ގާނޫނުއަސާސީގެ މަފްހޫމަށް ބަލާއިރު ގޮނޑި ގެއްލޭ ގޮތަށް ގެނައި އިސްލާހު އިޖުރާއަތްތަކާއި އެއްގޮތަށް ފާސްކުރިކަމަށް ބެލެވޭނެ ޖާގައެއް ނެތްކަމަށް ކެންދޫ ދާއިރާގެ ކުރީގެ މެމްބަރު އަލީ ހުސެއިން ވިދާޅުވެއްޖެއެވެ.
ރައްޔިތުންގެ މަޖިލީހުގެ މެމްބަރުން ސިޔާސީ ޕާޓީ ބަދަލު ކުރުމުން ގޮނޑި ގެއްލޭ ގޮތަށް ގާނޫނުއަސާސީއަށް ގެނައި އިސްލާހު ސައްހައެއް ނޫންކަމަށް ކަނޑައަޅައިދިނުމަށް އެދި ހުށަހަޅާފާއިވާ މައްސަލައިގައި ސުޕްރީމް ކޯޓުގައި ކުރިއަށް ގެންދިޔަ އަޑު އެހުމުގައި މައްސަލަ ހުށައަޅާފައިވާ އަލީ ހުސެއިން ވަނީ ޖަވާބުދާރީ ވެފައެވެ.
އޭނާ ވިދާޅުވީ ގާނޫނުއަސާސީގެ 12 ވަނަ ބާބުގައި ބަޔާންކޮށްފައިވާ އިޖުރާއަތުތައް ފުރިހަމަ ކުރި ކަމަށް ފެނުނު ނަމަވެސް، އެއް ދުވަހެއްގައި ގާނޫނުއަސާސީއަށް އިސްލާހު ހުށައަޅައި ހަމަ އެދުވަހު މަޖިލީހުގައި ހިންގަންޖެހޭ ތިން ކިޔުން ހިންގާ، އަދި އިސްލާހު ފާސްކޮށް 9 ގަޑިއިރުގެ ތެރޭގައި އެކަން ތަސްދީގުކުރުމަކީ ގާނޫނުއަސާސީގެ މަފްހޫމަށް ބަލާއިރުއާއި އަދި ރައްޔިތުންގެ މަޖިލީހުގައި ހުރިހާ މެމްބަރުން ތިއްބަވާއިރު ފަހަތުގައި ލިޔެފައިވާ ”وَأَمْرُهُمْ شُورَىٰ بَيْنَهُمْ“ ގެ އުސޫލަށްވެސް ބަލާއިރު އިޖުރާއަތްތަކާއި އެއްގޮތަށް ފާސްކުރިކަމަށް ބެލެވޭނެ ޖާގައެއް ނެތް ކަމަށް ގަބޫލުކުރައްވާ ކަމަށެވެ.
ކޯޓުގެ އަޑުއެހުމުގައި ފަނޑިޔާރު މަހާޒް އަލީ ކުރެއްވި ސުވާލަށް ޖަވާބުދެއްވަމުން އަލީ ހުސެއިން ވިދާޅުވީ އާއްމު އުސޫލެއްގެ ގޮތުން ކޯޓުތަކުގެ އިހްތިސާސްއަކީ ބަލާބެލުމަށް ފެންނަން އޮންނަ މައްސަލައެއް ކަމަށެވެ. ނުވަތަ ބަލާބެލުމަށް އެކޯޓަކަށް ބެލޭ ޒާތުގެ މައްސަލައެއް ނަމަ އެ ކޯޓަކަށް އިހްތިސާސް އޮންނާނެ ކަމަށެވެ. މައްސަލަތައް ނުބެލޭނެ އިހްތިސާސް އާއްމު އުސޫލެއްގެ ދަށުން އެއްވެސް ކޯޓަކަށް ނުބެލޭނެ ބާވަތުގެ މައްސަލަތައް ގާނޫނު ތަކުގައާއި އަދި ”Jurisprudence“ ގައި ބަޔާންކޮށްފައި ހުންނާނެ ކަމަށް ވަކީލު ވިދާޅުވިއެވެ.
”މިސާލަކަށް ސިޔާސީ މައްސަލަތައް، question on politics، އިޖުތިމާއީ މައްސަލަތައް، މިސާލަކަށް ވަކި އަދަދެއްގެ ރަށްތަކެއްގައި ނޫނިއްޔާ މީހުންނަށް ދިރިނޫޅެވޭނެއޭ އިނގޭތޯ. ހަމައެގޮތަށް އިގްތިސާދީ މައްސަލަތައް، ރާއްޖޭގައި ބޭނުންކުރާ ފައިސާ ޗާޕްކުރާނީ މިވެނި މިންވަރަކަށޭ. އަޅުގަނޑު ކުރިން ފާހަގަކުރި ސިޔާސީ މައްސަލައެއްގައި އޮވެދާނެ މިސާލަކަށް ދިވެހިރާއްޖޭގައި އޮންނާނީ ކޮމިއުނިޒަމްތޯ ނުވަތަ ނޫންތޯ. މި ބާވަތުގެ މައްސަލަތަކެއް އެއްވެސް ކޯޓަކަށް އާއްމުގޮތެއްގައި އެ ބާވަތުގެ މައްސަލަތަކުގެ ގޮތް ކަނޑައެޅުމުގެ އިހްތިސާސްއެއް ނޯންނާނެ. އެހެންނޫންކަމަށްވާނަމަ ވަކިން ހާއްސަކޮށް ސުޕްރީމް ކޯޓަށް މި ބާވަތުގެ ދުސްތޫރީ މައްސަލައެއްގައި ގޮތް ކަނޑައެޅުމުގެ އަދި ބެލުމުގެ އިހްތިސާސް ސާފުގޮތެއްގައި ލިބިފައި އޮންނާނެ“
އަލީ ހުސެއިން ވިދާޅުވީ، އޭނާ ހުށައަޅައިފައިވާ މައްސަލައަކީ ސިޔާސީ މައްސަލައެއް ނޫންކަމަށާ، އަދި އުފައްދަނީ ސިޔާސީ ސުވާލެއްވެސް ނޫން ކަމަށާއި، އިގްތިސޯދީ ސުވާލެއްވެސް ނޫން ކަމަށާއި އަދި އިޖުތިމާއީ ސުވާލެއްވެސް ނޫން ކަމަށެވެ. މިހާރު އޭނާގެ ފަރާތުން އުފައްދާފައިވާ ސުވާލަކީ ގާނޫނީ ސުވާލެއް ކަމަށާއި، އެއީ ދުސްތޫރީ ސުވާލެއް ކަމަށް ވިދާޅުވިއެވެ.
އެކަން ދުސްތޫރީ ސުވާލަކަށް ވަނީ ރައްޔިތުން ނިންމާފައިވާ ނިންމުމެއް އެއީ ހައްސާސީ ގޮތުން ރައްޔިތުންގެ ވޯޓަކުން ނިންމާފައިވާ ނިންމުމެއް ކަމަށާއި އަދި އެ ނިންމުމަކީ ދިވެހިރާއްޖޭގައި އޮންނަން ޖެހޭނީ ރިޔާސީ ނިޒާމެއް ކަމެވެ.
