މާލޭގެ މަގުތަކުގައި އުޅޭ ބުޅާތައް ބެލެހެއްޓުމަށް ތަރައްގީކުރި ”އޮޅު ހިޔާ“ މާލެ ސިޓީ ކައުންސިލުން ސަރުކަރާއި ރަސްމީކޮށް ހަވާލުކޮށްފިއެވެ.
”އޮޅު ހިޔާ“ އެއް ގާއިމްކުރުމަކީ ރައީސުލްޖުމްހުރިއްޔާ ޑރ މުހައްމަދު މުއިއްޒުގެ ވެރިކަމުގެ ފުރަތަމަ 100 ދުވަހުގެ ތެރޭގައި ހިމެނޭ ވައުދެކެވެ. މި ފެސިލިޓީ ހުޅުވާފައި ވަނީ ހުޅުމާލޭގެ ފޭސް-2 ގައެވެ.
”އޮޅު ހިޔާ“ ހުޅުވުމަށް ބޭއްވި ރަސްމިއްޔާތުގައި ރައީސުލްޖުމްހުރިއްޔާ ޑރ މުހައްމަދު މުއިއްޒު ވިދާޅުވީ މޭޔަރުކަމުގައި ހުންނަވާވެސް މި މަސައްކަތް ކުރެއްވުމަށް މަސައްކަތް ކުރައްވާފައިވާނެކަމަށެވެ. ނަމަވެސް އޭރު ސަރުކާރުގެ އެއްބާރުލުން ނުލިބުމުން މަޝްރޫއު ކުރިއަށް ނުގެންދެވުނީކަމަށް އެމަނިކުފާނު ވިދާޅުވިއެވެ.
”އޮޅު ހިޔާ“ ގެ މައްސަލައިގައި މާލެ ސިޓީ ކައުންސިލާ، ދަނޑުވެރިކަމާއި ދިރޭތަކެއްޗާ ބެހޭ ވުޒާރާ ދެމެދު ކަންބޮޑުވުންތަކެއްވެސް ހުއްޓެވެ.
އެގޮތުން އެނިމަލް ވެލްފެއަރ މިނިސްޓްރީން އާންމު ކޮށްފައިވާގޮތުން އެ މިނިސްޓްރީން ވަނީ މާލެ އޮޅުހިޔާއަށް ބުޅާތައް ގެންދިއުމަށްޓަކައި އެކުލަވާލާފައިވާ އުސޫލުތަކާއި އެކުމުގައި ރާވާފައިވާ އިތުރުކަންކަން އަދި ލަފާތައްވެސް މާލެ ސިޓީ ކައުންސިލާ ހިއްސާކޮށްފައެވެ. އެހެންނަމަވެސް އެ ކައުންސިލުން އެކަމާއި ގުޅޭގޮތުން ކޮމެންޓުކޮށްފައި ނުވާކަމަށާއި، ކައުންސިލުން މިހާރު ވިސްނާފައިވާގޮތަށް މާލެ ސަރަހައްދުގައި އުޅޭ ބުޅާތައް އޮޅުހިޔާއަށް ގެންދިއުމަށް ނުފެންނަކަމަށެވެ.
މިނިސްޓްރީން ބުނެފައިވާގޮތުން އެކުލަވާލާފައިވާ އުސޫލުތަކަށް ރިއާޔަތްނުކޮށް ބުޅާތައް އެތަނަށް ގެންދިއުމުން އެތަކެތީގެ ސިއްހަތަށާއި ދުޅަހެޔޮކަމަށް އަސަރުކުރުމުގެ ފުރުސަތު އޮތްކަމަށެވެ. އަދި ބަޔާންކޮށްފައިވާ އިންތިޒާމުތައް ހަމަނުޖައްސައި ބުޅާތައް ގެންދިއުމުން އަޅާލަންޖެހޭ މިންގަނޑަށް އެކަން ނުކުރެވުމުގެ ނުރައްކާތައް އޮތްކަމަށްވެސް ބުނެފައިވެއެވެ.
ދަނޑުވެރިކަމާއި ދިރޭތަކެއްޗާ ބެހޭ ވުޒާރާއިން ބުނީ، އޮޅުހިޔާ ފެސިލިޓީގެ ރަސްމީ ހުރިހާ ލިޔެކިއުންތަކާއި ލީގަލް އެސެޓްސް ޓްރާންސްފަރ ގެ މަސައްކަތް ނިމުމަށް ފަހު މާލެ ސިޓީ ކައުންސިލުން އެ ވުޒާރާ އާއި ފެސިލިޓީ ރަސްމީކޮށް މިއަދު ހަވާލު ކޮށްފައިވާކަމަށެވެ.
