ސަރުކާރުގެ މަޤާމެއްގައި ހުރުމަކީ ފްލެޓު ނުލިބޭންޖެހޭ ސަބަބެއް ނޫންކަމަށް ރައްޔިތުންގެ މަޖިލީހުގެ މައްޗަންގޮޅީ އުތުރު ދާއިރާގެ މެންބަރު އިބްރާހިމް މުހައްމަދު ވިދާޅުވެއްޖެއެވެ.
އޭނާ އެފަދައިން ވިދާޅުވީ ސަންގުޓީވީގެ ޚަބަރަށްފަހު ޕްރޮގްރާމްގައި ވާހަކަ ދައްކަވަމުންނެވެ.
މެމްބަރު ވިދާޅުވީ، ފްލެޓް ލިސްޓު ދޫކުރާ އުސޫލުތަކާއި މާކްސް ޝީޓުތަކަކީ އެމްޑީޕީގެ ސަރުކާރުގައި އެމްޑީޕީން އެކުލަވާލާފައިވާ އުސޫލުތަކެއް ކަމަށާއި، އެ އުސޫލުތަކަކީ އަލަށް މި ސަރުކާރުން އުފެއްދި އުސޫލުތަކެއް ނޫން ކަމަށެވެ.
އެމްޑީޕީގެ ވެރިކަން ނިމެން ކައިރިވެފައިވަނިކޮށް 4000 ފްލެޓަށް އިއުލާނު ކުރުމުން އެތައް ބަޔަކު ކުރިމަތިލިކަން ފާހަގަ ކުރައްވައި އޭނާ ވިދާޅުވީ، 4000 މީހުންނަށް ފްލެޓު ލިބޭކަމަށް ކަނޑައެޅުމުން ނުލިބޭ އެތައް ބަޔަކުވެސް ތިބޭނެ ކަމަށެވެ.
މި ސަރުކާރުން މިހާރު ޝާއިއުކޮށްފައި އެވަނީ މިދިޔަ ސަރުކާރުގައި އެކުލަވާލި މިންގަނޑާއި އުސޫލުގެ ދަށުން އެކުލަވާލާލާފައިވާ ލިސްޓެއްކަން ފާހަގަ ކުރައްވައި މެމްބަރު ވިދާޅުވީ، އެމްޑީޕީގެ މެމްބަރުންނަށް ހެޔޮ އެއްވެސް ގޮތެއް ނެތް ކަމަށެވެ.
އޭގެ މިސާލެއްގެ ގޮތުން މެމްބަރު ވަނީ މިނިސްޓަރ އަލީ ހައިދަރަށް ފްލެޓު ލިބިވަޑައިގެން އެންމެ ފަހުން ފްލެޓު ދޫކޮށްލެއްވިކަންވެސް ފާހަގަ ކުރައްވާފައެވެ.
ނަމަވެސް ސަރުކާރުގެ ތެރޭގައި ހުންނަ މީހަކަށްވެސް ދިވެހި ރައްޔިތަކަށް ލިބެންޖެހޭ ޙައްޤުތައް ލިބެންވާނެކަމަށް މެމްބަރު ވިދާޅުވިއެވެ.
މެމްބަރު އިތުރަށް ވިދާޅުވީ، މި ސަރުކާރުގައި ބޯހިޔާވަހިކަމުގެ މައްސަލަ ޙައްލުވާނެކަމަށް ޔަޤީން ކުރައްވާ ކަމަށާއި، ރަސްމާލެ މަޝްރޫއު ނިމިގެންދާއިރު، 65,000 ގޭބިސީއަކަށް ގެދޮރުވެރިކަން ލިބިގެންދާނެކަމަށެވެ.
މި ދިޔައީ އަސްލު ބައެއްގެ އިންތިޒާރަށް ނިމުމަށް އައިސް ރަނގަޅު ޙައްލެއް ލިބިގެން އެ ދިޔައީ
މީގެ އިތުރުން، ކުރީގެ ރައީސް އަބްދުﷲ ޔާމީނުގެ ސަރުކާރުގައި ދިން ފްލެޓުތައް އެމްޑީޕީގެ ވެރިކަމުގައި އައިސް ކެންސަލްކުރިކަމަށްވެސް މެމްބަރު ވިދާޅުވިއެވެ. އަދި އޭރުވެސް އުސޫލުން ބޭރުން އެމްޑީޕީން ބޭނުން ބަޔަކަށް ފްލެޓު ދީފައިވާކަމަށް މެމްބަރު ވިދާޅުވިއެވެ.
ބޯހިޔާވަހިކަމަށް ހާއްސަ ސަމާލުކަމެއް ދީ، ދައުރު ނިމުމުގެ ކުރިން އެންމެ ގިނަ ހައުސިން މަޝްރޫއުތައް ހިންގައި މައްސަލަ ހައްލު ކުރުމަކީ މި ސަރުކާރުގެ ރިޔާސީ ވައުދެކެވެ. އެގޮތުން ހިނގަމުން މިދާ 2025 ވެގެން ދާނީ ރައީސް މުއިއްޒު ވިދާޅުވި ގޮތުގައި އެންމެ ގިނަ ހައުސިންއާއި ގުޅުން ހުރި ޕްރޮޖެކްޓުތައް ހިނގާނެ އަހަރަށެވެ.
