ހުވާވޭ ކުންފުނީގެ އިސް ވަފުދަކާއެކު މިނިސްޓަރ އޮފް ޓޫރިޒަމް އެންޑް އެންވަޔަރަންމަންޓް، އޮނަރަބަލް ޠާރިޤު އިބްރާހީމް ބައްދަލު ކުރައްކުރައްވައިފިއެވެ.
މި ބައްދަލުވުމުގައި ދިވެހިރާއްޖޭގެ ތިމާވެށި ރައްކާތެރިކުރުމާއި، އިއާދަކުރަނިވި ހަކަތައިގެ ލަނޑުދަނޑިތައް ހާސިލުކުރުމަށް ޓަކައި ދެފަރާތުން ގުޅިގެން މަސައްކަތްކުރުމުގެ ފުރުސަތުތަކާ ބެހޭގޮތުން މަޝްވަރާކުރެވުނެވެ.
މިނިސްޓަރ ޠާރިޤު އިބްރާހީމް ވިދާޅުވީ، އަމާޒަކީ އެންމެ ޒަމާނީ ޓެކްނޮލޮޖީ ބޭނުންކޮށްގެން ރާއްޖޭގެ އިއާދަކުރަނިވި ހަކަތައިގެ ލަނޑުދަނޑިތައް ހާސިލުކުރުންކަމަށެވެ. މީގެ އިތުރުން، ރައްކާތެރިކުރެވިފައިވާ ސަރަޙައްދުތަކުގައި ތިމާވެށި ހިމާޔަތްކުރުމަށް އައު ގޮތްތައް ތަޢާރަފުކުރުމާއި، ފަތުރުވެރިކަމާއި މެހެމާންދާރީ ދާއިރާގެ ޚިދުމަތްތަކުގެ ފެންވަރު މަތިކުރުމަށް މަސައްކަތްކުރާނެކަމަށް މިނިސްޓަރު ވިދާޅުވިއެވެ.
ހުވާވޭ ކުންފުނީގެ ވަފުދުގެ ފަރާތުން ވިދާޅުވީ، ދިވެހިރާއްޖޭގެ ތަރައްޤީގެ މަޝްރޫޢުތަކުގައި އެ ކުންފުނީގެ އެންމެ ފަހުގެ ޓެކްނޮލޮޖީ ބޭނުންކޮށްގެން އެހީތެރިވުމަށް ތައްޔާރަށް ތިބިކަމަށެވެ. އަދި ޚާއްޞަކޮށް ތިމާވެށި ރައްކާތެރިކުރުމާއި، އިއާދަކުރަނިވި ހަކަތަ އުފެއްދުމުގެ ދާއިރާގައި އެ ކުންފުނީގެ ތަޖުރިބާ ހިއްސާކުރުމަށް ޝައުޤުވެރިކަން ފާޅުކުރިއެވެ.
މި ބައްދަލުވުމުގައި ދެފަރާތުން އެއްބަސްވެފައިވަނީ، ކުރިއަށް އޮތް ތަނުގައި އިތުރަށް މަޝްވަރާކޮށް، ވަކި މަޝްރޫޢުތަކެއްގެ މައްޗަށް އެއްބަސްވުންތަކެއް އެކުލަވާލުމަށެވެ. މިކަމުން ދިވެހިރާއްޖޭގެ ތިމާވެށި ރައްކާތެރިކުރުމާއި، އިއާދަކުރަނިވި ހަކަތައިގެ ލަނޑުދަނޑިތައް ހާސިލުކުރުމަށް އިތުރު ބާރެއް ލިބިގެންދާނެ ކަމަށް ބެލެވެއެވެ.
