ބަންކަރިންގެ ހިދުމަތް ލިބިގަތުމަށް ރާއްޖެއަށް އަންނަ އުޅަނދުފަހަރާއި ދަތުރުވެރިން އަދި ފަޅުވެރިންނަށް އިމިގްރޭޝަންގެ ހިދުމަތްތައް ދިނުމަށްޓަކައި އައު އިމާރާތެއް އެޅުމަށް ސަރުކާރުން ނިންމައިފިއެވެ.
އިމިގްރޭޝަންއިން އާންމުކޮށްފައިވާގޮތުން ރައީސް ޑރ މުހައްމަދު މުއިއްޒުގެ އިރުޝާދުފުޅުގެ މަތިން އިހަވަންދިއްޕޮޅުގައި ފަށާފައިވާ ބަންކަރިންގެ ހިދުމަތްތަކާއި ގުޅިގެން ބޭރު ގައުމުތަކުން ރާއްޖެއަށް ޒިޔާރަތްކުރާ އުޅަނދުފަހަރާއި ފަޅުވެރިން އަދި ދަތުރުވެރިންނަށް ކްލިއަރެންސް ދިނުމުގެ މަސައްކަތްތައް އިތުރަށް ފުޅާކުރުމަށްޓަކައި މަސައްކަތްތަކެއް ކުރިއަށް ގެންދިއުމަށް ނިންމާފައިވާކަމަށެވެ. އެގޮތުން ހއ އުލިގަމުގައި ހިދުމަތްތައް ފޯރުކޮށްދިނުމަށްޓަކައި އައު އިމާރާތެއް އެޅުމަށްޓަކައި އެމްޓީސީސީ އާއިއެކު ރަސްމީގޮތުން އެއްބަސްވުމެއް ގާއިމުކުރެވިފައިވާކަމަށެވެ.
އެ މުއައްސަސާއިން ބުނެފައިވާގޮތުން މިވަގުތު އުލިގަމުގައި ދެ އޮފިސަރުން ތިބޭއިރު ދެމުން އަންނަ ހަމައެކަނި ހިދުމަތަކީ ސީޕޯޓުގެ ހިދުމަތްކަމަށެވެ. ނަމަވެސް އައު އިމާރާތެއް ބިނާކުރުމާއިއެކު ޕާސްޕޯޓު އަދި ވިސާ ފަދަ އެހެނިހެން ހިދުމަތްތައްވެސް ލުއިފަސޭހަކަމާއިއެކު ފޯރުކޮށްދެވޭނެކަމަށެވެ. އެހެންކަމުން ހިހަވަންދިއްޕޮޅުގައި އެ މުއައްސަސާގެ ހިދުމަތްތައް އިތުރެަށް ފުޅާކުރެވި ތަރައްގީވެގެންދާނެކަމަށް ފާހަގަކޮށްފައިވެއެވެ.
