މި ސަރުކާރަކީ ގާނޫނީ ތަރަހައިން ބޭރުވެފައިވާ ޣައިރު ގާނޫނީ ސަރުކާރެއްކަމަށް އެމްޑީޕީގެ ޗެއަރޕަރސަން ފައްޔާޒް އިސްމާއިލް ވިދާޅުވެއްޖެއެވެ.
އެކްސްގައި ކުރެއްވި ޕޯސްޓެއްގައި ފައްޔާޒް ވިދާޅުވީ، މި ސަރުކާރު ވެރިކަމަށް އައިއިރު ވެސް މިއީ ރައްޔިތުންގެ ބާރުވެރިކަން ކަނޑުވާލައި ހުދުމުހުތާރު ވެރިކަމެއް ކުރުމުގެ މާޒީއެއް އޮތް ބައެއްކަން އެނގޭ ކަމަށާއި، އެމްޑީޕީން މަސައްކަތް ކުރީ ރާއްޖޭގެ ގާނޫނުއަސާސީ އާއި ޑިމޮކްރަޓިކް ނިޒާމުގެ ތެރެއިން ސަރުކާރަށް ފާރަވެރިވެ ޖަވާބުދާރީ ކުރުވުމަށް ކަމަށެވެ.
އެހެންނަމަވެސް، މިއަދު ގާނޫނުއަސާސީ ފުނޑާލައި ތިން ބާރު ވަކިވެފައިވާ ވެރިކަމުގެ ނިޒާމު ޕީއެންސީން ހަރާބުކޮށްފައިވާކަމަށް ފައްޔާޒް ވިދާޅުވިއެވެ.
ފައްޔާޒް ސިފަ ކުރައްވާ ގޮތުގައި ކުރިއަށް އޮތީ ދަތި، އުނދަގޫ، ކަޅު ދުވަސްތަކެކެވެ. އަދި މިވަގުތު ރާއްޖޭގައި ހިންގަމުން މިދަނީ ޣައިރު ގާނޫނީ ދައުލަތެއް ކަމަށްވެސް ފައްޔާޒް ވިދާޅުވިއެވެ.
ވަކިން ހާއްސަކޮށް މުޅި ވެރިކަމުގެ ނިޒާމު ފުނޑާލި މި ސަރުކާރަކީ ގާނޫނީ ތަރަހައިން ބޭރުވެފައިވާ ޣައިރު ގާނޫނީ ސަރުކާރެއްކަމަށްވެސް ފައްޔާޒް ވިދާޅުވިއެވެ.
ފައްޔާޒް އިތުރަށް ވިދާޅުވީ، ރައްޔިތުންނަށް އެ މީހުންގެ ބާރުވެރިކަން ކަށަވަރު ކުރެވޭނެ ނިޒާމީ އިންތިޒާމުތައް މި ޣައިރު ގާނޫނި ސަރުކާރުން ފުނޑުފުނޑުކޮށްފައިވާ ކަމަށާއި، ދެން އޮތީ އެމްޑީޕީގެ ގައުމީ މަޖިލީހުން 10 ޑިސެމްބަރު 2024 ގައި ފާސްކޮށްފައިވާ ގަރާރާ އެއްގޮތަށް އަމަލުކުރުން ކަމަށެވެ. އެއީ މުޅި ވެރިކަމުގެ ނިޒާމު ހައިޖެކް ކުރުމަށް ކޮށްފައިވާ ކަންކަމާ މެދު މެދުކެނޑުމެއްނެތި އިހުތިޖާޖުކޮށް އަޑުއުފުލުންކަމަށްވެސް ފައްޔާޒް ވިދާޅުވިއެވެ.
ފައްޔާޒް ވިދާޅުވީ، ރައްޔިތުންގެ ބާރުވެރިކަން އަލުން އިއާދަ ކުރުމަށް އެމްޑީޕީން ސިލްސިލާކޮށް ކުރިއަށް އޮތް ދުވަސްތަކުގައި ހަރަކާތްތައް ހިންގާނެ ކަމަށާއި، މި ހަރަކާތްތަކުގައި ރާއްޖޭގެ ހުރިހާ ސިޔާސީ ޕާޓީއަކާއި، މަދަނީ ޖަމިއްޔާތަކާއި، ޑިމޮކްރަސީގެ ދިފާއުގައި މަސައްކަތް ކުރައްވާ އެންމެހާ ފަރުދުންނަށް ދައުވަތު އަރުވާ ކަމަށެވެ.
ސުޕްރީމް ކޯޓުގެ ފަނޑިޔާރުންގެ އަދަދު މަދު ކުރަން މަޖިލީހުން ވަނީ ބިލެއް ފާސްކޮށްފައެވެ. މީގެ އިތުރުން، ގޮނޑި ގެއްލޭ އިސްލާޙުގެ މައްސަލައިގެ އަޑުއެހުމާ ގާތްވެފައިވަނިކޮށް ސުޕްރީމް ކޯޓުގެ 3 ފަނޑިޔާރަކު ވަނީ ސަސްޕެންޑުވެސް ކޮށްފައެވެ. އަދި އެ ފަނޑިޔާރުންގެ ސުލޫކީ މައްސަލަތަކެއްވެސް މިހާރު ދަނީ ބަލަމުންނެވެ.
