ރޯދަ މަހަށް އާންމުކޮށް ބޭނުންވާނެ އަސާސީ ބާވަތްތައް ކަނޑައެޅުމަށް ފަހު، އެތަކެތީގެ އަގުތައް މަތިވިޔަ ނުދީ ހިފެހެއްޓުމަށް ނިންމާފައިވާކަމަށް އިކޮނޮމިކް މިނިސްޓްރީން ބުނެފިއެވެ.
ރަމަޟާން މަހު ތަކެތީގެ އަގު އިންތިހާއަށް އުފުލި، އަތް ނުފޯރާ ފަށަށް ދިއުމަކީ ކޮންމެ އަހަރަކު ވެސް ދިމާވާ އެންމެ ބޮޑު މައްސަލައެވެ. އަދި ރައްޔިތުން އެކަމާ ކަންބޮޑުވުންފާޅު ކުރާއިރު، އެކަން ހައްލު ކުރުމަށް ސަރުކާރުން ވެސް ތަފާތު އެކި ފިޔަވަޅުތައް އަޅައެވެ.
ރަމަޟާން މަސް ފެށެން ކުޑަ ދުވަސްކޮޅަކަށްވެފައި ވަނިކޮށް މިނިސްޓްރީން ބޭއްވި ނޫސްވެރިންގެ ބައްދަލުވުމުގައި ވަނީ ތަކެތީގެ އަގުތައް ހިފެހެއްޓުމަށް ސަރުކާރުން ރާވާފައިވާ ބައެއް ކަންކަން ހާމަކޮށް ޕްރެޒެންޓޭޝަނެއް ހުށަހަޅާފަ އެވެ. އެ ތަފްސީލުތައް ދެއްވައި މިނިސްޓްރީގެ ކޮންސަލްޓަންޓް ނަޝްވާ ބަދީއު ވިދާޅުވީ ތަކެތީގު އަގު އުފުލިޔަ ނުދީ ހިފެހެއްޓުމަށް މިނިސްޓްރީން ތިން ކެޓަގަރީއެއްގެ ޖުމްލަ 141 ބާވަތެއް މޮނީޓަރ ކުރަމުން ގެންދާނެކަމަށެވެ.
އޭގެ ތެރޭގައި ހިމެނެނީ ގޭބިސީތަކުގައި ކެއުމަށާއި ކާބޯތަކެތި ތައްޔާރު ކުރުމަށް ބޭނުންކުރާ އަސާސީތަކެތީގެ ތެރެއިން 93 ބާވަތެކެވެ. އަދި މޭވާއާއި ތަރުކާރީގެ 38 ބާވަތެއްގެ އިތުރުން ކަނޑު މަހުގެ ބާވަތްތަކުން 10 އައިޓަމް ވަނީ ލިސްޓުގައ ހިމަނާފައެވެ.
ނަޝްވާ ވިދާޅުވި ގޮތުގައި މީގެ ތެރެއިން 32 ބާވަތެއް މިނިސްޓްރީން ލިސްޓުކޮށްފައި ވަނީ ކްރިޓިލްކޮށް ކަމަށެވެ. އަދި އެތަކެތި ވަރަށް ގާތުން މޮނީޓަރ ކުރަމުން ގެންދާނެކަމަށް ވިދަޅުވި އެވެ.
ހަޔަތު މިންގަނޑަކަށް ބަލައިގެން ކަނޑައަޅާފައިވާ އަސާސީ ކާބޯތަކެތީގެ ތެރޭގައި ހިމެނެނީ ރާއްޖޭގައި ކޮންސިއުމަރ ޕްރައިސް އިންޑެކްސްގައި ހިމެނޭ ކާބޯތަކެއްޗާއި، އިމްޕޯޓު ޑޭޓާއާއި ކޮންސަޕްޝަން ޑޭޓާއެވެ.
މީގެއިތުރުން އާންމު ރައްޔިތުން އާންމު ދިރިއުޅުމުގައިއާއި، ގޭބިސީގައި ކާބޯތަކެތި ތައްޔާރު ކުރުމަށް ބޭނުން ކުރާ ބާވަތްތައް ހިމެނެއެވެ.
މިއަދުގެ ބައްދަލުވުމުގައި އިކޮނޮމިކް މިނިސްޓަރ މުހައްމަދު ސައީދު ވިދާޅުވީ އަގުތައް ކޮންޓްރޯލް ކުރުމަށް ސަރުކާރުން ފިޔަވަޅު އަޅައި އެކަމަށް މަސައްކަތް ކުރަމުންދާތާ ދުވަސްތަކެއްވެފައިވާކަމަށެވެ. އެގޮތުން އާންމު ގޮތެއްގައި ކެއިންބުއިމުގައި ގޭބިސީތަކުގައި ބޭނުން ކުރާ ބާވަތްތަަކަށް ހާއްސަ އިސްކަމެއް ދެވިފައިވާނެކަމަށް ސައީދު ވިދާޅުވިއެވެ.
ސައީދު ވިދާޅުވީ ލިސްޓުގައި ހިމަނާފައި ވާނީ ކޮންމެހެން، ރައްޔިތުންނަށް ބޭނުންވާނެކަމަށް ބެލެވޭ ބާވަތްތައް ކަމަށެވެ. އަދި އެއިން ބާވަތެއް ހުސްވެއްޖެ ނަމަ ނުވަތަ އަގު އުފުލޭ ހާލަތެއް އައިސްފި ނަމަ އެސްޓީއޯ މެދުވެރިކޮށް ފިޔަވަޅު އަޅާނެކަމަށް ވިދާޅުވި އެވެ.
އެދުވަސްވަރު ރީޒަންއެއް ނެތި އެއްވެސް ބާވަތެއްގެ އަގު އުފުލިގެންދާ ކަމަށްވާ ނަމަ، އަޅުގަނޑުމެން މަސައްކަތް މިކުރަނީ އިންޓަވީން ކުރަން.
ތަކެތީގެ އަގުތައް ބަލަހައްޓާނެ ގޮތާއި ގުޅޭގޮތުން ނަޝްވާ ވިދަޅުވީ އިންސްޕެކްޝަންތައް ހިންގައި ދިރާސާކޮށްގެންނެވެ. އަދި މިނިސްޓްރީ ތައްޔާރު ކުރާ އެނަލިސިސްތަކުން އަގުތައް އުފުލާކަމަށް ފާހަގަވުމާއި އެކު އޭގެ ތެރެއަށް ވަންނާނެކަމަށް ވިދަޅުވި އެވެ.
ދާދިފަހުން އޮތް ”އަހާ ފޯރަމް“ ގައި އިކޮނޮމިކް މިނިސްޓަރ މުހައްމަދު ސައީދު ވެސް ތަކެތީގެ އަގުތައް ހިފެހެއްޓުމާއި ގުޅޭގޮތުން މައުލޫމާތު ދެއްވިއެވެ. ސައީދު ވިދާޅުވި ގޮތުގައި ރައީސް ޑރ. މުހައްމަދު މުއިއްޒުގެ އެންގެވުމާއި އެއްގޮތަށް، ތަކެތީގެ އަގުތަކާއި ބެހޭ ސިޔާސަތެއް ވަނީ އެކުލަވާލާފައެވެ. ސިޔާސަތު އެކުލަވާލައި، 100 އާންމު ގެއެއްގައި ނުވަތަ ގޭބިސީގައި ބޭނުން ކުރާނެ މުދަލާއި އަސާސީ މުދަލުގެ ބާވަތްތައް ދެނެގަނެ އެ ބޭނުން ކުރާނެ ގޮތް ލިޔެވިފައިވާނެކަމަށް ސައީދު ވިދާޅުވި އެވެ.
ބާޒާރުގައި ތަކެތީގެ އަގު އުފުލިއްޖެ ނަމަ އަމަލު ކުރާނެ ގޮތުގެ ސިޔާސަތެއް އެކުލަވާލެވިފައިވާއިރު ސައީދު ވިދާޅުވީ އެއީ 183 އައިޓަމްކަމަށެވެ. އޭގެ ތެރެއިން 54 ބާވަތް ރަމަޟާން މަހަށް ހާއްސަކޮށް ކްރިޓިކަލް އައިޓަމްތަކުގެ ގޮތުގައި ކަނޑައަޅާފައިވާނެކަމަށް ސައީދު ވިދާޅުވިއެވެ.
