ދ. އަތޮޅުގެ ހުރިހާ ރަށެއްގައި ބީއެމްއެލް އޭޓީއެމްގެ ހިދުމަތް މިހާރު ގާއިމުވެފައިވާކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ދ. މީދޫގެ ޖަލްސާގައި ރައީސް ވިދާޅުވީ ރައްޔިތުންގެ ކަންބޮޑުވުންތައް އަޑުއަހައި އެކަންކަމަށް ހައްލު ގެނައުމަކީ އެމަނިކުފާނުގެ ޒިންމާއެއްކަމަށެވެ. ރައީސް ވިދާޅުވީ ސަރުކާރުން ކުރާ ކޮންމެ މަސައްކަތެއްގެ ނަތީޖާއާއި އިހުލާސްތެރިކަމާއި މެދު ސުވާލު އުފެއްދި ނަމަވެސް ރައްޔިތުންނަށް އެތައްކަމެއްގައި ހަގީގަތް ފެންނަން އެބައޮތްކަމަށެވެ.
މިސާލެއްގެ ގޮތުގައި ޑޮލަރުގެ މައްސަލަ ހައްލު ކުރުމަށް، ގެނައި ބޭރު ފައިސާއާއި ބެހޭ ގާނޫނު ފާހަގަކުރައްވައި ރައީސް ވިދާޅުވީ އެއީ ސަރުކާރުން ދައްކާ ހުސް ވާހަކައެއްކަމަށް ބައެއް މީހުން ދެކުނުކަމަށެވެ. އެހެން ނަމަވެސް މި ފެށޭ ރަަމަޟާން މަހު އުމްރާއަށް ދާ އުމްރާވެރިންނަށް ވެސް 1،500 ޑޮލަރުގެ އިންތިޒާމު ހަމަޖެއްސުނީ އޭގެ ސަބަބުން ނޫންތޯ ރައީސް ސުވާލު ކުރެއްވިއެވެ.
މިހާރު ބޭރަށް ދާ ފަރާތްތަކަށް ލިބެނީ 500 ޑޮލަރު.. އަންނަ އަހަރު އެ ޑަބަލް ވެގެންދާނެ.. ހަމަ އެ ގޮތަށް ކްރެޑިޓް ކާޑު ވެސް އިތުރު ކުރެވިގެންދާނެ އަޅުގަނޑު އިއުލާނު ކުރި ގޮތަށް..
އެމަނިކުފާނު ވިދާޅުވީ ބޭރު ފައިސާއާއި ބެހޭ ގާނޫނުގެ ނަތީޖާ ކުރިޔަށް އޮތް ދުވަސްތަކުގައި ރައްޔިތުންނަށް ފެންނަމުންދާނެކަމަށެވެ.
ހާއްސަ އިސްކަމެއް ދީގެން ސަރުކާރުން ކުރަމުންދާ އިތުރު މަސައްކަތެއްގެ ގޮތުގައި ރައީސް ދެން ވިދާޅުވީ ކޮންމެ ރަށެއްގައި ވެސް އޭޓީއެމްގެ ހިދުމަތް ދިނުމެވެ. އެކަން އެމަނިކުފާނުގެ ރިޔާސީ ބަޔާނުގައި ވެސް ފާހަގަކުރައްވާފައި ވެއެވެ. އަދި ދ. އަތޮޅުގެ ރަށްތަކަށް ކުރެއްވި ދަތުރުފުޅުގެ ތެރެއިން ވަޑައިގެންނެވި ރަށްތަކުގައި ވަނީ މުޅިން އަލަށް ބީއެމްއެލް އޭޓީއެމްގެ ހިދުމަތް ފައްޓަވާދެއްވާފައެވެ.
އެންމެ އާދައިގެ ނިކަމެތި މީހާއާއި، މުއްސަނދި މީހުން ހަމަހަމަ ކުރަަން އަޅުގަނޑު މަސައްކަތް މި ކުރަނީ.. އަޅުގަނޑަށް ކޮންމެ ރައްޔިތަކު ހަމަހަމަ.. އެންމެ އާދައިގެ ނިކަމެތި މީހާއާއި އެންމެ މުއްސަނދި މީހާ އަޅުގަނޑު ކުރިމަތީ ހަމަހަމަ.. އެއީ އަޅުގަނޑު ގަބޫލު ކުރާ ގޮތުގައި އަދުލުވެރި ވެރިކަމެއް ކުރުމަކީ.. އަދުލުވެރިވުމަކީ އަޅުގަނޑަށް އޮތް ޒިންމާއެއް.. މުސްލިމަކަށް ވީތީ ވެސް..
ރައީސް ވިދާޅުވީ ރަށެއްގައި ރަނގަޅު ބޭންކިން ނިޒާމެއް ނެތުމުން އޭގެ އުނދަގޫތައް ދިމާވާނީ ކުދިކުދި ވިޔަފާރިތައް ކުރާ ފަރާތްތަކާއި މަސްވެރިންނާއި އާންމު ރައްޔިތުންނަށް ކަމަށެވެ. އެކަމަކު އެއީ ފަހަރުގައި މުސަނދި ބަޔަކަށް މާ ބޮޑު މައްސަލައަކަށް ނުވެ ހިނގައިދާނެކަމަށް ރައީސް ވިދާޅުވި އެވެ.
ދ. އަތޮޅަށް ކުރެއްވި ދަތުރުފުޅު ހޯމަ ދުވަހު ނިންމަވާލެއްވުމަށް ހަމަޖެހިފައިވާއިރު ރައީސް ވިދާޅުވީ އެމަނިކުފާނު މާލެ ވަޑައިގަންނަވާނީ އަތޮޅުގެ ހުރިހާ ރަށެއްގައި ބީއެމްއެލް، އޭޓީއެމްގެ ހިދުމަތް ގާއިމުކުރެވިގެން ކަމަށެވެ. މިއީ ސިޓީގެ ދަރަޖަ ދެވިފައިވާ އައްޑޫ ސިޓީގެ ރަށްތަކާއި ފުވައްމުލަކުގެ އަވަށްތައް ނުހިމެނޭ ގޮތަށް އަތޮޅަކުން އެންމެ ފުރަތަމަ ހުރިހާ ރަށެއްގައި އޭޓީއެމްގެ ހިދުމަތް ގާއިމު ކުރެވޭ ފުރަތަމަ ފަހަރުކަމަށް ރައީސް ވިދާޅުވިއެވެ.
މި އަތޮޅުގެ ހުރިހާ ރަށެއްގައި އެ އޮތީ ބޭންކިންގެ ހިދުމަތް ގާއިމުވެފަ.. އަދި މި އަތޮޅު ވެގެން މިދަނީ އެކި ރަށްތަކަށް ހިމެނޭ ރަށްތައް ކިޔާނަމަ.. ފުވައްމުލަކު ނިކިޔަންވެގެން، އައްޑޫ ސިޓީއާއި އެކި ރަށްތަކަށް ހިމެނޭ އަތޮޅަށް ބަލާއިރު އެއް އަތޮޅެއްގެ ހުރިހާ ރަށެއްގައި އޭޓީއެމް ނުވަތަ ބްރާންޗު ގާއިމު ކުރެވިގެންދާ ފުރަތަމަ އަތޮޅަށް މި އަތޮޅުވެގެން މިދަނީ..
ރާއްޖޭގެ މީހުން ދިރިއުޅޭ ކޮންމެ ރަށެއްގެ ތެރެއިން، މިވަގުތު އޭޓީއެމްގެ ހިދުމަތް ނުލިބޭ ހުރިހާ ރަށެއްގައި އެ ހިދުމަތް ގާއިމު ކުރުމަކީ ރައީސް މުއިއްޒުގެ ވައުދުފުޅެކެވެ. އެމަނިކުފާނުގެ އަމާޒަކީ އަހަރެއްގެ ތެރޭގައި ހުރިހާ ރަށެއްގައި ވެސް ހިދުމަތް ފެށުމެވެ.
