މުނިސިޕަލް ޚިދުމަތް ދެވޭނެ ވަޞީލަތާއި މީހުންގެ ޤާބިލުކަން އުފައްދަން ޖެހޭ ކަމަށް މިނިސްޓަރ އޮފް ސިޓީސް، ލޯކަލް ގަވަރންމަންޓް އެންޑް ޕަބްލިކް ވާރކްސް އާދަމް ޝަރީފު ޢުމަރު ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރ ވިދާޅުވީ، ދިވެހިރާއްޖޭގެ ޕަބްލިކް ވާރކްސްގެ ޚިދުމަތް ދިނުމާއި ތަރައްޤީކުރުމާ ބެހޭ ސިޔާސަތުގެ ގޮތުގައި މައިގަނޑު 6 ސިޔާސަތެއް އެކުލަވައިލާ ހިންގަވަމުން އަންނަކަމަށެވެ.
އެ ސިޔާސަތުތަކަކީ:
- ސަރުކާރުގެ ސިޔާސަތު ތަންފީޒު ކުރުމުގެ ގޮތުން، ޕަބްލިކް ވާރކްސްގެ ދާއިރާއިން ކުރަން ޖެހޭ މަސައްކަތްތައް ރާވައި ހިންގުމުގެ ސިޔާސަތު
- އިދާރީ ދާއިރާތަކުގައި އާންމު މަސައްކަތްތައް ކުރުމަށް ޓަކައި ކޮންމެ އަތޮޅެއްގައި ޕަބްލިކް ވާރކްސް ޔުނިޓް ޤާއިމް ކުރުމުގެ ސިޔާސަތު
- ޕަބްލިކް ވާރކްސްގެ ދާއިރާއިން، އިދާރީ ދާއިރާތަކުގައި ކުރަންޖެހޭ ބޮޑެތި މަސައްކަތްތައް ކުރެވޭނެ ނިޒާމު ޤާއިމުކުރުމުގެ ސިޔާސަތު
- ޕަބްލިކް ވާރކްސް މަސައްކަތްތަކަށް ބޭނުންވާ ހެވީ ވެހިކަލްސް، މެޝިނަރީސް އަދި އިކުއިޕްމަންޓްސް ހޯދުމާއި ތަރައްޤީ ކުރުމުގެ ސިޔާސަތު
- ޕަބްލިކް ވާރކްސް މަސައްކަތްތަކަށް ބޭނުންވާ ފަންނީ މީހުން ބިނާކުރުމުގެ ސިޔާސަތު
- ޤުދުރަތީ ކާރިޘާތަކާއި ޙާދިޘާތަކުން ލިބޭ ގެއްލުންތަކުން އަރައިގަތުމަށް އެހީތެރިވުމުގެ ސިޔާސަތު
މިނިސްޓަރު ވިދާޅުވީ، ޕަބްލިކް ވާރކްސްގެ 7 ޔުނިޓެއް މިހާރުވެސް އަތޮޅުތެރޭގައި މަސައްކަތްކުރަމުން އަންނ ކަމަށެވެ. އަދި ރ. މާކުރަތުގައި ޕަބްލިކް ވާރކްސް ޔުނިޓް އުފެއްދުމަށް ނިންމާފައިވާކަމަށްވެސް މިނިސްޓަރު ވިދާޅުވިއެވެ.
މީގެ އިތުރުން މިނިސްޓަރު ވަނީ ލާމަރުކަޒީ ނިޒާމު ހަރުދަނާ ކުރުމާއި ތަރައްޤީކުރުމާ ބެހޭ ސިޔާސަތަކާއި ގުޅޭ ގޮތުންވެސް މައުލޫމާތު ދެއްވާފައެވެ. މިނިސްޓަރު ވިދާޅުވީ މައިގަނޑު 5 ސިޔާސަތެއް ކަނޑައަޅުއްވައިފައިވާކަމަށެވެ.
އެއީ ކައުންސިލްތައް މާލީގޮތުން ބާރުވެރިކުރުވުމުގެ ސިޔާސަތާއި، ރަށްވެހި ޚިދުމަތް ފޯރުކޮށްދިނުމުގައި ކައުންސިލްގެ ދައުރު ފުޅާކުރުމުގެ ސިޔާސަތާއި، ކައުންސިލްތަކަކީ ރައްޔިތުންގެ ބައިވެރިވުމާއި މަޝްވަރާގެ މަތިން، ހާމަކަން ބޮޑުގޮތެއްގައި ހިންގާ، ޖަވާބުދާރީ ވަނިވި މުއައްސަސާތަކަކަށް ހެދުމުގެ ސިޔާސަތާއި، ލޯކަލް ގަވަރމަންޓް އޮތޯރިޓީއަށާއި ކައުންސިލްތަކަށް ސަރުކާރުން ބޭނުންވާ އެހީތެރިކަމާއި އެއްބާރުލުން ފޯރުކޮށްދިނުމުގެ ސިޔާސަތާއި އަދި ޓެކްނޮލޮޖީގެ އެހީގައި ލާމަރުކަޒީ ނިޒާމަށް ގެންނަންޖެހޭ އިންޤިލާބީ ބަދަލުތައް ގެނައުމުގެ ސިޔާސަތެވެ.
