ސްޓެލްކޯގެ މެނޭޖިން ޑިރެކްޓަރުކަމާއި ހަވާލުވުމަށް ފަހު، ހުޅުމާލެއިން އެޕާޓްމަންޓެއް ގަނެފައިވާކަމަށް ބުނެ ކުރާ ތުހުމަތުތައް އެ ކުންފުނީގެ މެނޭޖިން ޑިރެކްޓަރ ހުސެއިން ފަހުމީ ދޮގު ކުރައްވައިފި އެވެ.
ފްލެޓެއް ބައްލަވައިގެންފައިވާކަމަށް ދެކެވޭ ވާހަކަތައް ދޮގުކޮށް، ފަހުމީ މިރޭ ވިދާޅުވީ މިއީ އޭނާގެ އަބުރަށް އަރައިގަނެ ސިޔާސީ މަގްސަދެއް ހާސިލު ކުރުމުގެ ނިޔަތުގައި ބަޔަކު ފަތުރަމުންދާ ވާހަކައެއް ކަމަށެވެ.
މިއީ އަސާސެއް ނެތް ދޮގު ވާހަކަތަކެއްކަމަށް ތަކުރާރު ކުރައްވައި ފަހުމީ ވިދާޅުވީ މި ދޮގު ފަތުރާ ފަރާތްތަކުން އިޝާރާތް ކުރާ ފްލެޓަކީ މީގެ އަހަރުތަކެއް ކުރިން ގަނެފައިވާ ފްލެޓެއް ކަމަށެވެ.
ސްޓެލްކޯގެ މެނޭޖިންގ ޑިރެކްޓަރުގެ މަޤާމާ ހަވާލުވުމަށްފަހު 8.5 މިލިއަން ރުފިޔާއަށް ފްލެޓެއް ގަތްކަމަށް ބުނެ، ބައެއް ފަރާ ފަރާތްތަކުން އަޅުގަނޑުގެ އަބުރަށް އަރައިގަނެ، ސިޔާސީ މަޤްޞަދެއް ހާސިލުކުރުމަށް ފަތުރަމުންދާ ވާހަކައަކީ ޙަޤީޤަތާ ޚިލާފު، އަސާސެއްނެތް ދޮގު ވާހަކައެއްކަން ދަންނަވަން. މި ދޮގު ވާހަކަ ފަތުރާ ފަރާތްތަކުން އިޝާރާތްކުރާ ފްލެޓަކީ، ކުރީގެ ރައީސް ޔާމީންގެ ވެރިކަމުގައި، މީގެ އަހަރުތަކެއް ކުރިން އަޅުގަނޑު ގަނެ، ފައިސާ ދައްކަމުން އައިސްފައިވާ ފްލެޓެއް.
ފަހުމީ ވިދާޅުވި ގޮތުގައި އެ ފްލެޓު ގަނެ ފައިސާ ދައްކަމުން ދަނީ ކުރީގެ ރައީސް އަބްދުﷲ ޔާމީންގެ ވެރިކަމުގެ ދުވަސްވަރުން ފެށިގެންނެވެ. އެހެންކަމުން ސިޔާސީ މަގްސަދެއް ހާސިލު ކުރުމަށް މީހުންގެ އަބުރަށް ހުތުރުވާ ގޮތަށް އެފަދަ ވާހަކަ ނުފެތުރުމަށް ފަހުމީ ގޮވާލެއްވި އެވެ.
ފަހުމީ ވިދާޅުވީ ސިޔާސީ ގޮތުންނާއި އެ ނޫން ވެސް ގޮތަކުން ވިޔަސް ސްޓެލްކޯގެ މެނޭޖިން ޑިރެކްޓަރުކަމުގައި ކުރައްވާ މަސައްކަތާއި ގުޅުވައި ކިޔާ ބިނާ ކުރަނިވި ފާޑުކިއުންތަކަށް އަބަދުވެސް މަރުހަބާ ކިޔާނެ ކަމަށެވެ.
