ގްލޯބަލް ގަވަރމަންޓް ސަމިޓްގައި މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާއި ބެހޭ ވަޒީރު، ޑރ. ޢަލީ ހައިދަރު ވަނީ ޚިތާބު ދެއްވަވައިފައެވެ.
ހަޔަރ އެޑިއުކޭޝަން މިނިސްޓްރީން މައުލޫމާތު ދޭ ގޮތުގައި މި ސަމިޓަކީ ”ގްލޯބަލް ގަވަރމަންޓް ސަމިޓް: އަ ސްޓެޕް ޓުވަރޑްސް ސޯޝަލް އިނޮވޭޝަން“ ގެ ނަމުގައި ލަކްސްއެމްބާރގްގައި ކުރިއަށްދިޔަ ސަމިޓެކެވެ.
މި ޚިތާބުގައި އެމަނިކުފާނު ވަނީ ދިވެހިރާއްޖޭގެ ފަރާތުން އިޖުތިމާޢީ އުފެއްދުންތެރިކަން އިތުރުކުރުމަށް ކުރަމުންދާ މަސައްކަތްތަކުގެ މައްޗަށް އަލިއަޅުވާލައްވައިފައެވެ.
މީގެ އިތުރުން، މި މަސައްކަތްތައް ކާމިޔާބުކަމާއިއެކު ފުރިހަމަކުރުމުގައި، ބައިނަލްއަޤްވާމީ އެކިއެކި މުއައްސަސާތަކާއި ޖަމްޢިއްޔާތަކުގެ އެހީތެރިކަމާއި އެއްބާރުލުމުގެ މުހިންމުކަން އެމަނިކުފާނު ވަނީ ޚާއްޞަ ގޮތެއްގައި ފާހަގަކުރައްވާފައެވެ.
ލަކްސްއެމްބަރގްގައި ކުރިއަށްދިޔަ ދެ ދުވަހުގެ މި ސަމިޓަކީ ބައިނަލްއަޤްވާމީ ފެންވަރުގައި އުފެއްދުންތެރިކަން އިތުރުކުރުމުގެ މަޤްސަދުގައި ބޭއްވުނު ސަމިޓެކެވެ. އެގޮތުން، މި ސަމިޓްގައި، ޔޫއެންގެ އޭޖެންސީތަކާއި، އެންޖީއޯތަކުގެ އިތުރުން ޖުމްލަ 65 ޤައުމެއްގެ ސަރުކާރަށް ނިސްބަތްވާ ބޭފުޅުން ވަނީ ބައިވެރިވެވަޑައިގަންނަވައިފައެވެ.
