ރޯދަމަށް ހާއްސަކޮށް ބާޒާރުގައި ސަޕްލައި ޗެއިންގެ މައްސަލައެއް އުޅޭނަމަ އެއަށް އެސްޓީއޯއިން އެޑްރެސް ކުރާނެ ކަމަށް އެސްޓީއޯގެ މެނޭޖިންގ ޑިރެކްޓަރ ޝިމާދު އިބްރާހިމް ވިދާޅުވެއްޖެއެވެ.
ރޯދަޔަށް ތައްޔާރުވުމުގެ މައުލޫމާތު ދިނުމަށް ބޭއްވި ޕެނަލްގައި ޝިމާދު ވިދާޅުވީ އެސްޓީއޯއިން ރޯދަޔަށް ތައްޔާރުވުމުގެގޮތުން މާލެއާއި ބައެއް ރަށްރަށުގައި ރޯދަމަހު ބަދިގެއަށް ބޭނުންވާ ތަކެތި ފޯރުކޮށްދިނުމަށް ވެއަރ ހައުސް ސޭލްއެއް ބޭއްވި ކަމަށެވެ. އެއީ ރޯދަޔަށް ބަދިގެ ސާމާނުތައް އަގުހެޔޮކޮށް ފޯރުކޮށް ދިނުމަށް ބޭއްވި ސޭލެއް ކަމަށެވެ. އެ ސޭލަށް ވަރަށް ބޮޑު ތަރުހީބެއް ލިބުނު ކަމަށާއި ޝިމާދު ވިދާޅުވިއެވެ. އެއާއި ގުޅިގެން އިތުރު ސްޓޮކްތަކެއްވެސް ގެންނަން ޖެހުނު ކަމަށް ޝިމާދު ވިދާޅުވިއެވެ.
އިކޮނޮމިކް މިނިސްޓްރީން އެސެންޝިއަލް އައިޓަމް ތަކުގެ ލިސްޓެއް އެކުލަވާލައިފައިވާއިރު ރަމަޟާން މަހަށް ހާއްސަކޮށްގެން މިނިސްޓްރީއާއެކު އެސެންޝިއަލް އައިޓަމް ތަކުގެ ލިސްޓު ރިވިއުކޮށްފައިވާ ކަމަށް ޝިމާދު ވަނީ ވިދާޅުވެފައެވެ.
”ކޮންމެ ހަފްތާއަކު މިނިސްޓަރު އިންނަވައިގެން ލިސްޓު ތަކެއް އަޅުގަނޑުމެން ރިވިއު ކުރިން. އޭގެތެރޭގައި ބާޒާރުތަކަށް މިއަންނަ އަދި އަގުތަކަށް މިއަންނަ ބަދަލު ދެނެގަތުމާއި. މުދާތައް މަދުވަނީ ކޮން ދިމާލެއްގައި ކޮން މުދަލެއްތޯއާއި. ކޮންކަހަލަ ގައުމުތަކުންތޯ މުދާތައް ގެނެވޭނީ ބަލައި އަޅުގަނޑުމެން ބަައްދަލުވުންތަކެއް ބޭއްވިން. އޭގެ އެއްޗިއްސައް ބަލައިފައި އަޅުގަނޑުމެން ރޯދައިގެން ކުރިންވެސް ބައެއް ޝިޕްމެންޓުތައް ގެނެސްފިން. ހާއްސަކޮށް ފިޔާ އަލުވި ބިސް. މީޗިއްސަކީ އެސްޓީއޯއަށް އާއްމުކޮށް އެތެރެކުރާ މުދަލެއް ނޫން“
ޝިމާދު ވިދާޅުވީ އެސްޓީއޯގެ މި ރޯލަކީ ވިޔަފާރިވެރިންނަށް ދަތިވާ ދުވަސްކޮޅެއްގައި، މާކެޓަށް އަންނަ ބަދަލުތަކާއިއެކު، އަގު ބޮޑުވާ ފަހަރުތަކުގައި އަގު ކުޑަ ކުރަން އެހީވުމާއި އަދި ސަޕްލައި ޗެއިންގެ މައްސަލައެއް އުޅޭނަމަ އެއަށް އެޑްރެސް ކުރުން ކަމަށެވެ. އެމްޑީ ވިދާޅުވީ މިދިޔަ ރޯދަ މަހު ސިމާވި އެންމެ ބޮޑުު އެއް ގޮންޖެހުމަކީ ދުނިޔޭގެ ބާޒާރުގައި ފިޔާ ލިބުމަށް އައި ދަތިތައް ކަމަށެވެ. އެދުވަސްވަރު ބައެއް ގައުމުތަކުން ފިޔާ އެކްސްޕޯޓް ކުރުން ވަރަށް ބޮޑަށް މަޑުޖައްސާލި ކަމަށާއި އަދި އެހެން ބައެއް ގައުމުތަކުން ފިޔާ އެކްސްޕޯޓް ކުރުން ހުއްޓާވެސްލި ކަމަށެވެ.
ޝިމާދު ވިދާޅުވީ އޭރުވެސް މުޅި ރޯދަމަހު މެދުކެނޑުމެއް ނެތް ފިޔާ އެތެރެކުރަމުން ދިޔަކަމަށެވެ. އެހެންކަމުން މި ރޯދަ މަހުވެސް ބާޒާރުގައި ފިޔާ، އަލުވި އަދި ބިސް މަދުވެ ދާނެ ކަމަށް އަންދާޒާކޮށްފައިވާ ކަމަށް ޝިމާދު ވިދާޅުވިއެވެ. މީގެއިތުރަށް އާއްމުން ބޭނުންކުރާ ބައެއް ތަކެތި ތެރޭގައި ހިމެނޭ ކާށި އަދި ލުނބޯއަކީ ބަޒާރުގައި ހާއްސަކޮށް މަދުވެސް ނުވަތަ އަގުތައް އަރައިގެންދާ ބާވަތުގެ މުދަލަށް ވާތީ ކާށިވެސް އަދި ލުނބޯވެސް ގެނެސްފައިވާ ކަމަށެވެ.
