ޖިންސީ ފުރައްސާރައެއްގެ މައްސަލައިގައި ޕްރޮސެކިއުޓާ ޖެނެރަލް (ޕީޖީ) އޮފީހުގެ ދެ ޕްރޮސެކިއުޓަރަކު ސަސްޕެންޑް ކޮށްފިއެވެ.
ޕީޖީ އޮފީހުން އާންމުކޮށްފައިވާގޮތުން އެ އޮފީހުގެ މުއައްޒަފުންގެ ސުލޫކީ މައްސަލަތައް ބަލައި ފިޔަވަޅު އަޅާނެ ގޮތުގެ ގަވައިދުގެ ދަށުން އެކުލަވާލާފައިވާ މައްސަލަ ބަލާ ކޮމިޓީން ދަނީ 2 ޕްރޮސެކިއުޓަރަކާއި ގުޅުންހުރި މައްސަލައެއް ބަލަމުންނެވެ. އެހެންކަމުން އެ މަސައްކަތްތައް ނިމެންދެން ދެ މީހުން ވެސް ސަސްޕެންޑުކޮށްފައިވާކަމަށް ޕީޖީ އޮފީހުން ވަނީ މައުލޫމާތު ދީފައެވެ.
ޕީޖީ އޮފީހުން ބަލަމުންދަނީ ޖިންސީ ފުރައްސާރަކުރުމާއި އޮފީހުން ގަބޫލުކޮށް ހިފަހައްޓަމުންދާ އަހްލާގީ މިންގަނޑާއި ހިލާފުވުމުގެ މައްސަލައެއްކަމަށް ބުނެފައިވެއެވެ. އަދި މި މައްސަލައިގައި ފުލުހުންގެ ހިދުމަތުން ބަލަންޖެހޭ ކަންކަން ހުރުމާއިއެކު އެ މުއައްސަސާއިން ވެސް ތަހުގީގުތައް ކުރިއަށް ގެންދާކަން ހިއްސާކޮށްފައިވެއެވެ.
