ކޮންޓްރެކްޓަރ ފައިނޭންސް އުޞޫލުން ޢިމާރާތް ކުރުމަށް ހަމަޖެހިފައިވާ 55 ކައުންސިލް އިދާރާގެ ތެރޭގައި ހިމެނޭ 6 އަތޮޅެއްގައި ޢިމާރާތްކުރުމަށް ހަމަޖެހިފައިވާ ކައުންސިލް އިދާރާތަކުގެ މަސައްކަތްކޮށްދޭނެ ފަރާތެއް ހޯދުމަށް އެ ރަށްރަށުގެ ކައުންސިލްތަކަށް ދެންނެވިފައިވާނެ ކަމަށް މިނިސްޓަރ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވާރކްސް އާދަމް ޝަރީފު ޢުމަރު ހާމަކުރައްވައިފިއެވެ.
މިނިސްޓަރ މިކަން ހާމަކުރެއްވީ ރޭ އެކްސްގައި ހިއްސާކުރެއްވި ޕޯސްޓެއްގައެވެ. މިނިސްޓަރގެ މި ޕޯސްޓްގައި، މި މަސައްކަތުގައި އުތީމު ކައުންސިލް ވަރަށް ކުރީގައި އޮތްކަން ހާމާކުރައްވާފައިވެސްވެއެވެ.
މަސައްކަތް ކޮށްދޭނެ ފަރާތްތައް ހޯދުމަށް އެދިފައިވަނީ ހއ. އަތޮޅާއި، ހދ. އަތޮޅާއި، ށ. އަތޮޅާއި، ނ. އަތޮޅާއި، ރ. އަތޮޅައި އަދި ދ. އަތޮޅު ކައުންސިލްގައެވެ.
ކޮންޓްރެކްޓަރ ފައިނޭންސް އުޞޫލުން ބިނާކުރުމަށް ހަމަޖެހިފައިވާ 55 ކައުންސިލް އިދާރާގެ ތެރެއިން މިހާތަނަށް އައިއިރު ވަނީ 13 ރަށެއްގެ ކައުންސިލް އިދާރާގެ ބިންގާ އެޅިފައެވެ. ބިންގާ ނޭޅި ހުރި ރަށްތަކުގެ ބިންގާ ވެސް ކައިރި ތާރީޚެއްގައި އެޅިގެންދާނެކަމަށް ސަރުކާރުން ލަފާ ކުރެއެވެ.
މެލޭސިއާގެ ހެކްސްޓަރ ގްލޯބަލްއާ ޙަވާލުކުރެވިގެން ކުރިއަށް ގެންދާ 55 ކައުންސިލް އިދާރާގެ، ޕްރޮޖެކްޓަކީ ދެ އަހަރާއި ބައިން ނިންމާ ގޮތަށް ޙަވާލުކުރެވިފައިވާ ޕްރޮޖެކްޓެކެވެ. މި ޕްރޮޖެކްޓުގެ ދަށުން އެޅޭ ޢިމާރާތްތަކަކީ ޖާގައިގެ ގޮތުން ތަނަވަސް، އަދި ވަޞީލަތްތައް ޤާއިމްކުރެވިގެންދާނެ އޮފީސްތަކެކެވެ.
