ރާއްޖޭގެ އެކި ކަންކޮޅުތަކުގައި ކިޑްނީގެ މައްސަލަތަކުގެ ފަރުވާޔަށް ބޭނުންޖެހިފައިވާ ފަރާތްތަކުގެ ކެކުޅުން އިހްސާސުކުރަންވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިޒްގެ އަނބިކަނބަލުން މެޑަމް ސާޖިދާ މުހައްމަދު ވިދާޅުވެއްޖެއެވެ.
މެޑަމް މިފަދައިން ވިދާޅުވެފައިވަނީ، ހ.އ އިހަވަންދޫގެ އާމިނާދިޔޯ ސިއްހީ މަރުކަޒުގައި ޑައިއާލަސިސް ހިދުމަތް އިފްތިތާހުކޮށްދެއްވުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.
މެޑަމް ވިދާޅުވީ، ރައީސްގެ ހާއްސަ އިސްނެންގެވުމުގެ މަތިން ޑައިއާލަސިސް ސެންޓަރުތައް ދިވެހިރާއްޖޭގެ އެކި ކަންކޮޅުތަކުގައި ގާއިމުކުރަމުންދަނީ ދިވެހިރާއްޖޭގައި މި ފަރުވާއަށް ބޭނުންވާ ރައްޔިތުންގެ އަދަދު ހުރިގޮތުން ކަމަށެވެ. އެއީ، ތަފާތު ހިސާބުތަކުން ދައްކާގޮތުގައި ހ.އ އަތޮޅު ހޮސްޕިޓަލުން 11 މީހަކު، ހ.ދ ކުޅުދުކުށީގެ ހޮސްޕިޓަލުން 21 މީހަކު، އައިޖީއެމްއެޗްއިން 138 މީހަކު، ހުޅުމާލެ ހޮސްޕިޓަލުން 69 މީހަކު އަދި ރާއްޖޭގެ އެކި ކަންކޮޅުތަކުގައި ޑައިއާލަސިސް ހިދުމަތަށް ބޭނުންވާ ރައްޔިތުން ގުނާލެވޭ ކަމަށް މެޑަމް ވިދާޅުވިއެވެ.
ހ.އ އިހަވަންދޫގެ ކައުންސިލްގެ ރައީސް އަހްމަދު ސޮބާހުގެ ފަރާތުން، އެ ރަށުގައި ޑައިއާލަސިސްގެ ފަރުވާ 9 މީހުން ބޭނުންވާ ކަމުގެ މައުލޫމާތުވަނީ ލިބިފައިކަމަށް މެޑަމް ސާޖިދާ ވިދާޅުވިއެވެ.
ޑައިއާލަސިސް ޓްރީޓްމެންޓުގެ ސަބުބުން ކުރިމަތިވާ ހަރަދުގެ މައްސަލައާއި، އެހީތެރީން ހޯދުމުގެ މައްސަލައާއި އަދި މާލޭގައި ތިބުމުން ފަދަ މައްސަލަ ދިމާވާނެ މީހުން ގިނަ ކަމީ ޔަގީން ކަމެއްކަން މެޑަމް ފާހަގަކުރެއްވިއެވެ.
މި ޑައިއާލަސިސް ޓްރީޓްމެންޓް ސެންޓަރު އެޅުމުން މިިފަދަ މައްސަލަތަކާއި ކުރަމަތިލާން ޖެހޭ މީހުން، ރަށުގައި ތިއްބަވައިގެން މުހިންމު އަދި އަގުހުރި ފަރުވާއެއް ލިބުމުގެ މަގުފަހިވެގެންދާނެކަމަށެވެ.
މެޑަމް ވަނީ މިފަދަ ކަމެއް މަގުފަހިވުމުން، މި ކަމުގެ އުފަލުގައި ހިތާއި ރޫހުން ބައިވެރިވާ ކަމަށާއި ރައްޔިތުންނަށް ހެޔޮއެދުންތަށް އަރިސްކުރުމުގެ އިތުރުން އަދުގެ ސަރުކާރަށް ވަނީ ޝުކުރު އަދާ ކުރައްވައިފައެވެ.
