ރައްޔިތުންގެ މަޖިލީހުގެ މާލިއްޔަތު ކޮމިޓީއާއި، ގައުމީ ސަލާމަތީ ހިދުމަތްތަކާއި ބެހޭ ކޮމިޓީން ހިތަދޫ މެދު ދާއިރާގެ މެމްބަރު އަހުމަދު އަޒާން މަރުޒޫގު ވަކިކޮށް އެ ކޮމިޓީތަކުގައި ސަރުކާރުގެ މައި ޕާޓީ ތަމްސީލު ކުރާނެ އެހެން މެމްބަރުން އައްޔަނުކޮށްފިއެވެ.
މެމްބަރުންގެ ގޮނޑި ގެއްލޭ މައްސަލައިގައި ސުޕްރީމް ކޯޓުގެ އަޑުއެހުންތައް ނިމި ވަގުތީ އަމުރު ނެރެން ތައްޔާރުވެފައި ވަނިކޮށް ފަނޑިޔާރުންގެ ބެންޗު 7 އިން 5 އަށް ދަށް ކުރުމަށް ނިންމައި ރައްޔިތުންގެ މަޖިލީހަށް ހުށަހެޅި ބިލަށް އަޒާން ވަނީ ދެކޮޅު ހައްދަވާފަ އެވެ. އަޒާން ގަބޫލު ކުރާ ގޮތުގައި ސުޕްރީމް ކޯޓުގައި އަޑުއެހުންތައް ކުރިޔަށް ދަނިކޮށް، އެފަދަ ބިލެއް ހުށަހަޅައި ދެ ފަނޑިޔާރަކު ވަކި ކުރުމަކީ ގާނޫނުއަސާސީއާއި ހިލާފުކަމެކެވެ.
ބިލަށް ވޯޓަށް އެހި ޖަލްސާގައި އަޒާން ވަނީ ވިޕްލައިނާއި ހިލާފުވެ، ރޯލްކޯލް ކުރިޔަށް ދަނިކޮށް ތަޅުން ދޫކުރައްވައި ވަޑައިގެންފަ އެވެ. އަދި އޭގެ ފަހުން ބިލާއި ދެކޮޅުކަން ހާމަކޮށް ބަޔާނެއް އާންމު ކުރެއްވިއެވެ. މި މައްސަލަ ގޯސްވެ، ޕީއެންސީގެ ޕާލިމަންޓްރީ ގުރޫޕުގެ މެމްބަރުން ތިއްބަވާ ވަޓްސްއަޕް ގުރޫޕުން ވެސް ވަނީ އަޒާން ބޭރުކޮށްލާފަ އެވެ.
ޕީއެންސީގެ ޕާލިމަންޓްރީ ގްރޫޕުން އަޒާން އެ ކޮމިޓީތަކުން ދުރުކޮށްފައި މި ވަނީ، ސުޕްރީމް ކޯޓުގެ ދެ ފަނޑިޔާރަކު މަގާމުން ވަކިކުރުމަށްޓަކައި ގާނޫނު ބަދަލުކުރުމާ ދެކޮޅު ހައްދަވައި އެ ބިލާ ގުޅިގެން ޕީޖީން ނެރުނު ވިޕްލައިންއާ ހިލާވެފައި ވަނިކޮށެވެ.
އޭގެ ފަހުން އަޒާން ކޮމިޓީތަކުން ވަކި ކުރުމަށް، ޕީޖީ މެމްބަރުން ލޮބީ ކުރައްވާކަމުގެ އަޑުތައް ފެތުރުނެވެ. އަދި މައުލޫމާތު ލިބިފައިވާ ގޮތުގައި މަޖިލީހުގެ އެންމެ ބާރުގަދަ ދެ ކޮމިޓީން އަޒާން ބޭރުކޮށްލާފައި ވަނީ މިއަދު އެވެ.
އަޒާންގެ ބަދަލުގައި މާލިއްޔަތު ކޮމިޓީއަށް ޕީއެންސީގެ ޕާލިމެންޓްރީގެ ގުރޫޕުން މިހާރު އައްޔަނުކޮށްފައި ވަނީ ހެންވޭރު އުތުރު ދާއިރާގެ މެމްބަރު އަހުމަދު އައިފާނެވެ. އަދި 241 ކޮމިޓީއަށް އައްޔަނު ކުރީ ވިލިމާލެ ދާއިރާގެ މެމްބަރު މުހައްމަދު އިސްމާއީލެވެ.
މިހާރު އޮތް ހާލަތާއި ގުޅުވައި ފަނޑިޔާރުން ވަކި ކުރުމަށް ދެކޮޅު ހެއްދެވި ނަމަވެސް، އަޒާން ވިދާޅުވި ގޮތުގައި އޭނާ އަދިވެސް ހުރީ ސަރުކާރާއި އެކުއެވެ.
