ބައިނަލްއަގުވާމީ ގޮތުން ދިމާވި ބޮޑެތި ގޮންޖެހުންތަކާއި ހެދި ދަރަނި ނަގަން ޖެހުނު ނަމަވެސް އެކަން ކުރީ ޒިންމާދާރުކޮށް ކަމަށް އެމްޑީޕީގެ ޕީޖީ ލީޑަރު އިބްރާހިމް ނާޒިލް ވިދާޅުވެއްޖެއެވެ.
ރައީސުލްޖުމްހުރިއްޔާ ޑރ މުހައްމަދު މުއިއްޒު އިއްވި ރިޔާސީ ބަޔާނަށް ޖަވާބު ދެއްވުމުން ނާޒިލް ވިދާޅުވީ އެމްޑީޕީގެ ސަރުކާރުގައި ނެގި ދަރަންޏަކީ ހާމަކަން ބޮޑުކޮށް ކުރެއްވި ކަމެއް ކަމަށެވެ. އެމްޑީޕީގެ ދައުރުގެ އިންތިހާބީ އަހަރުގައިވެސް ރިފޯމް އެޖެންޑާ ކުރިއަށް ގެންދިޔަ ކަމަށް ނާޒިލް ވިދާޅުވިއެވެ.
އިގްތިސޯދުގައި ހުރި ހަކަތައަށް ބަލައި ދުނިޔޭގެ މާލީ، އިދާރާ ތަކާއި، މާލީ ބާޒާރުގައި އިތުބާރު ރާއްޖޭގެ މައްޗަށް ބޭއްވުމަށް ދުރުރާސްތާ ރާއްޖޭގެ އިގްތިސާދީ ކުރިއެރުމަށްޓަކައި، އޭރު އެޅި ފިޔަވަޅުތަކައި، ތަންފީޒީ އެޖެންޑާއަށް ދުނިޔޭގެ ތައުރީފާއި މާލީ އެހީ ލިބެމުން ދިޔަކަމަށް ނާޒިލް ވިދާޅުވިއެވެ.
”ބޭރު އެހީދޭ ފަރާތްތަކުންނާއި، މާލީ ބާޒާރުތަކުން ރަނގަޅު އަގުގައި އޭރު ފައިސާ ލިބެމުން ދިޔަ. އޭރުގެ ހާލަތުގައިވެސް އޮކްޓޯބަރ 2023ގައި ރާއްޖޭގެ ކްރެޑިޓް ރޭޓިންގ ދަށަށް ނުގޮސް ހިފެހެއްޓުނު. ދައުރު ބަދަލުވުމާއި އެއްކޮށް ރައީސް މުއިއްޒުގެ ހާގީގަތް ހާމަވެއްޖެ. އެމްޑީޕީން ފެށި ރިފޯމް އެޖެންޑާ ހުއްޓައިލައިފި. މިއަދާ ހަމައަށް މާލީ ރީފޯމެއް ނުފެނޭ. ޙަރަދުތައް އިންތިހާއަށް ބޮޑުވެއްޖެ. ރިފޯމް ނުގެނެސް ފާއިތުވާ ކޮންމެ މަހަކަށް ދައުލަތުން 250 މިލިއަން ރުފިޔާގެ ހަރަދު ކުރަން ޖެހޭނެ. ހިތާމައަކީ ސަރުކާރުން ފާސްކުރި ބަޖެޓާއި ރައީސް މުއިއްޒު ބަސްފުޅާއި ދިމާނުވާކަން“
ނާޒިލް ވިދާޅުވީ 15 މަސް ވެގެން ދިޔައިރު ރައީސް މުއިއްޒު އައްޔަނުކުރައްވާ ސިޔާސީ މުވުައްޒަފުންގެ އަދަދު މިއަދާހަމައަށްވެސް ސިއްރުކޮށްފައިވާ ކަމަށެވެ. ނާޒިލް ވިދާޅުވީ މިވަގުތު 3000އަށް ވުރެ ގިނަ ސިޔާސީ މުވައްޒަފުން ތިބިކަމަށް ލަފާކުރެވޭ ކަމަށެވެ. ސިޔާސީ މުވައްޒަފުން މަދުކުރި ކަމަށް ރައީސް ވިދާޅުވި ނަމަވެސް އޭގެ އެއްވެސް ހެއްކެއް ދެއްކިފައި ނުވާ ކަމަށް ނާޒިލް ވިދާޅުވިއެވެ.
ނޫސްވެރިންގެ ސުވާލުތަކަށާއި އާރްޓީއައި ތަކަށް ސަރުކާރުން ޖަވާބުނުދެއްވާ ކަމަށް ނާޒިލް ވިދާޅުވިއެވެ. ނިމިދިޔަ 2024 ވަނަ އަހަރުގެ ޖޫން މަހާއި ހަމައަށް ޝާއިއުކުރި ޕީސީބީ ރިޕޯޓްގައި ސަރުކާރު ކުންފުނިތަކަށް 2698 ވަޒީފާ އިތުރުކޮށްފައިވާ ކަމަށްވެސް މެމްބަރު ވިދާޅުވިއެވެ.
މީގެއިތުރުން މެމްބަރު ވިދާޅުވީ ވަޒީތަކުގެ އަދަދަކީ މީގެ 8 މަސް ދުވަސް ކުރީގެ އަދަދެއް ކަމަށާއި އަދި މިހާރު އެ އަދަދު ހާމަނުކުރާ ކަމަށެވެ. އަދި މި ސަރުކާރުގެ މާލީ ރިޕޯޓްތަކުން އިނގޭ އެއްޗަކީ މުވައްޒަފުންގެ މުސާރައަށް ކުރާ އަދަދު 1 ބިލިއަން ރުފިޔާ އިތުރުވެފައިވާ ކަން ކަމަށްވެސް ނާޒިލް ވަނީ ވިދާޅުވެފައެވެ.
