32 ރަށުގައި ކުންޏާއި ވަސީލަތްތައް މެނޭޖްކުރާ މަރުކަޒު ގާއިމުކުރުމުގެ މަސައްކަތް މިނިސްޓްރި އޮފް ޓޫރިޒަމް އެންޑް އެންވައިރޮމެންޓުން ވޭސްޓް މެނޭޖްމަންޓް ކޯޕަރޭޝަނާއި ހަވާލުކޮށްފިއެވެ.
މި އަހަރުގެ ރިޔާސީ ބަޔާނުގައި ރައީސް ޑރ. މުހައްމަދު މުއިއްޒު ވަނީ މި އަހަރު ނިމުމުގެ ކުރިން ރާއްޖެ ހުރިހާ ރަށެއްގައި އެ ރަށަކަށް އެކަށޭނެ ކުނި މެނޭޖްކުރާނޭ ނިޒާމާއި ވަސީލަތްތައް ގާއިމްކޮށްދެއްވާނެ ކަމަށް ވިދާޅުވެފައެވެ. އެހެންކަމުން އެ އަމާޒަށް ވާސިލްވުމަށްޓަކައި އެންވައިރޮންމެންޓް މިނިސްޓްރީން ކުރިއަށް ގެންދާ މަގޭ ސާފުރާއްޖެ ޕްރޮގްރާމްގެ ތެރެއިން 32 ރަށުގައި ކުންޏާއި ވަސީލަތްތައް މެނޭޖްކުރާ މަރުކަޒު ގާއިމުކުރުމުގެ މަސައްކަތް ވަނީ ވެމްކޯއާއި ހަވާލުކޮށްފައެވެ.
މިދިޔަ ފެބްރުވަރި މަހުގެ ތެރޭގައިވެސް 2 ރަށެއްގައި ކުންޏާި ވަސީލަތްތައް މެނޭޖްކުރާ މަރުކަޒު ގާއިމްކުރުމުގެ މަސައްކަތް ވެމްކޯއާއި ވަނީ ހަވާލުކޮށްފައެވެ. އެހެންކަމުން ހޯމަ ދުވަހު ހަވާލުކުރި 32 ރަށާއެކު ޖުމްލަ 34 ރަށެއްގައި ކުނި މެނޭޖްކުރާނެ މަރުކަޒު ގާއިމްކުރުމުގެ މަސައްކަތް ވެމްކޯއިން ކުރިއަށް ގެންދާނެއެވެ.
މީގެއިތުރަށް މި މަސައްކަތް ވަނީ މިއަހަރުގެ 3 ވަނަ ކުއާޓަރގެ ނިޔަލަށް ނިންމުމަށް ހަމަޖެހިފައެވެ. މިނިސްޓްރީން ބުނެފައިވަނީ ރައީސްގެ އަމާޒަށް ވާސިލްވުމަށް 128 ރަށެއްގައި އެ މަސައްކަތް ކުރަން ޖެހެއެވެ. އެހެންކަމުން އެކަމުގެ މަސައްކަތް ސަރުކާރު ހިއްސާވާ އެހެން ކުންފުނިތަކާއި ގުޅިގެން ކުރިއަށް ގެންދާނެ ކަމަށް މިނިސްޓްރީން ވަނީ ބުނެފައެވެ.
