ޓޫރިޒަމްގެ ހިދުމަތް ދިނުމަށް ދޫކޮށްފައިވާ ފަޅެއް، ނުވަތަ ރަށެއްގެ މަސައްކަތް އެއްބަސްވުމާއި އެއްގޮތަށް ކުރިޔަށް ނުގެންދާތީ، އެ ބާތިލު ކުރާ ހާލަތެއްގައި ތަން ކުއްޔަށް ނަގާފައިވާ ފަރާތަށް ސަރުކާރުން އެއްވެސް ބަދަލެއް ދޭން ނުޖެހޭނަކަމަށް ހިމަނައި ޓޫރިޒަމްގެ ގާނޫނަށް ސަރުކާރުގެ ފަރާތުން އިސްލާހު ހުށަހަޅައިފި އެވެ.
ޓޫރިމްގެ ގާނޫނަށް ހުށަހަޅާފައިވާ އިސްލާހގައި ވަނީ މީހުން ދިރިއުޅޭ ރަށްތައް ނުވަތަ ސިޓީތަކުގައި އެ ރަށެއް ނުވަތަ ސިޓީއެއްގެ ބިނާވެށީގެ ޕްލޭނާއި އެއްގޮތްވާ ގޮތުގެ މަތީން ޓޫރިޒަމްގެ ބޭނުމަށް ތަރައްގީ ކުރެވޭ ބިން ކަނޑައަޅާނީ އެ ރަށެއް ނުވަތަ ސިޓީއެއް ނިސްބަތްވާ ރަށު ނުވަތަ ސިޓީ ކައުންސިލުން ކަމަށެވެ. އިސްލާހުގައި ބުނާ ގޮތުން މީހުން ދިރިއުޅޭ ރަށްތައް ނުވަތަ ސިޓީތައް ނިސްބަތްވާ ރަށު ނުވަތަ ސިޓީ ކައުންސިލުގެ އިހުތިސާސްގައި ހިމެނޭ ފަޅު ރަށްތަކާއި ފަޅުތައް ޓޫރިޒަމްގެ ބޭނުމަށް ތަރައްގީ ކުރެވޭ ސަރަހައްދުތަކުގެ ގޮތުގައި ކަނޑައަޅާނީ ރައީސުލްޖުމްހޫރިއްޔާ އެވެ.
މީގެއިތުރުން ގާނޫނުގެ 4 ވަނަ މާއްދާއަށް ހުށަހަޅާފައިވާ އިސްލާހުގައި ވަނީ ޓޫރިޒަމްގެ ބޭނުމަށް ކަނޑައަޅާ ސަރަހައްދުތަކުގައި ތަރައްގީ ކުރެވޭނީ، ޓޫރިސްޓު ގެސްޓްހައުސް ނުވަތަ ޓޫރިސްޓު ހޮޓެލް ކަމަށެވެ. ދައުލަތުގެ އާންމު މަންފާއަށްޓަކައި ހާސިލު ކުރުމަށް ބޭނުންވާ އިގްތިސާދީ ސިޔާސަތެއްގެ ދަށުން ނުވަތަ އިޖްތިމާއީ ސިޔާސަތެއްގެދަށުން ނުވަތަ ސަރުކާރުން ކަނޑައަޅާ އެނޫންވެސް މުހިންމު ސިޔާސަތެއްގެ ދަށުން ދުރާލާ އިއުލާނުކޮށްފައިވާ އުސޫލުތަކާއި އެއްގޮތްވާ ގޮތުގެ މަތިން ސަރުކާރުން ކަނޑައަޅާ މުހިންމު މަޝްރޫއުއެއް ހަވާލު ކުރެވޭ ފަރާތަކަށް ނުވަތަ އެފަދަ މަޝްރޫއުއަކަށް ހަރަދުކުރާ ފަރާތަކަށް ކްރޮސް ސަބްސިޑީގެ ގޮތުގައި ޓޫރިސްޓު ރިސޯޓެއް ނުވަތަ އިންޓަގްރޭޓެޑް ޓޫރިސްޓު ރިސޯޓެއް ތަރައްގީ ކުރުމަށް ރަށް ނުވަތަ ފަޅުން ބިން ދޫކުރެވޭނެކަމަށެވެ.
އިސްލާހުގައި ވަނީ ދައުލަތުގެ އާންމު މަންފާއަށްޓަކައި ހާސިލު ކުރުމަށް ބޭނުންވާ އިގްތިސާދީ ސިޔާސަތެއްގެ ދަށުން ނުވަތަ އިޖްތިމާއީ ސިޔާސަތެއްގެ ދަށުން ނުވަތަ ސަރުކާރުން ކަނޑައަޅާ އެ ނޫން ވެސް މުހިންމު ސިޔާސަތެއްގެ ދަށުން ދުރާލައި އިއުލާނުކޮށްފައިވާ އުސޫލުތަކާއި އެއްގޮތްވާ ގޮތުގެ މަތީން ސަރުކާރުން ކަނޑައަޅާ މުހިންމު މަޝްރޫއުއެއް ހަވާލު ކުރެވޭ ފަރާތަކަށް ނުވަތަ މަޝްރޫއުއަކަށް ހަރަދު ކުރާ ފަރާތަކަށް ކްރޮސް ސަބްސިޑީގެ ގޮތުގައި ރަށެއް ނުވަތަ ބިމެއް ދޭން ވާނީ ގާނޫނު ބުނާ ގޮތުގެ މަތީންކަމަށެވެ.
ބިލުގައި ބުނެފައި ވަނީ ރިސޯޓެއް ތަރައްގީ ކުރުމަށް ބިމެއް ދޫކުރެވޭނީ ކުއްޔަށް ހިފާ ތާރީހުން ފެށިގެން 50 އަހަރުގެ މުއްދަތަކަށް ކަމަށެވެ. އަދި މުއްދަތު އިތުރުކޮށްދޭން އެދިއްޖެ ނަމަ، އުސޫލަށް ބަލައި މުއްދަތު އިތުރުކޮށްދިނުމަށް ފަހު މުއްދަތު އިތުރު ކުރާ ކޮންމެ ތާރީހަކަށް އެއްފަހަރާ އެއްލަކަ ޑޮލަރު ދައްކަންވާނެކަމަށް އިސްލާހުގައި ވެއެވެ. އެކަމަކު ހަ މަސް ދުވަހުގެ މުއްދަތަކަށް ފަހު ފައިސާ ދައްކައި ހަލާސް ކުރުމަށް އެއްބަސްވާނަމަ ކޮންމެ އަހަރަކަށް ދެލައްކަ ޑޮލަރު އެއްފަހަރާ ދައްކަންވާނެ އެވެ.
ތަށް ނުވަތަ ބިން ނުވަތަ ފަޅު ކުށްޔަށް ދީފައިވާ މުއްދަތު 20 އަހަރު އިތުރު ކުރުމުގެ ފީއެއްގެ ގޮތުން އެއްފަހަރާ ދައްކަން ޖެހޭނީ 2.5 މިލިއަން ޑޮލަރެވެ. އިސްލާހަށް އަމަލު ކުރާ ތާރީހުން ފެށިގެން، ފަޅު ކުއްޔަށް ދީފައިވާ މުއްދަތު 25 އަހަރު އިތުރު ކުރުމަށް އެއްފަހަރާ ކޮންމެ އަހަރަކަށް ދައްކަން ޖެހޭނީ ތިން މިލިއަން ޑޮލަރެވެ. އަދި އިތުރު ކުރަނީ 49 އަހަރު ނަމަ ދައްކަން ޖެހޭނީ 10 މިލިއަން ޑޮލަރެވެ.
އިސްލާހު ބުނާ ގޮތުން އުސޫލާއި ހިލާފަށް ފަތުރުވެރިކަމުގެ ބޭނުމަށް ކުއްޔަށްދޫކޮށްފައިވާ ތަނެއްގައި ހިދުމަތް ދިނުން ހުއްޓާލައި ތަން ބަންދުކޮށްފައިވާނަމަ އެތަނެއްގެ ކުލީގެ އެގްރިމަންޓު ބާތިލުކުރުމުގެ އިހުތިޔާރު މިނިސްޓްރީއަށް ލިބިގެންވެއެވެ.
އިސްލާހުގައި ވަނީ ޓޫރިޒަމްގެ ބޭނުމަށް ތަރައްގީކޮށް ހިންގަމުންދާ ރަށެއްގެ ނުވަތަ ބިމެއްގެ ފެންވަރު މަތިކުރުމަށް ނުވަތަ އެހެން އެފަދަ ބޭނުމަކަށް ބަންދުކުރެވޭނީ މިނިސްޓްރީގެ ގަވައިދާއި އެއްގޮތްވާ ގޮތުގެ މަތީން ވަކި މުއްދަތަކަށް ކަމަށެވެ. އަދި އެފަދައިން ކަނޑައަޅާ ކަނޑައެޅުމަށް އަމަލު ކުރެވޭނީ، ގާނޫނުގެ ދަށުން މިނިސްޓްރީ ހަދާ ގަވައިދާއި ރަށުގެ ބިމުގެ ކުލީގެ އެގްރިމަންޓު އިސްލާހުކޮށްކަމަށް ވަނީ ބުނެފައެވެ.
ކަނޑައަޅާފައިވާ މުއްދަތުގައި މަސައްކަތް ނިންމައި ތަން ހުޅުވައި ހިދުމަތް ދޭން ނުފަށާނަމަ، އެބައެއްގެ މައްޗަށް ފިޔަވަޅު އެޅޭނެ އެވެ. އަދި އެގްރިމަންޓު ބާތިލު ކުރާ ހާލަތެއްގައި ތަން ކުއްޔަށް ނަގާފައިވާ ފަރާތަށް ސަރުކާރުން އެއްވެސް ބަދަލެއް ދޭން ނުޖެހޭނަކަމަށް ވަނީ ބުނެފައެވެ.
އިސްލާހުގައި ހިމަނާފައިވާ ބައިތަކުގެ ތެރޭގައި ދެން ހިމެނެނީ ޓޫރިސްޓު ހިދުމަތް ދޭ ތަންތަނުގެ ކޮމްޕްލަޔަންސް ކޯޑު އެކުލަވާލައި އެއައަށް އަމަލު ކުރުމެވެ. އަދި ޓޫރިޒަމް ޓްރަސްޓު ފަންޑެއް އެކުލަވާލުމާއި އެކު ފަނޑަށް ޖަމާކުރެވޭ ފައިސާ ބޭނުން ކުރާނެ ގޮތް ވަނީ ލިޔެފައެވެ.
