ރޯދަމަހުގެ ފުރަތަމަ 10 ނިމުނުއިރު ބާޒާރުގެ އަގުތައް ވަނީ އެއްވަރެއްގައި ހިފެހެއްޓިފައެވެ.
ރޯދަމަސް ފެށުމުގެ ދެދުވަސް ކުރިން ބާޒާރުގައި ތަކެތީގެ އަގުތައް ހުރީ އުފުލިފައެވެ. އެހެންނަމަވެސް ރޯދަމަހުގެ ފުރަތަމަ ދުވަހުން ފެށިގެން އެތަކެތީގެ އަގުތަކަށް ބަދަލުތައް އައިސް ހުރިހާ އެއްޗެއްގެ އަގެއްވެސް އެއްވަރެއްގައި ހިފެހެއްޓިފައި ހުރިކަން ފާހަގަކުރެވެއެވެ.
ރޯދަމަހަށް އަބަދުވެސް ތަކެއްޗަށް އޮންނަ ޑިމާންޑް ބޮޑުވެގެން ދެއެވެ. އަދި ތަކެތީގެ އަގުތައް އުފުލިގެންދާ ސަބަބަކީވެސް ތަރުކާރީ އާއި މޭވާގެ އެކި ބާވަތްތަކަށް އޮންނަ ޑިމާންޑް މަތިވުމެވެ. އެހެންނަމަވެސް މިފަހަރު ސަރުކާރުން ވަނީ ދުރާލާ މިކަމަށް ފިޔަވަޅުތަކެއް އަޅާފައެވެ. އަތެކީގެ އަގު އެއްވަރެއްގައި ހިފެހެއްޓުމަށް އިކޮނޮމިކް މިނިސްޓްރީ އާއި ކަމާގުޅުންހުރި ކުންފުނިތަކުން އެކަމަށް ތައްޔާރީތަކެއް ވެފައިވެއެވެ.
ރޯދަ މަހުގެ 10 ދުވަސް ފާއިތުވެގެން ދިޔައިރު ބާޒާރުގެ އަގުތައް ހުރި މިންވަރު:
ގިތެޔޮ މިރުސް: 20/15 ރުފިޔާއަށް ގުރާމެއް
ފިޔާ: 18 ރުފިޔާއަށް ކިލޯއެއް
އަލުވި: 20 ރުފިޔާއަށް ކިލޯއެއް
ޓޮމާޓޯ: 25 ރުފިޔާ
ބަށި: 60 ރުފިޔާ
ލުނބޯ: 30 ރުފިޔާ
ކަރާ: 25 ރުފިޔާ
ފަތުގެ ބާވަތްތައް:
ލެޓިއުސް: 15 ރުފިޔާއަށް 100 ގުރާމް
ކޮޕީ ފަތް: 10 ރުފިޔާއަށް
ލީކްސް: 90 ރުފިޔާއަށް ކިލޯއެއް
ކޮރިއަންޑަރ: 25 ރުފިޔާއަށް 100 ގުރާމް
މިންޓު ފަތް: 25 ރުފިޔާއަށް 100 ގުރާމް
ކެބެޖް: 30 ރުފިޔާއަށް
ރޯދަމަސް ފެށެން ގާތް ވެފައިވަނިކޮށް ލެޓިއުސްގެ އަގު ހުރީ 120 ރުފިޔާއަށެވެ. މިރުހުގެ އަގު ހުރީ 25 ރުފިޔާގައެވެ. އަދި ކަރާގެ އަގު 30 ރުފިޔާގައި ހުރިއިރު ލުނބޯ ކިލޯއެއްގެ އަގު އުޅެނީ 60/50 ރުފިޔާއާއި ދެމެދުއެވެ.
އިކޮނޮމިކް މިނިސްޓްރީން މި އަހަރުގެ ރަމަޟާން މަހަށް ވެސް ހާއްސަކޮށްގެން ކާބޯތަކެތީގެ ސިޔާސަތެއް އެކުލަވާލައި ލިސްޓުގައިވާ ގޮތުގެ މަތީން އަގުތައް މޮނީޓަރ ކުރަމުން ދާނެ ކަމަށް ވަނީ ބުނެފައެވެ. އެގޮތުން އާންމު ގޮތެއްގައި ކެއިންބުއިމުގައި ގޭބިސީތަކުގައި ބޭނުން ކުރާ ބާވަތްތަަކަށް ހާއްސަ އިސްކަމެއް ދެވިފައިވާނެކަމަށް މިނިސްޓްރީން ވަނީ ބުނެފައެވެ. ލިސްޓުގައި ހިމަނާފައި ވާނީ ކޮންމެހެން، ރައްޔިތުންނަށް ބޭނުންވާނެކަމަށް ބެލެވޭ ބާވަތްތައް ކަމަށާއި އަދި އެއިން ބާވަތެއް ހުސްވެއްޖެ ނަމަ ނުވަތަ އަގު އުފުލޭ ހާލަތެއް އައިސްފި ނަމަ އެސްޓީއޯ މެދުވެރިކޮށް ފިޔަވަޅު އަޅާނެކަމަށް ވަނީ ބުނެފައެވެ.
