ގެދޮރުވެރިޔާ ސްކީމުގެ ދަށުން މިނިސްޓަރ އޮފް ހަޔަރ އެޑިއުކޭޝަން، ލޭބަރ އެންޑް ސްކިލްސް ޑެވެލޮޕްމެންޓް ޑރ. އަލީ ހައިދަރު އަހްމަދަށް ލިބުނު ފްލެޓް ދޫކޮށްލުމަށް ނިންމަވައިފިއެވެ.
މިކަމާ ގުޅޭގޮތުން މިނިސްޓަރު މިއަދު ކުރެއްވި އެކްސްގައި ވިދާޅުވެފައިވަނީ، ”މިއަދު އިއުލާންކުރި ފްލެޓް ލިސްޓުގައި އަޅުގަނޑު ކޯ-އެޕްލިކެންޓެއްގެ ހައިސިއްޔަތުން ހުރެ، އަޅުގަނޑުގެ އަނބިކަނބަލުން މަރިޔަމް ތައުފީގާއަށް 3 ކޮޓަރީގެ ފްލެޓެއް ލިބުމަށް ވަނީ ހަމަޖެހިފައި“ ކަމަށެވެ.
އެހެންނަމަވެސް، އެމަނިކުފާނު ފާހަގަކުރެއްވި ގޮތުގައި، އެމަނިކުފާނު ހުންނެވި މަގާމުގެ ސަބަބުން، އެމަނިކުފާނާއި އެމަނިކުފާނުގެ އަނބިކަނބަލުންނަށް ލިބެން ހަމަޖެހިފައިވާ ފްލެޓަށް އުޒުރުވެރިވާ ކަމަށް ނިންމަވާފައިވެއެވެ.
މިނިސްޓަރުގެ އެކްސްގައި އިތުރަށް ފާހަގަކުރައްވާފައިވަނީ، އެމަނިކުފާނާއި އެމަނިކުފާނުގެ އަނބިކަނބަލުން ދެކޭގޮތުގައި ގެދޮރުވެރިޔާ ސްކީމުގެ ދަށުން އެބޭފުޅުންނަށް ލިބުނު ފްލެޓް އެއަށްވުރެ ބޮޑަށް ހައްގުވާ އެތައް ފަރާތެއް ތިބިކަމަށެވެ. މިއީ އެމަނިކުފާނުގެ މި ނިންމެވުމަށް މަގުފަހިކުރި އެއް ސަބަބު ކަމަށް ވެސް ބެލެވެއެވެ.
