ދުނިޔޭގެ އެންމެ ބޮޑު އެއް ޓޫރިޒަމް ފެއަރ ކަމުގައިވާ އައި.ޓީ.ބީ ބަރލިން 2025 ގައި ބައިވެރިވެ ވަޑައިގަތުމަށް ޓޫރިޒަމް އެންޑް އެންވަޔަރަމަންޓް މިނިސްޓަރު ޠާރިޤް އިބްރާހީމް ފުރާވަޑައިގަންނަވައިފިއެވެ.
މި ދަތުރުފުޅުގައި މިނިސްޓަރު ޠާރިޤް، އައި.ޓީ.ބީ ބަރލިންގައި ރާއްޖޭގެ ޓޫރިޒަމް ޕްރޮމޯޓް ކުރެއްވުމުގެ އިތުރުން، ރާއްޖޭގެ އަދި ބޭރުގެ ޓޫރިޒަމް ދާއިރާގެ އިސް ފަރާތްތަކާ ބައްދަލުކުރައްވާ މަޝްވަރާކުރައްވާނެ ކަމަށް ޓޫރިޒަމް މިނިސްޓްރީން މަޢުލޫމާތު ދެއްވާފައިވެއެވެ.
އައި.ޓީ.ބީ ބަރލިންގައި ބައިވެރިވާ ރާއްޖޭގެ ޓީމުން މަސައްކަތް ކުރައްވާނީ ރާއްޖެއަކީ ދުނިޔޭގެ އެންމެ ކުރީ ސަފުގައިވާ ޓޫރިސްޓް މަންޒިލެއްގެ ގޮތުގައި ޕްރޮމޯޓް ކުރެއްވުމަށާއި، ބައިނަލްއަޤްވާމީ ފެންވަރުގައި ޓޫރިޒަމް ދާއިރާގެ ގުޅުންތައް ބަދަހިކުރެއްވުމަށެވެ.
މިނިސްޓަރުގެ މި ދަތުރުފުޅަކީ ރާއްޖޭގެ ފަތުރުވެރިކަން އިތުރަށް ކުރިއެރުވުމަށާއި، ރާއްޖެއަށް އަންނަ ފަތުރުވެރިންގެ އަދަދު އިތުރުކުރުމަށް މުހިންމު ދައުރެއް އަދާކުރާނެ ދަތުރުފުޅެއް ކަމަށް ބެލެވެއެވެ. އައި.ޓީ.ބީ ބަރލިންގައި ރާއްޖެ ތަމްސީލުކުރެއްވުމުން، ރާއްޖޭގެ ޓޫރިޒަމް އިންޑަސްޓްރީއަށް އިތުރު ކުރިއެރުންތަކެއް ލިބިގެންދާނެ ކަމަށް އުއްމީދު ކުރެވެއެވެ.
