ހުރިހާ ގޭބީސީތަކަށް ލިބެންދެން މިމަހުގެ 28 އާއި ހަމައަށް ރޯދަ ހަދިޔާ ބަހާނެ ކަމަށް ކަމަށް މިނިސްޓަރ އޮފް ސިޓީސް، ލޯކަލް ގަވަރންމަންޓް އެންޑް ޕަބްލިކް ވާރކްސް އާދަމް ޝަރީފު ޢުމަރު ވިދާޅުވެއްޖެއެވެ.
މާލޭގައި މަސްދަޅު ކޭސް ބެހުމުގެ މަސައްކަތް ފެށުމާއި އެކު، އެތައް ސަތޭކަ ބަޔަކު ވަނީ އެތަންތަނަށް އެއްވެފައެވެ. ރަމަޟާން މަހާއި ދިމާކޮށް ކޮންމެ ގޭބިސީއަކަށް ދޭ ރޯދަ ހަދިޔާއެއްގެ ގޮތުން، ދޭން ނިންމި މަސްދަޅު ކޭސްތައް ދޫކުރުން މި މަސައްކަތް އަންނަ ބުރާސްފަތި ދުވަހުގެ ނިޔަލަށް ކުރިޔަށް ދާނެއެވެ. އެކްސްގައި ޕޯސްޓެއް ހިއްސާ ކުރައްވާ މިނިސްޓަރ ވަނީ ގްރޭޓަރ މާލެ ސަރަހައްދުގައި ރޯދަޔަށް މަސް ދަޅު ކޭސް ބަހާފައިވާ ތަފްސީލުތައް ވަނީ ހިއްސާ ކުރައްވާފައެވެ.
އެގޮތުން:
- ވިލިމާލެ: 582
- އެމްޓީސީސީ ސޯ މިލް: 2083
- މިފްކޯ: 3666
- ހިޔާ ފުލެޓު 10: 1555
- އުމަރު ޒާހިރު ބިލްޑިން: 1508
ޖުމްލަ: 9394
މާދަމާ ރެއިން ފެށިގެން މާލެގައި ގަލޮޅު ދަނޑުގެ 4 ފަރާތު ސިޑިބަރި ކައިރިންނާއި، ސޯޝަލް ސެންޓަރ، ހެންވޭރު ދަނޑު، ހުޅުމާލެ ފޭސް 1 އަދި 2 އާއިއެކު 13 ތަނެއްގައި 5 މޭޒަކުން މަސްދަޅު ކޭސް ބެހުމުގެ މަސައްކަތް ކުރިއަށް ދާނެ ކަމަށް މިނިސްޓަރ ވިދާޅުވިއެވެ. މިނިސްޓަރ ވިދާޅުވީ ދުވާލު ގަޑިޔަކީ ހޫނު ވަގުތަކަށް ވުމުން އެގަޑިތަކުގައި ރޯދަ ހަދިޔާ ދޫކުރުމެއް ނޯންނާނެ ކަމަށެވެ. އަދި ރޭގައި ރައްޔިތުން ގިނަ ވަގުތު ކިއުގައި ހޭދަ ކުރަން ޖެހުމުން އެކަމަށް ހިތާމަކުރައްވާ ކަމަށެވެ.
މިނިސްޓަރ ވިދާޅުވީ އިންސާނީ ވަސީލަތް އިތުރުކޮށް، އިންތިޒާމުތައް ރަނގަޅު ކުރުމަށް މަސައްކަތް ކުރައްވަމުން ގެންދަވާ ކަމަށެވެ. އަދި ދިގު ކިއުއަށް ނޭރިކަމުގައި ވިޔަސް ކުރޮއަށް އޮތް ދުވަސްތަކުގައި ރޯދަ ހަދިޔާ ދޫކުރުމަށް ހަމަޖެހިފައިވާތީ ހުރިހާ ގޭބީސީއަކަށް ރޯދަ ހަދިޔާ ލިބެންދެން 28 ފެބްރުއަރީ ގެ ނިޔަލަށް ހަދިޔާ ބެހުމުގެ މަސައްކަތް ކުރިއަށް ގެންދަވާނެ ކަމަށް މިނިސްޓަރ ވިދާޅުވިއެވެ.
