އެމްޑީޕީން އުސޫލުގެ ދަށުން ބަލަން ޖެހޭ ކަންކަން ބެލުމަށްފަހު ފްލެޓު ލިބޭކަމުގެ ލިސްޓު އިއުލާނުކޮށްފައިވާ ކަމަށާއި، އެހެންކަމުން އެ ލިސްޓު އަލުން މުރާޖައާ ކުރާކަށް ނުޖެހޭނެކަމަށް ހިތަދޫ ދެކުނު ދާއިރާގެ މެންބަރު އަދި އެމްޑީޕީގެ ޕާލަމެންޓަރީ ގްރޫޕްގެ ލީޑަރު އިބްރާހިމް ނާޒިލް ވިދާޅުވެއްޖެއެވެ.
ސަންގުޓީވީގެ ޚަބަރަށްފަހު ޕްރޮގްރާމްގައި ނާޒިލް ވިދާޅުވީ، ބޯހިޔާވަހިކަމަކީ ނުހަނު ހައްސާސް މައްސަލައެއް ކަމަށާއި، އެހެންނަމަވެސް ރައްޔިތުންގެ މަޖިލީހުން އެކުލަވާލާފައިވާ ހައުސިންގ ކަންކަމާ ބެހޭ ކޮމިޓީގެ ބައްދަލުވުމެއްވެސް ނުބާއްވާތާ އެތައް ދުވަހެއް ވެފައިވާ ކަމަށެވެ. އެ ކޮމިޓީ އެއްވެސް ވަރަކަށް ނުހިނގާކަމުގެ ކަންބޮޑުވުން ނާޒިލް ވަނީ ހިއްސާ ކުރައްވާފައެވެ.
ބޯހިޔާވަހިކަމަކީ ވަރަށް ހައްސާސް މައްސަލައެއް ރާއްޖޭގައި، ޚާއްސަކޮށް މާލޭގައި
ނާޒިލް ވިދާޅުވީ، މި ދަނޑިވަޅަކީ ހަގީގަތުގައި ކޮމިޓީގެ މަސައްކަތްތައް އެންމެ ރަނގަޅަށް ހިނގަންޖެހޭ ދަނޑިވަޅު ކަމަށެވެ. އެގޮތުން ރައްޔިތުންގެ މަންދޫބުންގެ ޙައިސިއްޔަތުން މިކަމުގައި އެންމެ އިންސައްތައަކަށްވެސް މަސައްކަތް ނުކުރެވޭކަމަށް ނާޒިލް ވިދާޅުވިއެވެ.
ނާޒިލް ވަނީ މިދިޔަ ސަރުކާރުގައި ފްލެޓުތައް ދިނުމުގެ ކަންކަން ކުރިއަށް ދިޔަ ގޮތަށްވެސް އަލިއަޅުވާލައްވާފައެވެ. އެގޮތުން 2018 ގައި ވެރިކަން ބަދަލުވިއިރު ހިޔާ ފްލެޓުތަކުގެ މަސައްކަތް ކުރިއަށްދިޔަ ޙާލަތާއި މިހާރުގެ ޙާލަތު ތަފާތުކަމަށްވެސް ނާޒިލް ވިދާޅުވިއެވެ.
ނާޒިލް ވިދާޅުވީ، އެމްޑީޕީން އުސޫލުގެ ދަށުން ބަލަން ޖެހޭ ކަންކަން ބެލުމަށްފަހު ފްލެޓު ލިބޭކަމުގެ ލިސްޓު އިއުލާނު ކޮށްފައިވާ ކަމަށާއި، އެހެންކަމުން އެ ލިސްޓު އަލުން މުރާޖައާ ކުރާކަށް ނުޖެހޭނެ ކަމަށެވެ. ވަކިން ޚާއްސަކޮށް މިހާރުވެސް އެ މަސައްކަތް އެތައް ގުނައެއް ލަސްވެގެން ގޮސްފައިވާކަމަށްވެސް އޭނާ ވިދާޅުވިއެވެ.
ނާޒިލް ވިދާޅުވީ، މި ސަރުކާރުން ރައްޔިތުންނަށް އޮޅުވާލުމަށް މަސައްކަތް ކުރަމުންދާއިރު، މަޖިލީހުގެ ހައުސިންގ ކޮމިޓީން އެކަމުގައި އެއްވެސް ފިޔަވަޅެއް އެޅުމަށް މަސައްކަތް ނުކުރުމަކީ ކަންބޮޑުވެވަޑައިގަންނަވާ ކަމެއް ކަމަށެވެ.
ސަރުކާރަކުން ދީފައިވާ ލިއުމެއް، އެ ލިއުމެއް އަލުން އަނބުރާ ނަގަންޖެހޭ ސަބަބެއް އެބައޮތްތޯ
ގެދޮރުވެރިޔާ ސްކީމުން 4،000 ފްލެޓް ލިބޭކަމަށް ކުރީ ސަރުކާރުން ކަނޑައެޅި ބައެއް މީހުން ހިމަނައިގެން ރައީސުލްޖުމްހުރިއްޔާ ޑރ. މުހައްމަދު މުއިއްޒުގެ ސަރުކާރުން ފަހުން އެކުލަވާލި ލިސްޓަށް ޝަކުވާ ހުށަހެޅުމަށް ދިން މުއްދަތު ވަނީ އިތުރުކޮށްދީފައެވެ.
އައު ފްލެޓް ލިސްޓް ސަރުކާރުން ހާމަކުރީ މިދިޔަ މަހުގެ 27 ވަނަ ދުވަހުއެވެ. ޝަކުވާ ހުށައެޅުމަށް ފުރުސަތު ހުޅުވާލީ މިމަހުގެ 31 ވަނަ ދުވަހުގެ ނިޔަލަށެވެ. ނަމަވެސް ހައުސިން މިނިސްޓްރީން ވަނީ އެ މުއްދަތު ކުރިއަށް އޮތް އޭޕްރީލް 15 ވަނަ ދުވަހުގެ ނިޔަލަށް އިތުރުކޮށްފައެވެ.
ޝަކުވާ ހުށަހެޅުމުގެ މުއްދަތު އިތުރުކުރީ މި މަހުގެ 20 ވަނަ ދުވަހުން ފެށިގެން އަންނަ މަހުގެ ހަވަނަ ދުވަހުގެ ނިޔަލަށް ސަރުކާރު ބަންދުވާތީއެވެ.
ބޯހިޔާވަހިކަމަށް ހާއްސަ ސަމާލުކަމެއް ދީ، ދައުރު ނިމުމުގެ ކުރިން އެންމެ ގިނަ ހައުސިން މަޝްރޫއުތައް ހިންގައި މައްސަލަ ހައްލު ކުރުމަކީ މި ސަރުކާރުގެ ރިޔާސީ ވައުދެކެވެ. އެގޮތުން ހިނގަމުން މިދާ 2025 ވެގެން ދާނީ ރައީސް މުއިއްޒު ވިދާޅުވި ގޮތުގައި އެންމެ ގިނަ ހައުސިންއާއި ގުޅުން ހުރި ޕްރޮޖެކްޓުތައް ހިނގާނެ އަހަރަށެވެ.
ކުރީ ސަރުކާރުން ގެދޮރުވެރިޔާ ސްކީމްގެ ދަށުން ދޫކުރި ފްލެޓުތަކުގައި ބޮޑެތި އޮޅުވާލުންތަކެއްވާކަމަށް ތުހުމަތު ކުރެވޭތީ، އެންޓި ކޮރަޕްޝަން ކޮމިޝަނުނުން އައީ މައްސަލަ ތަހުގީގު ކުރަމުންނެވެ. އަދި ފްލެޓު ލިބުނުކަމުގެ ލިސްޓުގައި ނަން ހިމެނޭ ގިނަ މީހުން ޝަރުތު ހަމަނުވާއިރު ދޮގު ލިޔެކިއުންތައް ނުވަތަ ސައްހަ ނޫން ލިޔެކިއުންތައް އުފައްދައިގެން ހުށަހެޅިކަމުގެ ތުހުމަތު ކުރެވެއެވެ.
މި މައްސަލައިގައި ރައީސް މުއިއްޒު ވިދާޅުވީ، އެމަނިކުފާނު ފްލެޓު ހަވާލު ކުރައްވާނީ އެންމެ އިންސާފުވެރި ގޮތަށް ބަލައިކަމަށެވެ. އަދި ކުރީ ސަރުކާރުން ގެޒެޓު ކުރި ލިސްޓާއި ގުޅޭގޮތުން ވިދާޅުވެފައި ވަނީ އިންސާފުވެރިކޮށް އޮންނަ އުސޫލުގެ ތެރެއިން ފްލެޓު ލިބުނު އެއްވެސް ފަރާތެއްގެ ނަން ލިސްޓު އުނި ނުވާނެކަމަށެވެ.
ކުރީގެ ރައީސް އިބްރާހިމް މުހައްމަދު ސާލިހުގެ ވެރިކަމުގެ ދައުރުގައި ދޫކުރި 4،000 ފްލެޓު ދީފައިވަނީ ޝަރުތު ހަމަވާ މީހުންނަށް ނޫންކަމަށް ބުނެ، އެކަމުގައި މައްސަލަތަކެއް އެބަހުރިކަމަށް ފާހަގަކޮށް މި ސަރުކާރުން ވަނީ ފްލެޓު ލިސްޓް އަލުން ރިއިވެލުއޭޓުކޮށްފައެވެ. ކުރިން ފްލެޓް ލިބޭނެކަމަށް ކަނޑައަޅާފައި ވީ ނަމަވެސް ޝަރުތު ހަމަވީ އޭގެ ތެރެއިން 1،820 މީހުންނެވެ.
