މާލޭގައި މަސްދަޅު ކޭސް ބެހުމުގެ މަސައްކަތް ފެށުމާއި އެކު، އެތައް ސަތޭކަ ބަޔަކު ނިކުމެ ދިގު ކިއުތައް ހެދުމުން އިންތިޒާމުތައް ކުރިޔަށް ވުރެ ރަނގަޅަށް ހަމަޖެއްސުމުގެ މަސައްކަތް ކުރަމުންދާކަމަށް ސިޓީސް މިނިސްޓަރ އާދަމް ޝަރީފް އުމަރު ވިދާޅުވެއްޖެއެވެ.
ރަމަޟާން މަހާއި ދިމާކޮށް ކޮންމެ ގޭބިސީއަކަށް ދޭ ރޯދަ ހަދިޔާއެއްގެ ގޮތުން، ދޭން ނިންމި މަސްދަޅު ކޭސްތައް ދޫކުރުން މި މަސައްކަތް އަންނަ ބުރާސްފަތި ދުވަހުގެ ނިޔަލަށް ކުރިޔަށް ދާނެއެވެ.
ރޯދަ ހަދިޔާއާއި ގުޅޭގޮތުން މިނިސްޓަރ އާދަމް ޝަރީފް ވިދާޅުވީ މަދު އަތޮޅެއް ފިޔަވައި، ގިނަ ރަށްތަކަށް މަސްދަޅު ކޭސްތައް ފޮނުވާފައިވާކަމަށެވެ. އަދި ރޯދައިގެ ކުރިޔަށް މަސްދަޅު ކޭސް ބަހައި ނިންމުމުގެ މަސައްކަތް ކުރަމުންދާކަން ފާހަގަކުރައްވައި، އާދަމް ޝަރީފް ވިދާޅުވީ ރޯދަ މަހުގެ ތެރޭގައި ވެސް މަސްދަޅު ކޭސްތައް ބެހުމުގެ ބައެއް މަސައްކަތްތައް ކުރިޔަށްދާނެކަމަށެވެ.
ރޭ މާލެ ސަރަހައްދުގައި މަސްދަޅު ކޭސްތައް ދޫކުރަން ފެށިއިރު، ބޮޑު އާބާދީއެއް އޮތް މާލެއިން އެކަނި ވެސް ގިނަ ބަޔަކު ނިކުތެވެ. މާލޭގައި މަސްދަޅު ކޭސް ބަހަނީ މިފްކޯގެ އޮފީސް ކޮމްޕައުންޑާއި، ހެންވޭރު އެމްޓީސީސީ ސޯމިލުގައެވެ. އެގޮތުން ރޭ ދަންވަރު 3 ޖަހައި ބޮޑުވިއިރު ވެސް ކިއު ކުރިޔަށް ދިޔައެވެ.
މަސްދަޅު ކޭސް ބެހުމުގެ އިންތިޒާމުތައް ހަރުދަނާވެ، ގިނަ ވަގުތު ކިއުގައި ތިބެން ނުޖެހޭ ގޮތަށް ބަދަލު ގެނައުމަށް ބައެއް ފަރާތްތަކުން އެދިފައި ވާތީ އާދަމް ޝަރީފް ވިދާޅުވީ އާންމުން އެކަމަށް އިޖާބަ ދިން މިންވަރަށް ބަލައި މަސްދަޅު ކޭސް ބަހާނެ އިތުރުތަނެއް ކަނޑައަޅައި އާންމު ކުރާނެކަމަށެވެ.
މަސްދަޅު ކޭސްތައް ބެހުމަށް ހަމަޖެހިފައިވާ ގަޑިތަކަކީ:
ހޮނިހިރު ދުވަސް: ހެނދުނުގެ 10:00 އިން ހަވީރުގެ 16:00 އަށް އަދި ރޭގަނޑުގެ 20:30 އިން 23:00 އަށް
އާދީއްތަ – ބުރާސްފަތި ދުވަހަށް: މެންދުރު 14:30 އިން އިރުއޮއްސި 18:00 އަށް އަދި ރޭގަނޑު 20:30 އިން 23:00 އަށް
