އެމެރިކާގެ ސަރުކާރުން ޔޫއެސްއެއިޑްގެ މަސައްކަތްތައް ހުއްޓުވާލުމާއިއެކު ޣައްޒާގައި ސުލްހަ ގާއިމުކުރުމަށްޓަކައި ހަރަކާތްތެރިވަމުންދާ ޖަމިއްޔާތަކުގެ މަސައްކަތްތަކަށް ބޮޑެތި ގޮންޖެހުންތައް ކުރިމަތިވެފައިވާކަމަށް ބައިނަލްއަގުވާމީ ނޫސްތަކުން ރިޕޯޓުކޮށްފިއެވެ.
ރިޕޯޓުތަކުގައިވާގޮތުން ޓްރަމްޕުގެ ސަރުކާރުންވަނީ ޔޫއެސްއެއިޑްގެ މަސައްކަތްތައް ހުއްޓާލުމަށްޓަކައި ފިޔަވަޅުތަކެއް އަޅާފައެވެ. އަދި އެކަމުގެ ސަބަބުން ޣައްޒާގައި ހަމާސް އަދި އިސްރާއީލުގެ ދެމެދު ގާއިމުކޮށްފައިވާ ހަމަލާ ބަދަލުކުރުން ހުއްޓާލުމުގެ އެއްބަސްވުން ދެމެހެއްޓުމަށްޓަކައި ހަރަކާތްތެރިވާ އެކި ޖަމިއްޔާތަކަށް ބޮޑެތި ދަތިތައް ކުރިމަތިވެފައިވާކަމަށް ބުނެފައިވެއެވެ.
މާލީ އެހީތެރިކަން ހުއްޓުމުގެ ސަބަބުން އެހީތެރިކަން ދެމުންދާ އެކި ފަރާތްތަކުން ހޯދާފައިވާ ކުދި ކުރިއެރުންތައް ގެއްލިގެންދިއުމުގެ ފުރުސަތު އޮތްއިރު ސީދާ ސުލްހައަށްވެސް އަސަރުކޮށްފާނެކަމަށް ބައެއް ފަރާތްތަކުން ދެކެއެވެ. މި ދަނޑިވަޅުގައި ޣައްޒާއަށް ދޭ މައިގަނޑު އެހީތެރިކަން ފޯރުކޮށްދިނުމަށް ނިންމާފައިވަނީ ޔޫއެސްއެއިޑްގެ ދަށުން ދިނުމަށް ކަނޑައެޅިފައިވާ ފައިސާ މެދުވެރިކޮށެވެ. ޔޫއެސްއެއިޑްގެ އޮފިޝަލުންގެ ގޮތުގައި ތިއްބެވި ބައެއް ފަރާތްތަކުން ބުނާގޮތުން ޓްރަމްޕުގެ ސަރުކާރުންވެސްވަނީ މި އަހަރުގެ ޖެނުއަރީ މަހުގެ ތެރޭގައި 383 މިލިއަން ރުފިޔާގެ އެހީތެރިކަން ފޮނުވާފައިކަމަށެވެ.
ނަމަވެސް އެދުވަހަށްފަހު އަދި އިތުރު އެއްވެސް ޕޭމަންޓުތަކެއް ހަދާފައިނުވާކަމަށް ހިއްސާކުރިއިރު މި މައުލޫމާތުތައް ފޯރުކޮށްދީފައިވަނީ މަސްދަރު ހާމަނުކުރުމަށް ޝަރުތުކޮށްފައިކަމަށްވެސް ނޫސްތަކުން ބުނެއެވެ. ޣައްޒާގައި ހަރަކާތްތެރިވާ ބައެއް ޖަމިއްޔާތަކުންވެސް މިކަމަށް ހެކިދޭއިރު މާލީ އެހީތެރިކަން ނެތި މަސައްކަތްތައް ކުރިއަށް ގެންދެވިދާނެކަމަށް ނުދެކޭކަންވެސް ފާހަގަކޮށްފައިވެއެވެ. ބައެއް ޖަމިއްޔާތަކުންވަނީ ކުރަމުންދާ މަސައްކަތްތައް ކޮންމެވެސް ވަރަކަށް ބަދަލުކޮށްފައިކަމަށްވާއިރު އަނެއް ބައި ފަރާތްތަކުން މަސައްކަތްތެރިން ދޫކޮށްލުން ފަދަ ފިޔަވަޅުތައްވެސް އަޅާފައިވެއެވެ.
