ނުހައްގު މުއްސަނދިކަން ލިބިފައިވާ މީހަކަށް އަދަބު ލިބޭއިރު، އެ މީހެއްގެ އެ މުދާ ދައުލަތަށް ނެގުމުން ނޫނީ ގާނޫނުގެ ބޭނުމެއް ނެތްކަމަށް އެންޓި ކޮރަޕްޝަން ކޮމިޝަނުން ބުނެފިއެވެ.
ދައުލަތުގެ މަގާމެއް އަދާކުރުމަށް ފަހު ވަކިވެގެންދާއިރު، ނުހައްގު މުއްސަނދިކަމެއް ލިބިފައި ހުރުމުގެ އެތައް މައްސަލައެއް ފެންމަތިވި ނަމަވެސް މިހާތަނަށް ދައުވާއެއް އުފުލައި އެއްވެސް މީހެއްގެ މައްޗަށް ޝަރީއަތް ހިންގިފައި ނުވެއެވެ.
ކޮރަޕްޝަނަށް ތުހުމަތުވާ މައްސަލަތަކާއި، ނުހައްގު މުއްސަނދިކަން ހޯދުމުގެ މައްސަލަތައް ތަހުގީގުކޮށް ދައުވާކުރުމުގައި ހުރި ގޮންޖެހުންތައް ނައްތާލުމާއި ގުޅޭގޮތުން ރިޔާސީ ބަޔާނުގައި ވެސް ރައީސް ޑރ. މުހައްމަދު މުއިއްޒު އަލިއަޅުއްވާލެއްވި އެވެ. އޭގެ ކުރިން، މިދިޔަ އޮކްޓޯބަރު މަހުގެ ތެރޭގައި ސަރުކާރުގެ ފަރާތުން އޮތީ އެ ބިލު މަޖިލީހަށް ހުށަހަޅުއްވާފަ އެވެ.
ނުހައްގު މުއްސަނދިކަމުގެ ގާނޫނެއް އޮތް ނަމަވެސް، ގާނޫނުގެ ބޭނުން ރަނގަޅަށް ނުހިފި އޮއްވައި މި ސަރުކާރުން ހުށަހެޅި އެއް އިސްލާހަކީ ދައުލަތުގެ މުވައްޒަފަކަށްވެ ހުރެ ލިބެމުންދާ ނުވަތަ ދައުލަތުގެ މުވައްޒަފެއްގެ ގޮތުގައި ވަޒީފާ އަދާކުރިިއިރު ލިބެމުންދިޔަ އާމްދަނީއާ ނުބައްދަލު ދިރިއުޅުމުގެ ފެންވަރެއް ގާއިމުކޮށްފައިވުން ނުވަތަ އެފަދައިން ގާއިމުކުރާ ދިރިއުޅުމުގެ ފެންވަރު ދެމެހެއްޓުމަކީ ކުށަކަށް ހެދުމެވެ.
ބިލު ދިރާސާ ކުރުމަށް މިއަދު ކުރިޔަށް ގެންދިޔަ ޖުޑިޝަރީ ކޮމިޓީން އޭސީސީއާއި ބައްދަލު ކުރިއިރު ކޮމިޝަނުން ބުނެފައި ވަނީ ގާނޫނު މިހާރު އޮތް ގޮތުން ދައުލަތުގެ މަގާމެއްގައި ހުރެ ނުހައްގު މުއްސަނދިކަން ހޯދުން ކުށަކަށް ހެދިނަމަވެސް ހޯދާ މުދާ ދައުލަތަށް ނުނެގި ދިއުމުން ގާނޫނުގެ މަގްސަދު ހާސިލު ނުވާކަމަށެވެ. ކޮމިޓީގައި ވާހަކަ ދައްކަވަމުން އޭސީސީގެ އެސިސްޓެންޓް ކައުންސެލަރ ޖެނެރަލް ސާބިޔާ ސިރާޖު ވިދާޅުވީ ޖިނާއީ އިޖުރާއަތުގެ ގާނޫނު 192 ވަނަ މާއްދާ މިހާރު އޮތް ގޮތުން މިހާރު ދެވެނީ އަދަބު ކަމަށެވެ. އެހެންކަމުން ގާނޫނެއް ގެނެސް، ނުހައްގު މުއްސަނދިކަމަކީ ބޮޑު ކުށަކަށް ހެދުމުގެ އެ ހަގީގީ މަގްސަދު ހާސިލު ނުކުރެވޭކަމަށް ތަކުރާރު ކުރެއްވިއެވެ.
ސާބިޔާ ވިދާޅުވި ގޮތުގައި ނުހައްގު މުއްސަނދިކަން ކުށަކަށް ހަދާއިރު، ގާނޫނުގެ 192 ވަނަ މާއްދައާއި ގުޅޭގޮތުން ކުށާއި ގުޅޭ ޕްރޮސީޑްސް ނެގޭނެ ގޮތަށް ގާނޫނީ ނިޒާމަށް ބަދަލު ގެންނަން ޖެހެއެވެ. އެއަށްފަހު ފާހަގަކުރެއްވީ އެސެޓް ޑިކްލަރޭޝަން ނިޒާމެއްގެ މުހިންމުކަމެވެ.
