އެމްޑީޕީން އަޑުއުފުލަމުންދަނީ އެ ޕާޓީގެ ވެރިކަމުގައި އިސްލާހުކޮށްފައިނުވާ ކަންތައްތަކެއް މި ސަރުކާރުގައި އިސްލާހުކުރަން ފެށުމުންކަމަށް ރައްޔިތުންގެ މަޖިލީހުގެ ފުނަދޫ ދާއިރާގެ މެމްބަރު މުހައްމަދު މަމްދޫހު ވިދާޅުވެއްޖެއެވެ.
ސަންގުޓީވީގެ ހަބަރަށްފަހު ޕްރޮގްރާމްގައި އެމްޑީޕީން ކުރިއަށް ގެންދާ ސިލްސިލާ މުޒާހަރާއިތަކާއި ގުޅޭގޮތުން ވާހަކަދައްކަވަމުން މެމްބަރު މަމްދޫހު ވިދާޅުވީ، އެމްޑީޕީ އިދިކޮޅު ޕާޓީއެއްގެ ގޮތުގައި އޮންނައިރު އެ ހައިސިއްޔަތުގައި އޮންނަ ޕާޓީއަކުން ހަރަކާތްތެރިވާންޖެހޭ ގޮތަށް އަމަލުކުރާ މަންޒަރު ފެނިގެން ނުދާކަމަށެވެ. އެގޮތުން މިހާރު ފެންނަމުންދަނީ ގާނޫނުއަސާސީއަށް އިސްލާހުތަކެއް ގެނެސް ރައްޔިތުންނަށް ބާރުތަކެއް ދިނުމުން އެކަމާއި ދެކޮޅަށް އެމްޑީޕީން ނުކުތް މަންޒަރުކަމަށް ފާހަގަކުރެއްވިއެވެ.
މެމްބަރު ވިދާޅުވީ، ހަގީގަތުގައި އެމްޑީޕީންވެސް އެފަދަ މަސައްކަތްތަކަށް އެއްބާރުލުން ދޭންޖެހޭނެކަމަށެވެ. މަމްދޫހު ވިދާޅުވީ، ރައްޔިތުންނަށް ބާރުތަކެއް ދެވިގެންދާއިރު އެމްޑީޕީންވެސް އެކަންކަން ޕްރޮމޯޓްކުރުމުގެ މަސައްކަތްތައް ކުރަންވާނެކަމަށެވެ. މެމްބަރު ވިދާޅުވީ، ރާއްޖޭގައި ތަރައްގީގެ މަސައްކަތްތަކެއް ކުރިއަށް ގެންދަންފަށާ ހިސާބުން އަބަދުވެސް ފެނިގެންދަނީ ސަރުކާރު ހިންގުމަށާއި އާންމު ރައްޔިތުންނަށްވެސް ދަތިވާނެހެން ގައުމު ހަލަބޮލި ކުރުމަށްޓަކައި އެމްޑީޕީން މަގުތަކަށް ނުކުމެ ހަރަކާތްތެރިވާ މަންޒަރުކަމަށެވެ.
މަމްދޫހު ވިދާޅުވީ، މިއަދުވެސް ތަކުރާރުވަމުންދަނީ ކުރީގެ ރައީސް އަބްދުﷲ ޔާމީން އަބްދުލް ގައްޔޫމްގެ ވެރިކަމުގެ ދައުރުގައިވެސް އެމްޑީޕީގެ ފަރާތުން ފެނިގެންދިޔަ ކަންތައްތަކެއްކަމަށެވެ. މެމްބަރު ވިދާޅުވީ، ރައީސް ޑރ މުހައްމަދު މުއިއްޒު ރާއްޖޭގެ ވެރިކަމުގެ ހުވާކުރެއްވި ދުވަހުން ފެށިގެންވެސް ސަރުކާރުން އެންމެ އިސްކަމެއް ދީގެން ކުރަމުންދާ އެއް މަސައްކަތަކީ ބޯހިޔާވަހިކަމުގެ މައްސަލައަށް ހައްލެއް ގެނައުމުގެ މަސައްކަތްތައްކަމަށާއި ނަމަވެސް އެ މަސައްކަތްތަކާއި އެމްޑީޕީގެ ދައުރުގައި ހުއްޓިފައިހުރި މަސައްކަތްތައް ފަށައިގަތް ހިސާބުން ފެނިގެން މިދަނީ އެކަންކަން ކުރިއަށް ގެންދިއުމަށް ޖާގަ ނުދިނުމުގެ ގޮތުން އެމްޑީޕީން ރާއްޖޭގެ ސިޔާސީ މަސްރަހު ހަލަބޮލިކޮށް މަގުތަކަށް ނުކުމެގެން ހަރަކާތްތެރިވާ މަންޒަރުކަމަށެވެ.
މެމްބަރު ވިދާޅުވީ، އެމްޑީޕީން މިއަދު އަޑުއުފުލަމުންދަނީ އެ ޕާޓީގެ ވެރިކަމުގައި އިސްލާހު ނުކުރެވުނު ކަންތައްތަކެއް މި ދައުރުގައި އިސްލާހުކުރަން ފެށުމުންކަމަށެވެ. ނަމަވެސް ރައްޔިތުންވަނީ 2023 ވަނަ އަހަރުގެ ތެރޭގައި ތަފާތު ބޮޑުކޮށް އެމްޑީޕީއަށް ނޫނެކޭ ބުނެފައިވާކަމަށާއި އެކަން އެޕާޓީން ގަބޫލުކުރަންޖެހޭކަމަށް ވިދާޅުވިއެވެ.
މަމްދޫހު ވިދާޅުވީ، ޖެހިގެން އައި އަހަރު ރައްޔިތުންވަނީ މަޖިލީހުގެ ސުޕަރ މެޖޯރިޓީވެސް ޕީއެންސީއަށް ދީފައިކަމަށާއި އެހެންކަމުން އެމްޑީޕީން އެކަން ގަބޫލުކުރަންޖެހޭކަމަށް ފާހަގަކުރެއްވިއެވެ. މެމްބަރު ވިދާޅުވީ، އެތައް ދޮގުތަކެއް ހަދައިގެން އެމްޑީޕީން މި ސަރުކާރު ހިންގުމަށް ޖާގަ ނުދިނުމަށް މަސައްކަތްކުރާ މަންޒަރު ފެނިގެންދާކަމަށެވެ.
