ގއ. ދާންދޫ، ގޯލްޑްލީފް، ހާރިސް ޢަބްދުލްޣަފޫރުއަށް ތޫނުއެއްޗަކުން ޙަމަލާދިން މައްސަލައާ ގުޅޭ އަޑުއެހުމެއް ބުރާސްފަތި ދުވަހު ސުޕްރީމް ކޯޓުގައި ކުރިއަށް ގެންގޮސްފިއެވެ.
މި މައްސަލައިގައި ދައުލަތުން ދައުވާ ކުރީ ޏ. ފުވައްމުލައް، ހޯދަޑު، ހިލްޓަން ޔާމީން ރަޝީދުގެ މައްޗަށެވެ. އޭނާގެ މައްޗަށް ދައުލަތުން ކުރީ ތޫނުއެއްޗެއް ބޭނުންކޮށްގެން ޤަޞްދުގައި މީހަކު މެރުމުގެ ކުށުގެ ދަޢުވާއެވެ. އެ ދައުވާ ސާބިތުނުވާކަމަށް 29 ޑިސެންބަރު 2022 ދުވަހު ކްރިމިނަލް ކޯޓުން ވަނީ ޙުކުމް ކޮށްފައެވެ.
އެހެންކަމުން އެ މައްސަލަ 12 ފެބްރުވަރީ 2023 ދުވަހު ދިވެހިރާއްޖޭގެ ހައިކޯޓުގައި ދައުލަތުން ވަނީ އިސްތިއުނާފު ކޮށްފައެވެ.
މި މައްސަލައިގައި ދައުލަތުގެ މުހިއްމު ދެ ހެކިވެރިއެއްގެ ހެކިބަސް ނެގިފައެއް ނުވެއެވެ. އެގޮތުން މީގެ ކުރިން ބޭއްވި އަޑުއެހުމެއްގައި ދައުލަތުން ވަނީ މައްސަލަ ސާބިތުކުރުމަށް ބޭނުންވާ މުހިއްމު ދެ ސިއްރު ހެކިވެރިއަކު ހާޒިރު ކުރުމަށްފަހު ފުރުސަތަކަށް އެދިފައެވެ.
އަދި މި މައްސަލަ ސާބިތުނުވި މައިގަނޑު އެއް ސަބަބަކީ މައްސަލައިގެ ޑީއެންއޭ ޕްރޮފައިލް ބަލައިނުގަތުމަށް ނިންމުންކަމަށް ދައުލަތުން ފާހަގަކުރެއެވެ. އެ ހެކި ބަލައިނުގަތުމަށް ނިންމީ ޔާމީން ރަޝީދުގެ ޑީއެންއޭ ޕްރޮފައިލްގެ ގޮތުގައި ބޭނުންކޮށްފައިވަނީ ފުލުހުންގެ ޑޭޓާބޭސްގައި ހުރި ޑީއެންއޭ ޕްރޮފައިލްއެއް މި މައްސަލައިގައި ނެގުނު ސާމްޕަލްތަކާ އަޅާކިއުމަށް ބޭނުންކޮށްފައިވާތީއެވެ. އެގޮތުން އެއީވެސް ޔާމީން ރަޝީދުއާއި ހާރިސްއާ ދެމެދު ހިނގި މާރާމާރީއެއްގެ މައްސަލައެއްގައި ޔާމީނަކީ އަނިޔާވި ފަރާތް ކަމަށް ބަލައިގެން އޭރު ނެގިފައިވާ ޑީއެންއޭ ޕްރޮފައިލްއެކެވެ.
މި މައްސަލަ ހައިކޯޓުގައި އިސްތިއުނާފުކޮށްފައިވާއިރު، ދައުލަތުން ވަނީ އޭނާ ޝަރީއަތް ނިމެންދެން ބަންދު ކުރުމަށް އެދިފައެވެ. ނަމަވެސް 20 ނޮވެމްބަރު 2024 ގައި ހައިކޯޓުން ނިންމީ ޔާމީން ރަޝީދުގެ ފަރާތުން މުޖުތަމައުގެ ސަލާމަތަށް އޮތް ނުރައްކަލެއް އަދި ހެކިންނަށް ނުފޫޒު ފޯރުވޭގޮތެއް ބުނެދެވިފައިނުވާ ކަމަށެވެ.
މި މައްސަލައިގައި ބުރާސްފަތި ދުވަހު ބޭއްވި އަޑުއެހުމުގައި ދެފަރާތުންވެސް އިސްތިއުނާފީ ނުކުތާތަކާ ގުޅޭގޮތުން ވާހަކަ ދައްކާފައިވެއެވެ. ދެން އޮންނާނީ މި މައްސަލައިގައި ގޮތެއް ކަނޑައެޅުމުގެ އަޑުއެހުމެވެ.
ސުޕްރީމް ކޯޓުގައި މި މައްސަލަ ބައްލަވަނީ ފަނޑިޔާރު އަލީ ރަޝީދު ހުސައިން، ފަނޑިޔާރު ޑރ މުޙައްމަދު އިބްރާހިމް އަދި ފަނޑިޔާރު އައިޝާ ޝުޖޫން މުޙައްމަދެވެ.
މައްސަލައިގެ ފަސްފަހަތް:
ހާރިސް މަރާލާފައިވަނީ 29 ސެޕްޓެންބަރު 2017 ދުވަހުގެ 21:56 އެހައިކަށްހައިއިރު، ހުޅުމާލެ ހާފްވޭ ހައުސް ކައިރީގައެވެ.
ހާރިސް މަރުވިއިރު އަންބަކާއި ދަރިއަކު ދުނިޔޭގައި ތިބި ކަމަށް މަޢުލޫމާތު ލިބެއެވެ.
މަޢުލޫމާތު ލިބިފައިވާ ގޮތުގައި ހާރިސްއަކީ ހުޅުމާލޭ ހާފްވޭ ހައުސްގައި މަސްތުވާތަކެތީގެ ވަބާއަށް ފަރުވާ ހޯދަމުންދިޔަ ޒުވާނެކެވެ. ހާރިސްއަށް ވަޅިން ހަމަލާ ދިފައިވަނީ، އާއިލީ ދުވަހަށް ބޭރަށް ދިއުމަށްފަހު އެނބުރި ހާފްވޭ ހައުސްއަށް ދަނިކޮށް، ހާފްވޭ ހައުސް ކައިރިންނެވެ.
