އިމްތިހާނު ހެދުމުގެ ކުރިން ޑޮކްޓަރުންނަށް ދެމުން އަންނަ ވަގުތީ ލައިސަންސްގެ މުއްދަތު ހަ މަސް ދުވަހަށް ކުރުކޮށްފިއެވެ.
ހެލްތު މިނިސްޓްރީން ކުރި އިއުލާނެއްގައި ބުނެފައި ވަނީ މެޑިކަލް ކައުންސިލްގެ ލައިސަންސިން އިމްތިހާނު ފުރިހަމަކުރަންޖެހޭ ޑޮކްޓަރުންނަށް މީގެކުރިން އެއް އަހަރަށް ދޫކުރަމުން ދިޔަ ޕްރޮވިޝަނަލް ރަޖިސްޓްރޭޝަންގެ މުއްދަތު ހަ މަަސް ދުވަހަށް ކުރުކޮށްފައިވާ ކަމަށެވެ. އެ ބަދަލަށް މިދިޔަ އަހަރު 1 ސެޕްޓެމްބަރުގައި ވަނީ އަމަލުކުރަން ފަށާފައެވެ.
6 މަސް ދުވަހަށް އެންމެ ފަހުން ދިން ޕްރޮވިޝަނަލް ލައިސަންސްގެ މުއްދަތު މިދިޔަ ހޮނިހިރު ދުވަހު ވަނީ ހަމަވެފައެވެ. އެހެންނަމަވެސް މިނިސްޓްރީން ބުނެފައިވަނީ ސެޕްޓެމްބަރު 1 އިން ފެށިގެން މިދިޔަ ހޮނިހިރު ދުވަހާއި ހަމައަށް ދޫކޮށްފައިވާ ޕްރޮވިޝަނަލް ލައިސަންސްގެ މުއްދަތު އިތުރު 6 މަސް ދުވަހަށް އިތުރުކޮށްފައިވާ ކަމަށެވެ.
އެކަމަކު އޭގެ ފަހުން ދޫކޮށްފައިވާ ޕްރޮވިޝަނަލް ލައިސަންސްގެ މުއްދަތަކީ 6 މަސް ދުވަހެއެވެ. މިނިސްޓްރީގެ މީޑިއާ އޮފިޝަލަކު މީޑިއާއަކަށް ވިދާޅުވީ ޕްރޮވިޝަނަލް ލައިސަންސްގެ މުއްދަތު ކުޑަކޮށްފައިވަނީ ވަގުތީ ލައިސަންސަކަށް އެއް އަހަރަކީ ދިގު މުއްދަތަކަށް ވާތީއެވެ.
އެހެންނަމަވެސް އިމްތިހާނު ހެދުމުން ލިބޭ ދާއިމީ ލައިސަންސްގެ މުއްދަތަކަށް ބަދަލެއް ނާންނަ ކަމަށް އޭނާ ވިދާޅުވިއެވެ. އިމްތިހާނުން ފާސްވެއްޖެ ނަމަ ޕްރެކްޓިސް ކުރަން ފަސް އަހަރުގެ ލައިސެންސަންސެއް ލިބޭނެ އެވެ.
