ފަތުރުވެރިކަމުގެ ދާއިރާއަށް އިތުބާރު ގެއްލޭނެފަދަ ކަންކަން ސަރުކާރުން ހުށައެޅި ބިލުގައި އެބަހުރިކަމަށް ހުޅުމާލެ ދެކުނު ދާއިރާގެ މެންބަރު އަހުމަދު ޝަމްހީދު ވިދާޅުވެއްޖެއެވެ.
ދިވެހިރާއްޖޭގެ ޓޫރިޒަމާ ބެހޭ ގާނޫނަށް އިސްލާހު ގެނައުމުގެ ބަހުސްގައި ވާހަކަދައްކަވަމުން ޝަމްހީދު ވިދާޅުވީ މި އިސްލާހުގެ ދަށުން ކައުންސިލްގެ އިހުތިސާސްގައި ހިމެނޭ ސަރަހައްދުތައް ޓޫރިޒަމް ސިނާއަތަށް ބިން ކަނޑައެޅުން ސީދާ ރައީސުލްޖުމްހުރިއްޔާއަށް ލިބިގެންދާކަމަށެވެެ. އަދި އެ ބާރު ކައުންސިލަށް ގެއްލޭކަމަށެވެ.
މި ގާނޫނުގެ 9 ވަނަ މާއްދާއަށް ގެންނަ އިސްލާހަކީ އެއްވެސް ކަހަލަ ހަރުދަނާކަމެއް ނެތި ކުރަމުންދާ މަސައްކަތެއްކަމަށް ޝަމްހީދު ވިދާޅުވިއެވެ.
ޝަމްހީދު ވާހަކަދައްކަވަމުން ދިޔަ ވަގުތު އިނގުރައިދޫ ދާއިރާގެ މެންބަރު އިބްރާހީމް ފަލާހު ވަނީ ނިޒާމީ ނުކުތާއެއް ނަންގަވާ، ބިލާއި ހިލާފު ވާހަކަތަކެއް މެންބަރު ދައްކަވަމުން ގެންދާކަމަށް ވިދާޅުވެފައެވެ. އެއީ ނިޒާމީ ނުކުތާއެއްކަމަށް ވަނީ ބަލައިގަނެފައެވެ.
ނަމަވެސް އެއްވެސް އޮޅުވާލުމެއް ވާހަކަދެއްކުމުގައި ގެންގުޅެފައިނުވާނެކަމަށް ޝަމްހީދު ވިދާޅުވިއެވެ. ޝަމްހީދު ވިދާޅުވީ ކޮންމެ ހަ މަހަކުން ޑިސްކައުންޓް އެޅުވިކަމަށްވީ ނަމަވެސް، ގާނޫނުގައި ހަމަ ނުޖެހޭ ކަންތައްތަކެއް އެބަހުރިކަމަށެވެ.
ރިސޯޓެއް މަރާމާތަށް ބަންދު ކޮށްފިނަމަ އޭރެއްގައި އެކުލަވާލެވިފައި އޮންނަ އެއްބަސްވުމެއް ބަދަލުކުރަން ޖެހޭކަމަށް ފާހަގަކޮށް ޝަމްހީދު ވިދާޅުވީ، އަދި ރިސޯޓު އަލުން ހުޅުވާނެކަމަށް ބުނާ މުއްދަތުގެ ތެރޭގައި ރިސޯޓު ނުހުޅުވިއްޖެނަމަ، އިންވެސްޓަރަށް އެއްވެސް ބަދަލެއް ދިނުމެއް ނެތި އެ ރިސޯޓެއް ސަރުކާރަށް ނެގުމުގެ އިހުތިޔާރު އޮންނަން ޖެހޭނެކަމަށް އިސްލާހުގައި އެބަ އޮތްކަމަށެވެ. މިއީ އެއްވެސް ހާލެއްގައި ކަން ކުރެވިގެން ވާނެ ގޮތް ނޫންކަމަށް ޝަމްހީދު ވިދާޅުވިއެވެ.
ޝަމްހީދު ވިދާޅުވީ ޝަންގްރިއްލާފަދަ ރިސޯޓުތައް ހުޅުވުމަށް މި ނޫން އެހެން ފޯމިއުލަރތައް ހޯދޭނެކަމަށެވެ. ފަތުރުވެރިކަމުގެ ދާއިރާއަށް އިތުބާރު ހޯދުމަށްޓަކައި ކުރަން ހެޔޮނުވާވަރުގެ ކަންކަން މި ބިލުގައި އެބަހުރިކަމަށް އޭނާ ވިދާޅުވިއެވެ.
ގާނޫނުގައި ހޮޓާ މާނަކޮށްފައިވާ ގޮތްވެސް ރަނގަޅަށް ނޫންކަމަށް އޭނާ ވިދާޅުވިއެވެ. އިންވެސްޓަރުންނާއި ރައްޓެހި ގާނޫނުތަކެއް ގެންނަން ޖެހޭކަމަށް އޭނާ ވިދާޅުވިއެވެ.
