ހުކުރު ދުވަހަކީ ބަންދު ދުވަހެއް ނަމަވެސް، ޕެރިޝަބަލް މުދާތައް ދޫކުރުމުގެ މަސައްކަތްތައް ކުރިޔަށް ގެންދާނެކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ބުނެފި އެވެ.
މީޑިއާތަކަށް ފޮނުވި މެސެޖެއްގައި އެމްޕީއެލް ބުނެފައި ވަނީ، ރަމަޟާން މަހާ ދިމާކޮށް އެތެރެކުރި ޕެރިޝަބަލް މުދާ ނުވަތަ އަވަހަށް ހަލާކުވާ ޒާތުގެ ކާބޯތަކެތީގެ ބާވަތްތައް ވީހާވެސް އަވަހަށް ފޯރުކޮށްދިނުމަށް މަސައްކަތް ކުރަމުންދާކަމަށެވެ. އެމްޕީއެލް ބުނި ގޮތުގައި މަސައްކަތް ކުރަމުން ދަނީ، ކަސްޓަމަރުންނަށް ވީހާވެސް އަވަހަށް މުދާ ފޯރުކޮށްދެވޭނެ ހާއްސަ އިންތިޒާމެއް ހަމަޖެއްސުމަށެވެ.
އެގޮތުން 28 ފެބްރުއަރީގައި މެންދުރު 14:30 އިން ރޭގަނޑު 22:00 އަށް ޕެރިޝަބަލް މުދާތައް ދޫކުރެވޭނެކަމަށް އެމްޕީއެލް ބުންޏެވެ.
އެމްޕީއެލް ވަނީ ކުރިޔަށް އޮތް ރޯދަ މަހާއި ދިމާކޮށް އެކި މުދާތައް ކްލިއަރ ކުރުމުގައި ހާއްސަ އިންތިޒާމުތައް ހަމަޖައްސާނެކަމަށް ބުނެފަ އެވެ. އަދި ކޮންމެ އަހަރެއްގެ ރޯދަމަހެއްގައި ވެސް އަންނަ ޕީކް ގަޑިތައް ދެނެގަނެ، އެ މައްސަލަތައް ހައްލު ކުރުމަށް މަސައްކަތް ކުރަމުން ގެންދާނެކަމަށް ވަނީ ބުނެފަ އެވެ.
