މިހާރު ނެރެފައިވާ ލިސްޓަކީ ނުފޫޒުން އެއްކިބާވެގެން ނެރެފައިވާ ލިސްޓެއް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
އިއްޒުއްދީން ފާލަން ހުޅުވުމުގެ ރަސްމިއްޔާތުގައި ރައީސް ވިދާޅުވީ މިހާރު ކުރީގެ ސަރުކާރުން އިއުލާނު ކުރި ލިސްޓުގައި ހުރި އެކިއެކި މައްސަލަތައް ބަލައި، އޭސީސީން ފާހަގަކޮށްފައިވާ ކަންކަން ބަލައި، އެ ސްރުކާރުން އިއުލާނުކުރި ޝަރުތުތަކަށް ޕޮއިންޓު ދޭނެ އުސޫލާއި، އޭގަ ހުރި ގޮތަށް ބައްލަވައި ލިސްޓު ނެރެފައި ކަމަށެވެ. ރައީސް ވިދާޅުވީ އެ ރައްޔިތަކަށް ލިބިފައިވާ ގޯއްޗެއް ނުވަތަ ފްލެޓެއް އަތުނުލައްވާނެ ކަމަށް ވައުދުވެވަޑައިގެންފައިވާ ކަމަށެވެ.
އެ ވައުދުގެ މަތީގައި އެދުވަހުވެސް، މިއަދުވެސް އަދި މާދަންވެސް ހުންނަވާނެ ކަމަށް ރައީސް ވިދާޅުވިއެވެ. ލިސްޓު ނިކުތްއިރު ސަރުކާރުން ނެރުނު ލިސްޓުން ބަޔަކު މަދުވެފައިވާ ކަމަށް ރައީސް ވިދާޅުވިއެވެ. ލިސްޓު އިއުލާނު ކުރިއިރު ނުހޮވުނު ސަބަބުތައް އެމީހެއްގެ މައުލޫމާތުގެ ތެރޭގައި ހުންނާނެ ކަމަށް ރައީސް ވިދާޅުވިއެވެ.
”އަޅުގަނޑު ދޭނެ ޔަގީންކަމަކީ، އެންމެ ބޮޑު ޔަގީން ކަމަކީ، މި ލިސްޓު ހެދުމުގައި ޒައްރެއްގެ މިންވަރުގެވެސް ނުފޫޒެއް ފޯރުވައިފައި އެއްވެސް ފަރާތަކުން ނޯންނާނެ ކަން. މިއީ ނުފޫޒުން އެއްކިބާވެގެން ނެރެފައިވާ ލިސްޓެއް. މިއީ ރާއްޖޭގައި އަޅުގަނޑު ހިތުން، އަޅުގަނޑު ހަމަ ޔަގީނުންވެސް ގެދޮރުވެރިކަމުގެ ދާއިރާގެ މައުލޫމާތު އެނގެން ފެށި ހިސާބުން އަދި އެކިއެކި ހައިސިއްޔަތުތަކުން އެންމެ ޖޫނިއަރ ލެވެލުން ފެށިގެން ސަރުކާރުގެ ކަމާބެހޭ ދާއިރާގައި އުޅެން ފެށި ހިސާބުންވިޔަސް ނުފޫޒެއް ނުފޯރުވައި ގެދޮރު ލިބޭނެ މީހުންގެ ލިސްޓެއް ނެރުނު ފުރަތަމަ ފަހަރު“
ރައީސް ވިދާޅުވީ މި ލިސްޓުގައި ނުފޫޒެއް ނޯންނާނެ ކަމަށާއި، އެ ޔަގީންކަން ދިވެހި ހުރިހާ ރައްޔިތުންނަށް އަރުއްވާ ކަމަށެވެ. އެކި ސަބަބުތަކާއި ހުރެ ލިސްޓަށް ނޭރި ރައްޔިތުން، އެ ސަބަބުތައް އޮޅުންފިލުއްވާ ނުވަތަ ޝަކުވާއެއް އޮތް ނަމަ އެކަން ހުށައެޅުމުގެ 30 ދުވަހުގެ ފުރުސަތެއް މިހާރު ހުޅުވާލައިފައިވާ ކަމަށެވެ. އަދި ރަމަޟާން މަސް ނިމެންދެން އެ ފުރުސަތު އޮންނާނެ ކަމަށް ރައީސް ވިދާޅުވިއެވެ.
ރައީސް އިތުރަށް ވިދާޅުވީ ގަސްތުގައި އެއްވެސް މީހަކު އުނިކޮށްފައި ނުވާނެ ކަމަށެވެ. މި ސަރުކާރަކީ ދިވެހި ހުރިހާ ރައްޔިތުންނަށްވެސް އެރައްޔިތެއްގެ ހައްގުތައް އަދި އޭގެއިތުރަށް ވެސް ކަންކަން ފުރިހަމަ ކޮށްދިނުމުގައި ޝައުގުވެރިކަން ހުރި، ލޯތްބާއޮ ކުލުނާއިއެކު އަދި އިންސާފާއި އަދުލުވެރިކަމާއެކު ކޮންމެ ރައްޔިތަކަށް ހިދުމަތް ކުރަން އައި ސަރުކާރެއް ކަމަށެވެ.
