އަސާސީ ކަންކަމަށްޓަކައި ހިންގާ މަޝްރޫއުތައް ބިޑަކާ ނުލައި ހަވާލު ކުރެވޭގޮތަށް ދައުލަތުގެ މާލިއްޔަތު ޤަވާއިދު އިސްލާޙުކޮށްފިއެވެ.
ދައުލަތުގެ މާލިއްޔަތުގެ ގަވާއިދަށް 3 ވަނަ އިޞްލާޙު ގެނައުމުގެ ގަވާއިދު ސަރުކާރުގެ ގެޒެޓުގައި ޝާއިއުކޮށްފައިވާއިރު، ޤަވާއިދަށް ގެނައި އިސްލާޙުގައިވާގޮތުން އާންމު ރައްޔިތުންގެ އަސާސީ ބޭނުންތަކާއި، ދިރިއުޅުމުގެ ފެންވަރު ރަނގަޅުކޮށްދޭ ބާވަތުގެ މަޝްރޫޢުތަކާއި ، ސަލާމަތީ ޚިދުމަތްތަކަށް ޚާއްޞަ މަޝްރޫޢުތަކުގެ ގޮތުގައި ކަމާގުޅޭ ދައުލަތުގެ އޮފީހަކުން މިނިސްޓްރީއަށް ހުށަހަޅައި މިނިސްޓްރީން ކަނޑައަޅާ އުސޫލެއްގެ ދަށުން ވަޒީރުންގެ މަޖިލީހުން ނުވަތަ ވަޒީރުންގެ މަޖިލީހުގެ ކޮމިޓީއަކުން ކަނޑައަޅާ މަޝްރޫޢުތައް ”ސިންގަލް ސޯސް ޕްރޮކިއުމަންޓް“ ގެ އުސޫލުން ކުރިއަށް ގެންދެވިދާނެއެވެ.
ސިންގަލް ސޯސް ޕްރޮކިއުމަންޓަކީ ވާދަވެރިކަމަށް ހުޅުވާނުލައި، ސީދާ ވަކި ފަރާތަކުން ތަކެތި ނުވަތަ ޚިދުމަތް ހޯދުން ނުވަތަ މަސައްކަތެއް ކުރުވުމެވެ.
މި އިސްލާޙަށް ފާޑުވިދާޅުވެ ކުރީގެ ފިނޭންސް މިނިސްޓަރ އިބްރާހިމް އަމީރު ވިދާޅުވީ، ދައުލަތުގެ މާލިއްޔަތު ގަވާއިދަށް ގެނެސްފައިވާ މި ބަދަލަކީ މަކަރުވެރި، ހީލަތްތެރި ވިސްނުމަކުން ރައީސުލްޖުމްހޫރިއްޔާ ބޭނުންފުޅުވާ ބަޔަކަށް މަޝްރޫއުތައް ހަވާލު ކުރެއްވުމަށް ގެނެސްފައިވާ ބަދަލެއް ކަމަށެވެ. އަދި މިއީ ދައުލަތުގެ ޕްރޮކިއުމެންޓް ނިޒާމްގެ މަޤްސަދުކަމުގައި މާލިއްޔަތު ގަވާއިދުގެ 10.01 ވަނަ މާއްދާގައި ބުނެފައިވާ ހުޅުވާލެވިފައިވާ ވާދަވެރި ޕްރޮކިއުމެންޓްގެ މަފްހޫމް އާއި ޚިލާފް ބަދަލެއްކަމަށްވެސް އަމީރު ވިދާޅުވިއެވެ.
މީގެ އިތުރުން މިއީ ޔޫއެންސީއޭސީ އަދި ވޯލްޑް ޓްރޭޑް އޮގަނައިޒޭޝަން ގެ އުސޫލުތަކާވެސް ޚިލާފު ބަދަލެއްކަމަށް އަމީރު ވިދާޅުވިއެވެ.
އަމީރު ވިދާޅުވާ ގޮތުގައި މި ބަދަލުގެ ސަބަބުން މި ސަރުކާރުގެ ކޮރަޕްޝަނާއި ވައްކަން އިތުރު ގިޔަރެއް މައްޗަށް ޖެހިލައި، ރާއްޖޭގެ ޕްރައިވެޓް ސެކްޓަރަށް ހުރި ގިނަ ފުރުސަތުތައް ބަންދުވާނެއެވެ. އަދި ކޮރަޕްޝަން އިންޑެކްސްގައި ރާއްޖެ އިތުރަށްފަހަތަށް ދިޔުމަކީ ގާތްކަމެއްކަމަށްވެސް އަމީރު ވިދާޅުވިއެވެ.
