ރައްޔިތުންގެ މަޖިލީހުގެ މެމްބަރުން ސިޔާސީ ޕާޓީ ބަދަލު ކުރުމުން ގޮނޑި ގެއްލޭ ގޮތަށް ގާނޫނުއަސާސީއަށް އިސްލާހު ގެނެސްފައި ވަނީ ރިޝްވަތު ނަގައި ފިކުރު ބަދަލު ކުރުން ހުއްޓުވުމަކަށް ގެނައުމަށްކަމަށް ފޭދޫ ދެކުނު ދާއިރާގެ މެމްބަރު އިބްރާހިމް ދީދީ (އައިބީ) ވިދާޅުވެއްޖެއެވެ.
ރައީސް ޑރ. މުހައްމަދު މުއިއްޒު ވެރިކަމުގެ ހުވާ ކުރެއްވުމަށް ފަހު، ދެއްވި ބަޔާނުގައި ރައްޔިތުންނަށް ދެއްވި އެންމެ ބޮޑު ޔަގީންކަމަކީ ޝަރުއީ ދާއިރާގެ މިނިވަންކަމެވެ. އަދި ކޯޓުތަކަށް ނުފޫޒު ފޯރުވުމާއި، ކުދި ކުދި މައްސަލަތަކާއި ގުޅުވައި ފަނޑިޔާރުންނަށް ބިރު ދައްކައި ވަކި ކުރުމުގެ އެއްވެސް އަމަލެއް މި ސަރުކާރުގައި ނުހިނގާނެކަމަށް އެމަނިކުފާނު ވިދާޅުވި އެވެ.
މިދިޔަ މަހެއް ހާ ދުވަހުން ފެށިގެން، އެންމެ ބާރަށް ދެކެވޭ ވާހަކައަކީ ސަރުކާރުން ފަނޑިޔާރުންނަށް ނުފޫޒު ފޯރުވުމުގެ ވާހަކައެވެ. ސުޕްރީމް ކޯޓުގެ ތިން ފަނޑިޔާރަކު ސަސްޕެންޑުކޮށް، ޖޭއެސްސީން ބަލަމުންދާ މައްސަލަތައް ގުޅެނީ އެ ކޯޓުގައި ކުރިޔަށް ދާ ގާނޫނުއަސާސީއަށް އިސްލާހު ގެނައި މައްސަލައާއިކަމަށް ގިނަ ބަޔަކު ދެކެއެވެ.
ފާޑުކިއުންތަކަށް ރައްދު ދެއްވައި، ސަންގުޓީވީގެ ޚަބަރަށްފަހު ޕްރޮގްރާމުގައި އައިބީ ވިދާޅުވީ ރައީސް މުއިއްޒަކީ ކޯޓުތަކަށް ނުފޫޒު ފޯރުވާނެ ވެރިއެއް ނޫންކަމަށެވެ.
ދީދީ ވިދާޅުވީ ރާއްޖޭގައި ކޯޓުތަކުގައި މައްސަލަތައް ހިނގަމުން ދަނީ ވެސް އެދެވޭ ގޮތަކަށް ނޫންކަމަށެވެ. އެގޮތުން ރައްޔިތުންނާއި ގުޅުން ހުރި، އެތައް މައްސަލައެއް ކޯޓުތަކުގައި ތާށިވެފައި ހުންނަތާ އެތައް އަހަރެއްވީއިރު ސުޕްރީމް ކޯޓަކީ އޭގެއިން އެއް ތަންކަމަށް އައިބީ ވިދާޅުވި އެވެ.
ދެން ފަނޑިޔާރުން ވެސް ރާއްޖޭގައި ކަންކަން މި ކުރައްވަނީ ވެސް ރަނގަޅަކަށް ނޫން.. މިސާލަކަށް ތިބޭފުޅުން ބައްލަވާ ސުޕްރީމް ކޯޓުގައި ކިތަށް މައްސަލަ އެބައޮތް.. އާންމު ރައްޔިތުންގެ ކިތައް މައްސަލަ އެބައޮތް. ފަސް އަހަރު، ހަ އަހަރު، އަށް އަހަރު ވެގެންދާއިރު ވެސް އޭގެއިން މައްސަލައެއް ނުބެލޭ.. ފަނޑިޔާރުން އެ މައްސަލައެއް ނުބަލާ..
އައިބީ ވިދާޅުވީ އިސްލާމްދީނާއި ހިލާފު ނުވާ ގޮތެއްގެ މަތީން، ގާނޫނުއަސާސީއަށް އިސްލާހުތައް ގެނެވޭނެ ކަމަށެވެ. އަދި ގާނޫނަށް ގެންނަ ބަދަލުތަކާއި ގުޅުވައި، އެމްޑީޕީން ނުރުހުންފާޅު ކުރާއިރު މަޖިލީހުގެ ސުޕަ މެޖޯރިޓީގެ ބޭނުން ނަހަމަ ގޮތުގައި ހިފައި އިސްލާހުތައް ގެނައި ބަޔަކީ އެއީކަމަށް އައިބީ ވިދާޅުވި އެވެ.
މީގެއިތުރުން އައިބީ ވިދާޅުވީ ގާނޫނުއަސާސީއަށް ގެނައި އިސްލާހަކީ، ގޯސް އިސްލާހެއް ނޫންކަމަށެވެ. ރައްޔިތުންގެ މަޖިލީހުގެ މެމްބަރުން ރިޝްވަތު ނަގައި ޕާޓީ ބަދަލު ކުރުމުގެ ސަގާފަތް ނިމުމަކަށް ގެނައުމަށް އިސްލާހު ގެނައުމުން އެމްޑީޕީން އެކަމާއި ދެކޮޅަށް ތެދުވާން ވީ ކޮން ސަބަބަކާއި ހުރެތޯ އައިބީ ސުވާލު އުފެއްދި އެވެ.
އައިބީ ވިދާޅުވީ އެންޓި ޑިފެކްޝަންގެ ގާނޫނު އޮންނަން ޖެހޭކަމަށް ވެރިކަމުގައި އޮވެ އެމްޑީޕީ ގަބޫލު ކުރިކަމަށެވެ. އެހެންކަމުން މިއަދު އިދިކޮޅުގައި އެ ޕާޓީ އޮތުމަކީ ކުރިން ގެންގުޅެމުން އައި ސިޔާސަތެއް ދޫކޮށްލަން ޖެހޭ ސަބަބެއް ނޫންކަމަށް އައިބީ ވަނީ ވިދާޅުވެފަ އެވެ.
