މާރާމާރީގެ މައްސަލައެއްގައި ހައްޔަރުކުރެވުނު 45 އަހަރުގެ ދިވެހި ފިރިހެނަކު، ކޯޓުގެ ޙުރުމަތް ކެނޑުމާ ގުޅިގެން ޝަރީއަތުން ވަކިގޮތެއް ކަނޑައަޅަންދެން ބަންދުގައި ބެހެއްޓުމަށް ކްރިމިނަލް ކޯޓުން އަމުރުކޮށްފިއެވެ.
ކޯޓު އަމުރުގައި ފާހަގަކޮށްފައިވާ ގޮތުގައި، މި މީހާގެ މައްޗަށް ތުހުމަތުކުރެވޭ މާރާމާރީގެ ކުށް ކުރިކަމަށް ކޮންމެވެސް މިންވަރެއްގެ ހެކި ހުށަހެޅިފައިވެއެވެ. އަދި މީނާއަކީ ކުށުގެ ރެކޯޑް އޮންނަ މީހެއްކަންވެސް ވަނީ ފާހަގަކޮށްފައެވެ.
ކޯޓުގެ ބަންދު މަޖިލީހުގައި މި މީހާގެ އަމަލުތައް ހުރިގޮތުން، މަޖިލީހުގެ ޙުރުމަތް ކަނޑައި، ޝަރީއަތުގެ ނިޒާމު ގެއްލުވާލާފައިވާކަމަށް ކޯޓު އަމުރުގައި ބަޔާންކޮށްފައިވެއެވެ. އަދި އޭނާގެ މައްޗަށް ކުރެވޭ ތުހުމަތާ ގުޅިގެން އެއްވެސް އެއްޗެއް ބުނެފައިނުވާކަންވެސް ކޯޓުން ވަނީ ފާހަގަކޮށްފައެވެ.
މި މައްސަލައާ ގުޅިގެން، އޭނާގެ ނަފްސާނީ ޙާލަތު ބެލުމަށް ކޯޓުން ވަނީ ފުލުހުންނަށް އަންގާފައެވެ. މި މައްސަލައިގެ ތަޙްޤީޤު މިހާރު ދަނީ ކުރިއަށެވެ.
