މިފަހުން އެމްޕީއެލްއަށް ލިބުނު އެންމެ ބޮޑު އެއް ކުރިއެރުމަކީ ސްޓޯރޭޖް ކެޕޭސިޓީ 3600 ޓީޔުސް އިން 5100 ޓީޔުސްއަށް ބޮޑުކުރުން ކަމަށް އެމްޕީއެލްގެ ޗީފް އޮފަރޭޓިންގ އޮފިސަރ އިލްޔާސް މުހައްމަދު ވިދާޅުވެއްޖެއެވެ.
ރޯދަޔަށް ތައްޔާރުވުމުގެ މައުލޫމާތު ދިނުމަށް ބޭއްވި ޕެނަލްގައި އިލްޔާސް ވިދާޅުވީ ރޯދަޔަށް ތައްޔާރުވުމުގެ ގޮތުން ވަރަށް ގިނަ މަސައްކަތްތަކެއް ވަރަށް ކުރިން ފެށިގެން ކުރަމުން އަންނަ ކަމަށެވެ. އެގޮތުން އެމްޕީއެލްގައި ރައްކާތެރި މާހައުލެއް ގާއިމްކުރުމަށް މަސައްކަތްތަކެއް ކުރެވުނު ކަމަށެވެ. އޭގެތެރޭގައި މަސައްކަތް ކުރާ މުވައްޒަފުންނަށް ރައްކާތެރި މާހައުލެއް ގާއިމްކުރުމަށް މަސައްކަތް ކުރާ ސަރަހައްދުގައި ހަލާކުވެފައިވާ ތަންތަން އަލުން މަރާމާތު ކުރުމާއި، ޕޭވް ކުރުމާއި ނުރައްކާތެރި ކާގޯ ހުރި ތަންތަން އެހެން ތަންތަނަށް ބަދަލު ކުރުމާއި އާއްމު މީހުންނާއި ދުރަށްލުން ފަދަ މަސައްކަތްތައް ކުރެވުނު ކަމަށް އިލްޔާސް ވިދާޅުވިއެވެ.
މީގެއިތުރަށް އެންމެ ބޮޑު ގޮންޖެހުމަކަށް ވީ އެމްޕީއެލްގެ ސްޓޯރޭޖް ކެޕޭސިޓީކަމަށް އިލްޔާސް ފާހަގަކުރެއްވިއެވެ. އެގޮތުން އެމްޕީއެލްގައި ރައްކާކުރެވެނީ 3600 ޓީޔުސް ކަމަށައި އެހެންނަމަވެސް އެމްޕީއެލްގެ މަައްކަތުން މިހާރު އެތަނުގައި 5100 ޓީޔުސް ގާއިމްކުރެވިފައިވާ ކަމަށް އިލްޔާސް ވިދާޅުވިއެވެ. އިލްޔަސް ވިދާޅުވީ އެއީ ވަރަށް ބޮޑު ކުރިއެރުމެއް ކަމަށާއި، މި ނިމިދިޔަ ދުވަސްތަކުގައިވެސް ނުލިބޭފަދަ ކުރިއެރުމެއް ކަމަށެވެ.
”ރޯދަޔަށް ހާއްސަކޮށް ތައްޔާރުވުމުގެ ގޮތުން އަޅުގަނޑުމެން ވަރަށް ގިނަ ކަންތައްތަކެއް ކުރިން. އޭގެތެރޭގައި ފާހަގަކުރެވެނީ މިހާރު މި ބޭނުންކުރާ ގުދަން، ގުދަން އަޅުގަނޑުމެން މި ހާއްސަކުރަނީ ރޯދަމަހަށް ގެންނަ ޕެރިޝަބަލް ކާނާއަށް އެކަނި. ދެން ގެންނަ ޖެނެރަލް ކާގޯ ހުޅުމާލެއަށް ބަދަލުކޮށް ހުޅުމާލެއިން ކްލިއަރ ކުރެވޭ ގޮތަށް ތައްޔާރުކުރެވިފައިވާ މިވަނީ. ހަމައެއާއިއެކު ޔާޑު ސަރަހައްދުގައި އިތުރު ގޭޓެއް ހުޅުވާފައި އެތަނުންވެސް ކްލިއަރ ކުރެވޭގޮތް މިހަދަނީ. މިކަހަލަ އެތައް ކަމެއް އަޅުގަނޑުމެން ކުރިން“
އިލްޔާސް ވިދާޅުވީ މުވައްޒަފުންގެ ކަންކަމަށް ބަލާއިރު، ބޯޓު ފަހަރުގައި މަސައްކަތް ކުރާ މުވައްޒަފުން ވަނީ އިތުރު ކޮށްފައިކަމަށެވެ. އޭގެބޭނުމަކީ ގިނަ ބޯޓުފަހަރުގައި މަސައްކަތްތައް ކުރިއަށް ގެންދިއުންކަމަށެވެ. މޫސުން ގޯސްވެ މުދާ ކްލިއަރ ކުރުމަށް މަޑުޖެހުމެއް އައިނަމަވެސް އެކަން ކުރެވުނު ކަމަށް ކަމަށް އިލްޔާސް ވިދާޅުވިއެވެ.
