ސްޓޭޓް ޓްރޭޑިންގ އޮގަނައިޒޭޝަން (އެސްޓީއޯ) ގެ ޕެޓްރޯލް ޝެޑްތަކުން ޕެޓްރޯލް ވިއްކާ އަގު ހެޔޮކޮށްދީފިއެވެ.
އެސްޓީއޯއިން ބުނީ، އެ ކުންފުނީގެ ދަށުން ހިންގާ ޕެޓްރޯލް ޝެޑްތަކުން ޕެޓްރޯލް ވިއްކާ އަގު ހެޔޮކޮށްފައިވާ ކަމަށާއި، އެގޮތުން ލީޓަރަކުން 48 ލާރި އަގުހެޔޮވެފައިވާކަމަށެވެ.
މީގެ ކުރިން އެސްޓީއޯއިން ޕެޓްރޯލް ވިއްކަމުން އައީ ލީޓަރެއް 13.98 ރުފިޔާއަށެވެ. ނަމަވެސް މިހާރު ގެނެސްފައިމިވާ ބަދަލާއެކު، މިހާރުން ފެށިގެން ލީޓަރެއް 13.50 ރުފިޔާއަށް ލިބިގެންދާނެއެވެ.
އެސްޓީއޯއިން މައުލޫމާތު ދޭ ގޮތުގައި ޕެޓްރޯލްގެ އަގު ހެޔޮކޮށްފައިމިވަނީ ބައިނަލްއަޤުވާމީ ބާޒާރަށް ބަލާއިރު، އެސްޓީއޯއަށްވެސް ތެޔޮ ގަންނަން ލިބޭ އަގު ހެޔޮވެފައިވާތީއެވެ. އެހެންކަމުން މިހާރު މި ބަދަލާއެކު އެސްޓީއޯގެ ތެޔޮ ވިއްކާ ހުރިހާ ތަނަކުން އަގުހެޔޮކޮށް ޕެޓްރޯލް ލިބޭނެއެވެ.
ދުނިޔޭގެ ބާޒާރުގައި ތެލުގެ އަގު އުފުލުމާ ގުޅިގެން އެ ކުންފުންޏަށް ތެޔޮ ގަންނަން ލިބޭ އަގު ދޭތެރެ ދޭތެރެއިން ބޮޑުވެސް ވެއެވެ. އެހެންކަމުން ދުނިޔޭގެ ބާޒާރަށް އަންނަ ބަދަލުތަކަށް ބަލައި އެސްޓީއޯއިންވެސް ޑީސަލާއި ޕެޓްރޯލްގެ އަގަށް ބަދަލުތައް ގެނެއެވެ.
