސީލަތްތައް ގާއިމުކުރުމުން މުދަލުގެ އަގު ހެޔޮވެގެންދާނެކަމަށާއި އާންމު ރައްޔިތުންނާއި ހިސާބަށް އެތަކެތި ފޯރުކޮށްދޭއިރުވެސް ބޮޑެތި ފަސޭހަތަކެއް ލިބިގެންދާނެކަމަށް އިގްތިސާދީ ވަޒީރު މުހައްމަދު ސައީދު ވިދާޅުވެއްޖެއެވެ.
ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރ ސައީދުވަނީ ރަމަޟާން މަހުގެ ތެރޭގައި ރާއްޖޭގައި އަސާސީ ކާބޯތަކެތީގެ އަގުތައް އެއްހަމަ މިންގަނޑުތަކެއްގައި ހިފެހެއްޓުމުގެ ގޮތުން ކުރެވިގެންދާ މަސައްކަތްތަކާއި ބެހޭގޮތުން މައުލޫމާތު ދެއްވާފައެވެ. މިނިސްޓަރ ވިދާޅުވީ، ވެރިކަމަށް ވަޑައިގަތުމާއިއެކު ރައީސް ޑރ މުހައްމަދު މުއިއްޒުވަނީ ސަރުކާރުގެ ފަސް ކުންފުންޏެއްގެ ހިއްސާ އޮންނަ ގޮތަށް މޯލްޑިވްސް އިންޑަސްޓްރިއަލް ޑިވެލޮޕްމެންޓު ފްރީޒޯންގެ ނަމުގައި ކުންފުންޏެއް އުފައްދަވާފައިކަމަށެވެ.
އެމަނިކުފާނު ވިދާޅުވީ، އެމްއައިޑީއެފް ކުންފުނީގެ މައިގަނޑު އެއް މަގުސަދަކީ ބަލްކުކޮށް ކާބޯތަކެއްޗާއި ކޮންސްޓްރަކްޝަން ސާމާނުފަދަ އަސާސީ މުދާ ސްޓޯކުރުމުގެ ފުރުސަތު ފަހިކޮށްދިނުންކަމަށެވެ. މިނިސްޓަރ ވިދާޅުވީ، ރާއްޖެ ފަދައިން ވަކިވަކި ރަށްތަކަކުން އެކުލެވިފައިވާ ގައުމުތަކަށް މޫސުމީ ބަދަލުތަކުގެ ސަބަބުން ވަރަށް ބޮޑެތި ގޮންޖެހުންތައް ކުރިމަތިވެގެންދާކަމަށެވެ. އަދި ރަށްތަކުގައި ބޭނުން ނުކުރެވި ބޮޑެތި ބިންތައް ހުރިއިރު އިގްތިސާދީ މަސައްކަތްތައްވެސް ކުރިއަށް ނުގެންދެވި ހުރިކަމަށް އަލިއެޅުއްވިއެވެ. އެހެންކަމުން ކުންފުނިން ކުރަމުންދާ މަސައްކަތްތަކުގެ ތެރޭގައި އެފަދަ ބިންތަކުގެ ތެރެއިން ބަލްކް ސްޓޯރެޖް މަސައްކަތްތައް ކުރެވިދާނެ ތަންތަން ދެނެގަތުން ހިމެނޭކަމަށާއި ރައީސް ޑރ މުއިއްޒުވަނީ އެ މަސައްކަތްތައް ކުރިއަށް ގެންދިއުމަށް ނިންމަވާފައިކަމަށެވެ.
މިނިސްޓަރ ވިދާޅުވީ، އެ މަރުހަލާ ނިމުމަށްފަހު ކުންފުނިން ކުރަމުންދާނީ އެތަންތަނުގައި ވަސީލަތްތައް ގާއިމުކުރުމުގެ މަސައްކަތްތައްކަމަށާއި މާލެ ސަރަހައްދުގައިވެސް ބިން ލިބޭވަރަކުން ފްރީޒޯންގެ އިހުތިސާސްގެ ތެރެއިން މުދާ ބަލްކުކޮށް ބެހެއްޓުމަށްޓަކައި ފިޔަވަޅުތައް އެޅެމުންދާކަމަށް ހިއްސާކުރެއްވިއެވެ. އެގޮތުން ތެޔޮ ރައްކައުކުރުމަށްޓަކައި އޯފް ޕޯޓް ސަރަހައްދެއް ކަނޑައެޅިފައިވާ އުސޫލުން މަސައްކަތްތައް ކުރިއަށް ގެންދިއުމަށްޓަކައި ކޮންސްޓްރަކްޝަން މުދަލާއި އެހެނިހެން ހޯލްސޭލްކުރާ މުދާ ބޭރުން ބަލްކުކޮށް ގެނައުމުން އަގު ހެޔޮވެގެންދާކަމަށާއި އެހެންކަމުން އާންމު ރައްޔިތުންނާއި ހިސާބަށް ރީޓެއިލް އުސޫލުން ވިއްކާއިރުވެސް އެތައް ގުނައެއްގެ ފަސޭހަތައް ލިބިގެންދާކަމަށް ފާހަގަކުރެއްވިއެވެ.
ސައީދު ވިދާޅުވީ، ޑިއުޓީ ފްރީޒޯނެއްގައި ބަހައްޓާނެކަމަށްވުމުން ފުރަތަމަ އިމްޕޯޓުކުރާއިރު ޑިއުޓީ ދައްކަން ނުޖެހޭނެކަމަށާއި ރާއްޖޭގެ ބޯޑަރުން މުދާ އެތެރެކުރާއިރު ވަގުތުން ވަގުތަށް އިމްޕޯޓު ޑިއުޓީގެ ގޮތުގައި ފައިސާ ދައްކަން ނުޖެހޭކަމަށްވުމުން ކުންފުނިތަކަށްވެސް އިތުރު ލުއިތަކެއް ލިބިގެންދާނެކަމަށެވެ. އަދި އެކަމުގެ ސަބަބުން ވިޔަފާރި މާހައުލުގެ ތެރޭގައި އިތުބާރު އުފެދިގެންދާކަމަށާއި މިކަންކަމުގެ އިތުރުން ބައެއް ގައުމުތަކާއިއެކު ލޯކަލް ކަރަންސީ ސެޓަލްމެންޓް މަސައްކަތްތައްވެސް ކުރެވެމުންދާކަން ފާހަގަކުރެއްވިއެވެ. އެހެންކަމުން އެ މަސައްކަތްތަކުގައި ރަސްމީ ސިފަޖެހި ފެށިގެންދިއުމާއިއެކު އިންޑިއާ ފަދަ ގައުމުތަކުން ރާއްޖެއަށް އެތެރެކުރާ މުދަލަށް ދިވެހި ރުފިޔާއިން ފައިސާ ދެއްކުމުގެ ފުރުސަތު ހުޅުވިގެންދާނެކަމަށެވެ.
އެމަނިކުފާނު ވިދާޅުވީ، މިއީ ދެމެހެއްޓިނި ގޮތެއްގައި ރާއްޖޭގެ ރައްޔިތުންނަށް އަސާސީ މުދާ ފޯރުކޮށްދިނުމަށާއި ރާއްޖެއަށް ބޭނުންވާ އެހެނިހެން ބާވަތްތަކުގެ މުދާ ފޯރުކޮށްދިނުމަށްޓަކައި ސަރުކާރުން ރައީސް ޑރ މުއިއްޒު ގެންގުޅުއްވާ އިގްތިސާދީ ތަސައްވުރާއި އެއްގޮތަށް ކުރާ މަސައްކަތްތަކެއް ކަމަށެވެ.
މިނިވަން ވިޔަފާރީގެ އެއްބަސްވުންތަކާއިމެދު ވާހަކަދައްކަވަމުން މިނިސްޓަރ ވިދާޅުވީ، ރާއްޖެއަކީ މެނުފެކްޗަރިންގް ގައުމެއް ނޫންކަމަށާއި މިއީ އިމްޕޯޓަށް ބަރޯސާވެފައިވާ ގައުމެއްކަމަށެވެ. އެހެންކަމުން އިމްޕޯޓު ޑިއުޓީގެ ތެރެއިން ލުއި ގޮތްތަކެއް ހޯދައިދީގެން ނަމަވެސް ރާއްޖެއަށް މުދާ ގެނައުން އިތުރުކުރެވޭނެ މަގުކޮށިގެންދާނަމަ މުދާ ގަންނަ ފަރާތްތަކަށް އެތައް ގުނައެއްގެ ފަސޭހަތައް ލިބިގެންދާނެކަމަށެވެ. އަދި އެއީ ދެމެހެއްޓިނިވި ގޮތެއްގައި ރާއްޖޭގައި މުދަލުގެ އަގު ހެޔޮކުރެވޭނެ ނިޒާމެއް ގާއިމުކުރުމާއި ދިމާލަށް އެޅިގެންދާ މުހިންމު ފިޔަވަޅެއްކަމަށްވެސް ވިދާޅުވިއެވެ.
