ހަގީގީ މާނައިގައި ބޯހިޔާވަހިކަން ފޯރުކޮށްދީ، ރައްޔިތުންގެ ކަންބޮޑުވުންތައް ހައްލު ކުރާނީ މި ސަރުކާރުންކަމަށް މަތިވެރި ދާއިރާގެ ޕީއެންސީގެ މެމްބަރު ހަސަން ޒަރީރު ވިދާޅުވެއްޖެ އެވެ.
ސަންގުޓީވީގެ ޚަބަރަށްފަހު ޕްރޮގްރާމުގައި ޒަރީރު ވިދާޅުވީ، ހިނގަމުން މިދާ އަހަރަކީ ރާއްޖޭގެ ތާރީހުގައި ވެސް ބޯހިޔާވަހިކަމުގެ އެންމެ ގިނަ މަޝްރޫއުތައް އެއްފަހަރާ ފެށިގެން ކުރިޔަށް ދާނެ އަހަރުކަމަށެވެ. އަދި ބަޖެޓުގައި ވެސް ބޯހިޔާވަހިކަމަށް ހާއްސަ އިސްކަމެއް ދެވިފައިވާއިރު ރައީސް ޑރ. މުހައްމަދު މުއިއްޒުގެ ފަސް އަހަރުގެ ދައުރުގައި ބޯހިޔާވަހިކަން ބޭނުންވެ، އެތަން ނުލިބިވާ އެއްވެސް ރައްޔިތެއް ނުހުންނާނެކަމަށް ޒަރީރު ވިދާޅުވި އެވެ.
ޒަރީރު ވިދާޅުވީ އަލަށް ގެދޮރު އެޅުމަށް ދޫކުރާ ލޯނާއި އެކު، މި ސަރުކާރުން ގެދޮރުގެ މަސައްކަތް މާލީ އެކި ސަބަބުތަކާއި ހުރެ ހުއްޓިފައިވާ އާއިލާތަކަށް ވެސް އެހީތެރިކަން ފޯރުކޮށްދޭނެކަމަށެވެ. އަދި ސޯޝަލް ހައުސިންގެ މަޝްރޫއުތައް އަތޮޅު ތެރޭގައި ކުރިޔަށް ގެންގޮސް، ބިމުގެ ދަތިކަން ދިމާވެފައިވާ ރަށްތަކުގައި ބިން ހިއްކައި ގޯތި ދޫކުރެވޭނެކަމަށް ޒަރީރު ވިދާޅުވި އެވެ.
އެހެންވީމަ ގެދޮރުވެރިކަމުގެ މައްސަލައަށް ވެސް ހަގީގީ މާނައިގައި ހައްލު ގެނައުމަށް ވަނީ ޕްލޭން ކުރެވިފައި.. އެކަން ކުރަން އެނގިގެން، ބަޖެޓުކޮށްގެން އެ މަސައްކަތް އަޅުގަނޑުމެން ކުރިޔަށް މި ގެންދަނީ..
ބޯހިޔާވަހިކަން ދިނުމުގައި ސަރުކާރުގެ އިހުލާސްތެރިކަމެއް ނެތްކަމަށް ނުވަތަ ފްލެޓުތައް ދޫނުކުރާނެކަމަށް ކުރާ ތުހުމަތުތަކަށް ޒަރީރު ވިދާޅުވީ ފްލެޓާއި ގޯތީގެ ލިސްޓު އޮޅުވާލީ އެމްޑީޕީކަމަށެވެ. އަދި ބޭނުން ބަޔަކަށް ފްލެޓުތައް ދޫކޮށް، ސިޔާސީ ބޭނުމެއްގައި އެކަން ކުރައްވަމުން ގެންދެވީ ވެސް އެމްޑީޕީކަމަށް ޒަރީރު ވިދާޅުވި އެވެ.
”ގެދޮރުވެރިޔާ“ ސްކީމުން 4،000 ފްލެޓް ލިބޭކަމަށް ކުރީ ސަރުކާރުން ކަނޑައެޅި ބައެއް މީހުން ހިމަނައިގެން ރައީސުލްޖުމްހުރިއްޔާ ޑރ. މުހައްމަދު މުއިއްޒުގެ ސަރުކާރުން ފަހުން އެކުލަވާލި ލިސްޓަށް ޝަކުވާ ހުށަހެޅުމަށް މިހަރު ވަނީ ހުޅުވާލާފަ އެވެ.
އައު ފްލެޓް ލިސްޓް ސަރުކާރުން ހާމަކުރީ މިދިޔަ މަހުގެ 27 ވަނަ ދުވަހުއެވެ. ޝަކުވާ ހުށައެޅުމަށް ފުރުސަތު ހުޅުވާލީ މިމަހުގެ 31 ވަނަ ދުވަހުގެ ނިޔަލަށެވެ. ނަމަވެސް ހައުސިން މިނިސްޓްރީން މިއަދު ވަނީ އެ މުއްދަތު ކުރިއަށް އޮތް އޭޕްރީލް 15 ވަނަ ދުވަހުގެ ނިޔަލަށް އިތުރުކޮށްފައެވެ.
ޝަކުވާ ހުށަހެޅުމުގެ މުއްދަތު އިތުރުކުރީ މި މަހުގެ 20 ވަނަ ދުވަހުން ފެށިގެން އަންނަ މަހުގެ ހަވަނަ ދުވަހުގެ ނިޔަލަށް ސަރުކާރު ބަންދުވާތީއެވެ.
ހައުސިންގ މިނިސްޓްރީން މައުލޫމާތު ދޭ ގޮތުގައި މިހާތަނަށް 675 މީހަކު ޝަކުވާ ހުށަހަޅާފައިވާއިރު، އޭގެ ތެރޭގައި ތިން ކޮޓަރީގެ ފްލެޓް ލިސްޓާ ގުޅޭ 452 ޝަކުވާ އަދި ދެ ކޮޓަރީގެ ފްލެޓް ލިސްޓާ ގުޅޭ 223 ޝަކުވާ ހިމެނެއެވެ.
