ރަމަޟާންމަހަށް ތައްޔާރުވުމުގެ ގޮތުން ކުރެވޭނެ އެންމެ މުހިންމު ކަމަކީ، އެ މަހަށް ތިމާގެ ނަފުސު ހޭނުވުންކަމަށް ހުކުރު ހުތުބާގައި ބުނެފިއެވެ.
މިއަދުގެ ހުކުރު ހުތުބާ ރަމަޟާން މަހަށް ހާއްސަކޮށް، ވަނީ މި ބަރަކާތްތެރި މައްސަރާއި ފުރިހަމަ އީމާންކަމާއި އެ ދުވަސްތަކުގެ ފުރިހަމަ ދަރުމައާއި ސަވާބަށް އެދޭ ހާލަތުގައި ކުރިމަތިލުމަށް ގޮވާލާފަ އެވެ. ހުތުބާގައި ބުނީ ރަމަޟާން މަހާއި ކުރިމަތިލާން ވާނީ އެ މައްސަރުގެ ތަރުބަވީ މަދަރުސާއިން ނަފްސުތައް އިސްލާހުކޮށް ހަޔާތުގެ އައު ސަފުހާތަކެއް ހުޅުވައިލުމުގެ މަތިވެރި އަޒުމާއި އެކުކަމަށެވެ. އަދި ނަފްސު ހެޔޮ ކަންކަމަށް ތަރުބިއްޔަތުކޮށް ހޭނުވުމަށް އެއަށް ވުރެ ވަކީން ރަނގަޅު ފޯވައްސެއް ނުލިބޭނެކަން ފާހަގަކުރި އެވެ.
މިއީ އެހެން މަސްތަކާއި ހިލާފަށް އަޅުކަމުގައި މުރާލިކަން އިތުރުކޮށް، ވަރުގަދަ އަޒުމަކާއި އެކު ކުރިމަތިލާން ޖެހޭ މައްސަރެއްކަމަށް ހުތުބާގައި ބުންޏެވެ. އަދި މިއީ ތަޤުވާވެރިކަމަށް ވާސިލުކޮށްދޭ ހުރިހައި ވެސް ސަބަބުތަކެއް އެ މަހެއްގައި ޖަމާވާ މައްސަރުކަމަށް ހުތުބާގައި ބުނެފައި ވެއެވެ.
ހުތުބާގައި ބުނީ ރޯދަ މަހަށް ތައްޔާރުވުމުގެ ގޮތުން ކުރަން ޖެހޭ އެންމެ މުހިންމު ކަމަކީ، ރޯދައިގެ ޝަރުއީ ހުކުމްތައް ދެނެގަތުން ކަމަށެވެ. އެގޮތުން ރޯދައިގެ މަތިވެރިކަމާއި ފުރިހަމަ ސަވާބާއި ދަރުމަ ލިބޭ ގޮތަށް ރޯދަ ހިފާނެ ގޮތް ދަސްކުރުމުގެ މުހިންމުކަން ފާހަގަކޮށް ބުނީ ރޯދަ ގެއްލޭ ކަންތަކާއި ރޯދައަށް ހުރެ ކުރުން މަކުރޫހަ ކަންކަން ދެނެގަނެ އެކަންކަމުން ދުރުހެލިވާން ޖެހޭކަމަށެވެ. އޭގެ ސަބަބެއްކަމަށް ހުތުބާގައި ބުނީ ރޯދައިގެ ހިސާބެއް ނެތް އަޖުރު، އޭގެ އެންމެ ފުރިހަމަ ގޮތުގައި ލިބިގަތުމެވެ.
މީގެއިތުރުން ހުތުބާގައި ބުނީ ރޯދަ ހިފަން ޖެހޭ ގޮތަށް، ރޯދަ ނުހިފާނމަ މި މަތިވެރި ސަވާބާއި ދަރުމަ ނުލިބޭނެކަމަށެވެ.
ހުތުބާގައި ބުނެފައި ވަނީ ރޯ ރޯދައިގެ މަތިވެރި ސަވާބާއި ދަރުމަ ހޯދުމަށް ޓަކައި، ކުރާންވީ ކަންކަމުގެ ތެރޭގައި، ހާރު ކެއުން ފަސްކުޅައުމާއި، ފަރުޟު ނަމާދުތަކަށާއި، ރަވާތިބު ސުންނަތްތަކަށް ރައްކައުތެރިވުމާއި، ކީރީތި ޤުރްއާން ކިޔަވާ އިރު، ޤުރްއާނާ މެދު، ވިސްނައި ފިކުރުކުރުމާއި، ގިނަގިނައިން ދުޢާކުރުން ހިމެނެއެވެ. އަނބިދަރީންނާއި މައިންބަފައިންނާއި ގާތްތިމާގެމީހުންނަށް ހެއު ފޯރުވައި އިޙްސާންތެރިވެ އުޅުމާއި، ވަގުތުވުމުން ރޯދަވީއްލުން އަވަސްކުރުމާއި، ގިނަގިނައިން ސަދަގާތްކުރުން ހިމެނޭ ކަމަށެވެ. އަދި ތަރާވީޙު ނަމާދާއި ރޭއަޅުކަންކުރުން ފަދަ ކަންކަމަށް ޖާގަ ލިބޭނޭ ގޮތަށް ކަންކަން ރާވައިލައިގެން ރަމަޟާންމަހާ ބައްދަލުކޮށްފި ނަމަ، އެންމެ ފުރިހަމަ ގޮތުގައި، މި މަތިވެރި ފޯވަހީގެ ބޭނުން ހިފޭނެކަމަށް ހުތުބާގައި ބުންޏެވެ.
ހުތުބާގައި ބުނީ ރަމަޟާންމަހަށް ތައްޔާރުވުމުގެ ގޮތުން ކުރެވޭނެ އެންމެ މުހިންމު ކަމަކީ، އެ މަހަށް ތިމާގެ ނަފުސު ހޭނުވުން ކަމަށެވެ.
