މިނިސްޓަރ އޮފް ފޮރިން އެފެއާޒް އަބްދުﷲ ހަލީލްއަށް ލަންކާގެ ރައްޔިތަކު ބިރުދައްކާ އިންޒާރުދޭ މައްސަލައެއް ފުލުހުން ބަލަން ފަށައިފިއެވެ.
މިވަގުތު މިނިސްޓަރު ހަލީލް ހުންނެވީ ރަސްމީ ދަތުރެއްގައި ލަންކާގައެވެ.
ނަދީޝް ޕަރެރަ ނަމަކަށް ކިޔާ ލަންކާގެ ރައްޔިތަކު މިނިސްޓަރު ހަލީލްގެ ފޮޓޯއާއިއެކު ވަރަށް ބޮޑެތި ގެއްލުންތަކެއް ވެފައި ހުރި ކާރެއްގެ ފޮޓޯ ހިއްސާކޮށް ބުނީ މިނިސްޓަރު ހަލީލްއަށް ވެސް މިފަދަ ހާދިސާއެއް މެދުވެރިވެދާނެކަމަށެވެ. އެމަނިކުފާނުގެ ޑްރައިވަރު މިފަދަ ކަންކަމަށް ސަމާލުވާން ޖެހޭކަމަށް ވިދާޅުވިއެވެ.
އެ ޕޯސްޓްގެ ބަސްމަގު ހުރީ ނުތަނަވަސްކަން އުފެދޭ ގޮތަށެވެ.
މިކަން ފުލުހުންގެ ސަމާލުކަމަށް އައިސްފައިވޭތޯ ސުވާލުކުރުމުން ފުލުހުން ބުނީ، މިކަމާއި ގުޅުން ހުރި އިދާރާތަކާއިއެކު ބަލަން ޖެހޭ ކަންކަން ބަލަމުންދާކަމަށެވެ.
ނަދީޝް ޕަރެރަ އަކީ ރާއްޖެއަށް ނާދެވޭ ގޮތަށް ޑީޕޯޓް ކޮށްލާފައި ހުރި މީހެއްކަން އޭނާގެ އެކްސް އެކައުންޓުން ހާމަވެއެވެ. މިކަމާއި ގުޅިގެން މިއީ ޒާތީ ގޮތުން ނިންމާފައިވާ ނިންމުމެއްކަމަށް ތުހުމަތުކޮށް އޭނާ ވަނީ ޕޯސްޓްތަކެއްކޮށްފައެވެ.
އެ މައްސަލައާއި ގުޅުވައި އޭނާ ދަނީ އިމިގްރޭޝަން ކޮންޓްރޯލާރ ޝަމްއާން ވަހީދަށް އަމާޒުކޮށް ވެސް އިންޒާރުތައް ދޭ މޭރުމަކުން ޕޯސްޓުތައް ކުރަމުންނެވެ. މިނިސްޓަރ ޚަލީލަށް އިންޒާރު ދިން މައްސަލަ ސަމާލުކަމަށް އައިސްފައިވާކާމަށް ފުލުހުން ބުނެފައި ވާތީ، ނޫސްވެރިން ވަނީ ޝަމްއާނާއި ގުޅޭ އެފަދަ ޕޯސްޓުތައް ގިނަކަން ފާހަގަކޮށްފައެވެ.
