ޖޭއެސްސީއިން ކުއްލި ގޮތަކަށް މައްސަލައެއް ބަލަން ފަށާފައިވަނީ މަސައްްކަތްތަކަށް ނުފޫޒު ފޯރުވުމުގެ ގޮތުންކަމަށް ފަނޑިޔާރު ޑރ އަޒްމިރަލްދާ ޒާހިރު ވިދާޅުވެއްޖެއެވެ.
ފަނޑިޔާރު އަޒްމިރަލްދާގެ ގާނޫނީ ޓީމުން މީޑިއާތަކަށް މައުލޫމާތު ދީފައިވާގޮތުން އޭނާވަނީ ޖޭއެސްސީއިން ބަލަމުންދާ ސުލޫކީ މައްސަލައިގެ ތަހުގީގުގައި ޖަވާބުދާރީވެވަޑައިގެންފައެވެ. އަޒްމިރަލްދާގެ ވަކީލުން ބުނެފައިވާގޮތުން މައްސަލައާއި ގުޅޭގޮތުން އިޖްރާއީގޮތުން ފާހަގަކުރަންހުރި ބައެއްކަންކަން ހުށައަޅަން ބޭނުންވާކަން ޖޭއެސްސީގެ ކޮމިޓީއާއި ހިއްސާކުރިކަމަށެވެ. ނަމަވެސް ކޮމިޓީންވަނީ ވަކީލެއްގެ އެހީތެރިކަން ހޯދުމުގެ ހައްގު އޮތްނަމަވެސް އެ ތަޅުމުގައި ވަކީލަކަށް ވާހަކަނުދެއްކޭނެކަމަށް ބުނެފައިކަން ހާމަކުރިއެވެ.
ވަކީލުން ބުނެފައިވާގޮތުން އެކަމަކީ ޖޭއެސްސީގެ ގާނޫނުގެ އިތުރުން ގާނޫނުއަސާސީގެ 53 ވަނަ މާއްދާއިންވެސް ކަށަވަރުކޮށްދޭ ހައްގެއް ކަމަށް ކޮމިޓީގައި ދެންނެވިފައިވާކަމަށާއި ވާހަކަދައްކަން ފުރުސަތު ނުދޭނަމަ ވަކީލެއްގެ ފޮޓޯއެއް ހިފައިގެން ކޮމީޓީއަށް ހާޒިރުވުމުން އެއީ ވަކީލެއްގެ އެހީތެރިކަން ހޯދުމަށް ފުރުސަތު ދެވުނީތޯ ސުވާލުކުރިކަމަށެވެ. ނަމަވެސް ކޮމިޓީގެ މެމްބަރުންވަނީ ރިޕޯޓަށް ޖަވާބުދާރީވާން ލިބޭ މަރުހަލާގައި ފާހަގަކުރަން ބޭނުންވާކަންކަން ލިޔުމުން ހުށައެޅިދާނެކަން އަންގާފައިކަމަށް ބުނެފައިވެއެވެ.
ތަކުރާރުކޮށް ދެންނެވުމުންވެސް ކޮމިޓީންވަނީ ގާނޫނީ ވަކީލަށް ވާހަކަދައްކަން ފުރުސަތު ނުދެވޭނެކަން އަންގާފައިވާކަމަށާއި އެހެންކަމުން މި ތަހުގީގު ކުރިއަށްދަނީ ގާނޫނުއަސާސީއާއި ހިލާފަށްކަމަށް ފާހަގަކޮށްފައިވާނެކަމަށް އެޓީމުން ބުނެފައިވެއެވެ. ނަމަވެސް ފަނޑިޔާރު އަޒްމިރަލްދާވަނީ އިއުތިރާޒްތަކާއެކު ކޮމިޓީންކުރި ސުވާލުތަކަށް ޖަވާބުދެއްވާފައިކަމަށާއި ކްރިމިނަލް ކޯޓުގެ ފަނޑިޔާރުންތަކަކަށް ގުޅައިގެން ނުފޫޒު ފޯރުވާފައިވާކަމަށް ބުނާ ތުހުމަތުތަކުގައިވާ އެއްވެސް އަމަލެއް ހިންގާފައިނުވާނެކަމަށް އަޒްމިރަލްދާ ވިދާޅުވިކަމަށް ހިއްސާކޮށްފައިވެއެވެ.
އަޒްމިރަލްދާ ވިދާޅުވީ، ކުރެވެމުންދަނީ ހަގީގަތާއި ހިލާފު ދޮގު ތުހުމަތުތަކެއް ކަމަށާއި އޭނާގެ ފިރިކަލުން ޑރ އިސްމާއިލް ބަންދުގައި ހުއްޓާ އެ މައްސަލައާއި ގުޅޭގޮތުން އެއްވެސް ކޯޓެއްގެ އެއްވެސް ފަނޑިޔާރަކާއި އެއްވެސް ވާހަކައެއް ދައްކަވާފައިނުވާނެކަމަށެވެ. އަދި ޑރ އިސްމާއިލް ހުއްޓުވުމަށްފަހުު އެތަނަށް ހާޒިރުވި އައިއޯވަނީ ދޫކޮށްލުމަށް ނިންމާފައިކަމަށާއި ނަމަވެސް އިސް އޮފިސަރުންނަށް ގުޅައި ދިގު ފޯނު ކޯލަކަށްފަހު ހައްޔަރުކުރުމަށް ނިންމިކަމަށް ހިއްސާކުރެއްވިއެވެ. އަޒްމިރަލްދާ ވިދާޅުވީ، މިހުރިހާ ކަމަކީ އޭނާއަށް ނުފޫޒު ފޯރުވުމަށްޓަކައި ގޮތެއް ހޯދުމުގެ ގޮތުން ކޮށްފައިވާ މަސައްކަތްތަކެއްކަމަށް ގަބޫލުކުރައްވާކަމަށޭވެ.
ފަނޑިޔާރު ކޮމިޓީގައި ހިއްސާކުރެއްވިގޮތުން ފިރިކަލުން ޑރ އިސްމާއިލް ބަންދުން ދޫކޮށްލިފަހުން މި އަހަރުގެ ފެބްރުއަރީ މަހުގެ ތެރޭގައި ދައުލަތުގެ ބަނޑާރަ ނައިބު އަހުމަދު އުޝާމްވަނީ އެހެން މީހެއް މެދުވެރިކޮށް ސުޕްރީމް ކޯޓަށް އަތްބާނަން ބޭނުން ނުވާކަމަށް ބުނެ މެސެޖެއް ޕާސްކޮށްފައިކަމަށެވެ. އެއަށްފަހު ކޯޓުގައި ހިނގަމުންދާ ދުސްތޫރީ މައްސަލައާއި ގުޅޭ ވާހަކަ ދެއްކެވިކަމަށާއި ރައީސް ޑރ މުހައްމަދު މުއިއްޒު ކަންބޮޑުވެވަޑައިގަންނަވާކަން ފާހަގަކުރެއްވިކަމަށެވެ.
އޭނާ ވިދާޅުވީ، އިޖުރާއީ އިއުތިރާޒްއާއި ހިސާބުން މައްސަލަ ނިމޭނެފަދަ މޭރުމަކުން ވާހަކަދެއްކިކަމަށެވެ. އެއަށްފަހު ޖޭއެސްސީގެ ކުރީގެ ރައީސްގެ ދައުރުގައި ވަތްގަނޑަށްލާފައި އޮތް ސުލޫކީ މައްސަލައެއް އޮތް ވާހަކަ ފާހަގަކުރިކަމަށާއި އެ މައްސަލަ ބަލާނެކަމުގެ މެސެޖު ލިބުނުކަން ހާމަކުރެއްވިއެވެ.
އެހެންކަމުން ކުއްލި ގޮތަކަށް ދޮގު ތުހުމަތުތަކެއްގައި ސަސްޕެންޑުކޮށް މައްސަލައެއް ބަލަން ފެށުމުން މިއީ ނުފޫޒު ފޯރުވުމުގެ ގޮތުން ކުރެވޭ މަސައްކަތްތަކެއް ކަމަށް ވިދާޅުވިއެވެ. އަދި މި މައްސަލަ އޭސީސީގެ އިތުރުން ކަމާއި ބެހޭ މުއައްސަސާތަކަށް ހުށައަޅާފައިވާނެކަންވެސް ފާހަގަކުރެއްވިއެވެ.
ވަކީލުންގެ ޓީމުން ބުނެފައިވާގޮތުން ކޮމިޓީއަށް ހާޒިރުވެ ދެއްވި ބަޔާނުގައި ސޮއިކުރެއްވުމަށް ވަޑައިގަތުމުން އިސްލާހުކުރަންޖެހޭ ގިނަ ކަންތައްތަކެއް ހުރިކަން ފާހަގަކުރެވުނުކަމަށެވެ. އެހެންކަމުން އެކަންކަން އިސްލާހުކުރުމަށްފަހު ބަޔާން ފޮނުއްވައިދެއްވުމަށް އަޒްމިރަލްދާވަނީ ޖޭއެސްސީގައި އެދިވަޑައިގެންފައިކަމަށެވެ.
