ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅުތަކުގެ ތެރޭގައި ހިމެނޭ ފަސް މިލިއަން ގަސް އިންދުމުގެ ޕްރޮގުރާމުގައި ބައިވެރިވުމުގެ ގޮތުން އެޗްޑީސީން އެއް މިލިއަން ގަސް އިންދުމަށް ނިންމައިފިއެވެ.
އެޗްޑީސީން މައުލޫމާތު ދީފައިވާގޮތުން އެ ކުންފުނިންވަނީ މި މަސައްކަތްތައް ކުރިއަށް ގެންދިއުމުގެ ގޮތުން ޕްލެޖްގައި ސޮއިކޮށްފައެވެ. އަދި މި ރަސްމިއްޔާތު ކުރިއަށް ގެންދިޔައީ ކުޑަގިރީގައިކަމަށާއި އެ ކުންފުނީގެ ފަރާތުން ސޮއިކުރެއްވީ އެމްޑީ މުހައްމަދު މައުރޫފް ޖަމީލްކަމަށެވެ.
އެމްޑީ މައުރޫފް ވިދާޅުވީ، މި މަސައްކަތްތަކަކީ އެޗްޑީސީގެ ބެލުމުގެ ދަށުގައިވާ ރަށްތައް ފެހިކުރުމާއެކު، ރައީސް ޑރ. މުހައްމަދު މުއިއްޒު އިއުލާން ކުރައްވާފައިވާ ފަސް މިލިއަން ގަސް އިންދުމުގެ ޕްރޮގުރާމުގައި ބައިވެރިވެ، އެ މަސައްކަތަށް އެއްބާރުލުން ދިނުމުގެ ގޮތުން ކުރިއަށްގެންދާ ހަރަކާތެއްކަމަށެވެ.
ގަސް އިންދުމުގެ ޕްރޮގްރާމަށް ބޭނުންވާ ގަސް ހެއްދުމަށްޓަކައި ލ. ގަމުގައި އެއްލައްކަ އަކަފޫޓުގެ ނާސަރީއެއް ގާއިމްކުރުމަށް ނިންމާފައިވާކަމަށްވެސް އެޗްޑީސީން ބުނެފައިވެއެވެ. އަދި ހުޅުމާލޭގެ އިތުރުން އެޗްޑީސީގެ ބެލުމުގެ ދަށުގައިވާ ރަސްމާލެއާއި، ކުޑަގިރި، ތިލަފުށި އަދި ގުޅީފަޅުގައި އިންދާ ގަސްތައް ހެއްދުމަށް މި ނާސަރީ ބޭނުންކުރާނެކަމަށާއި މި ޕްރޮގްރާމާއެކު ހުޅުމާލެ ހިމެނޭހެން އެޗްޑީސީގެ ބެލުމުގެ ދަށުގައި އޮތް ރަށްތައް ފެހިކުރުމަށް ހިފާފައިވާ އަމާޒަށް ވާސިލުމަށްވެސް މަގުފަހިވާނެކަމަށްވެސް ހިއްސާކޮށްފައިވެއެވެ. އެޗްޑީސީން ބުނެފައިވާގޮތުން އެ ކުންފުނީގެ އަމާޒަކީ ބެލުމުގެ ދަށުގައިވާ ހުރިހާ ރަށެއްގައިވެސް ހިތްފަސޭހަ ފެހި މާހައުލެއް ގާއިމުކުރުމެވެ.
