މޯލްޑިވްސް ޕޯޓްސް ލިމިޓެޑް (އެމްޕީއެލް) އިން އައްޑޫ ސިޓީގެ ހިތަދޫ ޕޯޓުގެ ނީލަންތަކުގައި ބައިވެރިވެވޭނެ ގޮތް ހަމަޖައްސައިފި އެވެ.
އެމްޕީއެލްއިން އޯކްޝަން ޕޯޓަލުން މިހާރު ހިތަދޫ ޕޯޓުގެ ނީލަންތައް ބެލުމާއި އޭގައި ބައިވެރިވުމުގެ ފުރުސަތު ލިބޭނެ އެވެ. ހިތަދޫ ޕޯޓުގެ ނީލަންތަކުގައި އާންމުކޮށް ވިއްކަނީ އެކިބާވަތުގެ އުޅަނދުފަހަރެވެ.
މީޑިއާތަކަށް ނެރުނު ބަޔާނެއްގައި މިއަދު އެމްޕީއެލް ބުނީ، އޯކްޝަން ޕޯޓަލްގައި ކުރިން ރަޖިސްޓަރީ ވެފައިވާ ފަރާތްތަކަށް އިތުރު އެއްވެސް ފީއެއް ނުވަތަ ރަޖިސްޓްރޭޝަނެއް ނެތި މި ހިދުމަތް ލިބޭނެ ކަމަށެވެ. މީގެ އިތުރުން، އެއް ވަގުތެއްގައި އެކި ނީލަންތަކުގައި ބައިވެރިވުމުގެ ފުރުސަތުވެސް ކަސްޓަމަރުންނަށް ލިބިގެންދާނެކަމަށް ވެސް ބުންޏެވެ.
ކުންފުނިން އިތުރަށް ބުނި ގޮތުގައި ކުރިޔަށް އޮތް ތަނުގައި، ކުޅުދުއްފުށި ޕޯޓުގެ ނީލަމުގެ ހިދުމަތްތައް ވެސް އޯކްޝަން ޕޯޓަލް މެދުވެރިކޮށް ފޯރުކޮށްދިނުމަށް ދަނީ މަސައްކަތް ކުރަމުންނެވެ.
އެމްޕީއެލްގެ އޯކްޝަން ޕޯޓަލް ތައާރަފުކޮށްފައި ވަނީ 2022 ވަނަ އަހަރު އެވެ.
