މޯލްޑިވްސް އިމިގްރޭޝަންގެ އޮފިޝަލުންތަކެއް މަގާމުގެ ނުފޫޒާއި ބާރު ބޭނުން ކުރިކަމުގެ ތުހުމަތު ކުރެވޭ މައްސަލައިގައި ދެމީހެއްގެ ޕާސްޕޯޓު ހިފަހައްޓައިފިއެވެ.
މޯލްޑިވްސް އިމިގްރޭޝަންގެ ބައެއް މުވައްޒަފުން މަޤާމުގެ ނުފޫޒު ނަހަމަ ގޮތުގައި ބޭނުންކޮށް، ބިދޭސީ މަސައްކަތްތެރިންގެ އަތުން ނާޖާއިޒު މަންފާ ހޯދަމުންދާކަމަށް ތުހުމަތު ކުރެވޭ މައްސަލަތަކެއް ދިވެހި ފުލުހުންގެ ޚިދުމަތުން ގެންދަނީ ތަހުގީގު ކުރަމުންނެވެ.
އެކަމުގެ ފަހުގެ މައުލޫމާތު ހިއްސާކުރަމުން ފުލުހުންގެ މީޑިއާ އޮފިޝަލު ވިދާޅުވީ، އެ މައްސަލައާ ގުޅިގެން ކޯޓު އަމުރެއްގެ ދަށުން ދެމީހަކު ފުރުން މަނާކޮށްފައިވާ ކަމަށެވެ. ނަމަވެސް އެއީ ކޮން ބައެއްކަން ފުލުހުން ސާފުކޮށްދީފައެއް ނުވެއެވެ.
މީގެ އިތުރުން، ކުރީގެ ކޮންޓްރޯލަރ ޖެނެރަލް އޮފް އިމިގްރޭޝަން ގެ އާއިލާ މެމްބަރެއްގެ ފޯނު ކޯޓު އަމުރެއްގެ ދަށުން ފުލުހުންގެ ބެލުމުގެ ދަށަށް ގެނެސްފައިވާކަމަށްވެސް ފުލުހުން ހިއްސާ ކޮށްފައިވެއެވެ.
ޝަމްއާން މަގާމުން ކުއްލި ގޮތަކަށް ވަކި ކުރީ ނުފޫޒު ނަހަމަ ގޮތުގައި ބޭނުންކޮށްގެން ގަވައިދާ ހިލާފަށް އޮޕަރޭޝަނެއް ހިންގައި ބިދޭސީންތަކެއް އުޅޭ ގެއެއް ބަލައި ފާސްކޮށް ނަގުދު ފައިސާއާ އެކު އެ ބިދޭސީންތައް ގެންދިޔުމަށް ފަހު ހިނގި ކަންތަކާއި ގުޅުވައެވެ.
ޓާސްކް ފޯސް އަދި ރިސްކު މެނޭޖުމަންޓްގެ ޑިޕާޓްމަންގައި ނުހިމެނޭ އޮފިސަރުންތަކެއް ކުރި އެ ރެއިޑުގެ މައްސަލަ ވެސް ފުލުހުން ދަނީ ތަހުގީގު ކުރަމުންނެވެ. އަދި އެ މައްސަލައިގައި ތިން އޮފިސަރަކު ހައްޔަރުކޮށް ބަންދު ޖަހާފައި ވެއެވެ.
އެ ރެއިޑުން ހިފެހެއްޓި ބިދޭސީންތަކުގެ ތެރެއިން 530،000ރ. އާ އެކު ޑިޓެންޝަނަށް ގެންދިޔަ ބިދޭސީ މިހާ ދޫކޮށްލީ ފުލުހުން ބުނި ގޮތުގައި ޝަމްއާންގެ އެންގުމަށެވެ. އަދި ބިދޭސީން އުޅުނު ގެ ބަލައި ފާސްކުރި އިމިގްރޭޝަންގެ މުވައްޒަފުން ޑިޓެއިނުން ދޫކޮށްލި ބިދޭސީމީހާއާ މަގުމަތިން ބައްދަލުކޮށް އެ ފައިސާ ހިފައިގެން ގޮސް ވަނީ ޝަމްއާން ދިރިއުޅޭ ގެއަށެވެ.
ޝަމްއާން ދިރިއުޅޭ ގެއިން ވެސް ބައި މިލިއަނެއްހާ ރުފިޔާއާއި، ޑޮލަރު ފެނުނުކަމަށް މައުލޫމާތު ލިބެއެވެ. އަދި ފުލުހުން ވަނީ ޝަމްއާންގެ އެޕާޓްމަންޓު ބަލައި ފާސްކޮށް އިލެކްޓްރޯނިކް ސާމާނު ވެސް ގެންގޮސްފަ އެވެ.
މަގާމުގެ ނުފޫޒާއި ބާރު ބޭނުން ކުރިކަމުގެ ތުހުމަތު ކުރެވޭ ކުރީގެ އިމިގްރޭޝަން ކޮންޓްރޯލަރު މުހައްމަދު ޝަމްއާން ވަހީދުގެ ބަންދަށްވެސް 15 ދުވަސް ކްރިމިނަލް ކޯޓުން ވަނީ ޖަހާފައެވެ.
