ސްޓެލްކޯއިން ކުރައްވާ މަސައްކަތުގައި ދިވެހި ރައްޔިތުން ބައިވެރިވެ، ކަރަންޓު އިގްތިސާދުކުރުމަށް އެ ކުންފުނީގެ މެނޭޖިންގ ޑިރެކްޓަރު ހުސައިން ފަހްމީ ގޮވާލައްވައިފިއެވެ.
މީޑިއާތަކަށް ދެއްވި އިންޓަވިއުއެއްގައި އެމްޑީ ވިދާޅުވި ގޮތުގައި، ކުރިއަށް އޮތް ރޯދަމަހަކީ ހޫނު ދުވަސްވަރަކަށް ވުމާއެކު، ގޭގައި ބޭނުންކުރެވޭ ކަރަންޓު އިގްތިސާދުކުރުމުން ރައްޔިތުންނަށް އޭގެ ފައިދާ ކުރާނެއެވެ.
މާލެ ސަރަހައްދުގައި ކަރަންޓުގެ މައްސަލަ ހައްލުކުރުމަށްޓަކައި، ހުޅުމާލޭގައި ގާއިމުކުރެވޭ ޖެނެރޭޓަރު ފެސިލިޓީގެ މަސައްކަތް 6 ދުވަހުގެ ތެރޭގައި ނިންމައި، ބޭނުންކުރަން ފެށޭނެ ކަމަށް ”މި ފެސިލިޓީގައި 17 މެގަވޯޓްގެ 13 އިންޖީނު ހިމެނޭނެ“ ކަމަށް އެމްޑީ ވިދާޅުވިއެވެ.
މި ފެސިލިޓީއަކީ ސްޓެލްކޯގެ ޚިދުމަތް އިތުރަށް ތަރައްގީކުރުމުގެ ގޮތުން ކުރެވޭ މަސައްކަތެއް ކަމަށާއި، މިކަމުގެ ސަބަބުން ރައްޔިތުންނަށް ކަރަންޓުގެ މައްސަލަ ދިމާވެ، ކުރިމަތިވެދާނެ ދަތިތަކަށް ހައްލެއް ލިބިގެންދާނެ ކަމަށް އެމްޑީ ފާހަގަކުރެއްވިއެވެ.
މި ފެސިލިޓީގެ މަސައްކަތްތައް ބެއްލެވުމަށް ޓްރާންސްޕޯޓް މިނިސްޓަރު މުހައްމަދު އަމީނާއި ސްޓެލްކޯގެ މެނޭޖްމަންޓާއި އިތުރު މުވައްޒަފުން ވަނީ ޒިޔާރަތްކުރައްވާފައެވެ.
