ދިވެހި ފުލުހުންގެ ޚިދުމަތުގެ ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓް (އެންސީޕީއެލްއީ) އާއި މޯލްޑިވްސް ޒަކާތު ހައުސް ގުޅިގެން ތާޒްޑޭ ފޯރަމްގެ ހަތަރުވަނަ ބައްދަލުވުން އިސްލާމިކް ސެންޓަރުގެ ކޮންވެންޝަން ހޯލުގައި ބާއްވައިފިއެވެ. މި ފޯރަމްގައި 177 މުވައްޒަފުން ބައިވެރިވެފައިވެއެވެ.
ތާޒްޑޭ ފޯރަމަކީ ދިވެހި ފުލުހުންގެ ޚިދުމަތުގައި ވަޒީފާ އަދާކުރާ މުވައްޒަފުންނަކީ އިލްމީ ނަޒަރުން ކަންކަމާމެދު ވިސްނައި، ދިރާސާއާއި ތަޖުރިބާގެ އަލީގައި ނިންމުންތައް ނިންމާ ސަގާފަތެއް ގެންގުޅޭ ބަޔަކަށް ހެދުމުގެ ބޭނުމުގައި ތަފާތު އިލްމީ މައުލޫތަކަށް މައުލޫމާތު ދިނުމަށް އާންމުކޮށް ބާއްވާ ފޯރަމެކެވެ.
އިއްޔެ ބޭއްވި ފޯރަމް ފެށުނީ އެސިސްޓެންޓް ޑިރެކްޓަރ ރަނާ ވަޙީދު، ފޯރަމް ތައާރަފުކުރައްވައި ދެއްކެވި ވާހަކަފުޅުންނެވެ. އަދި މަރުހަބާ ދެންނެވުމުގެ ގޮތުން ވާހަކަފުޅު ދެއްކެވީ ޒަކާތު ހައުސްގެ އެކްޓިންގ ޑެޕިއުޓީ ޑިރެކްޓަރ ޖެނެރަލް ޝައިޚް މޫސާ މުޢިއްޒުއެވެ.
މި ފޯރަމަކީ އިސްލާމްދީނުގެ ފަސް ރުކުނުގެ ތެރެއިން އެއް ރުކުން ކަމުގައިވާ ޒަކާތާ ބެހޭގޮތުން ފުލުހުންގެ ހޭލުންތެރިކަން އިތުރުކުރުމަށް ކުރިއަށް ގެންދިޔަ ފޯރަމެކެވެ. އެގޮތުން، މުދާ ޠާހިރުކުރުމާއި، މުޖުތަމައުގެ ފަގީރުންނާއި މުއްސަނދިންގެ ދެމެދުގައިވާ ތަފާތު ކުޑަކުރުމާއި، މުޖުތަމައުގެ ލާބައަށް މަސައްކަތްކުރުމުގެ މުހިންމުކަމާ ގުޅޭގޮތުން މި ފޯރަމްގައި މައުލޫމާތު ދީފައިވެއެވެ. އަދި މުދަލުގެ ޒަކާތަކީ ކޮބައިކަމާއި އޭގެ މުހިންމުކަން، މުދަލުގެ ޒަކާތް ނެގުމުގައި އަމަލުކުރާނެ ގޮތް އަދި ދިވެހިރާއްޖޭގައި ޒަކާތް ދެއްކުމަށް ހަމަޖެހިފައިވާ ނިޒާމާ ގުޅޭ ތަފްސީލީ މައުލޫމަތު ހިއްސާކޮށްފައިވެއެވެ.
މި ފޯރަމްގައި މައުލޫމާތު ދެއްވީ ޒަކާތު ހައުސްގެ ޕޮލިޓިކަލް ޑިރެކްޓަރ ޝައިޚް މުޙައްމަދު ނައުޝީރު އާއި ފަންޑު މެނޭޖަރ އަބްދުﷲ ޢަލީއެވެ. މި ބޭފުޅުން، ޒަކާތު ހައުސްގެ މަސައްކަތްތަކާއި، ޒަކާތް އެންމެ ބޭނުންވާ ފަރާތްތަކަށް ފޯރުކޮށްދިނުމަށް ކުރެވޭ މަސައްކަތްތަކާ ބެހޭ މައުލޫމާތުވެސް ދެއްވިއެވެ.
ކުރިއަށް އޮތްތަނުގައި ދިވެހި ފުލުހުންގެ ޚިދުމަތާއި ޒަކާތު ހައުސް ގުޅިގެން އިތުރު ތަމްރީނު ޕްރޮގްރާމްތަކެއް ހިންގުމަށާއި، ކޮންމެ އަހަރަކު ހާއްސަ ލެކްޗަރ ސީރީޒެއް ބޭއްވުމަށް ވަނީ ރޭވިފައެވެ. މިގޮތުން، ފުލުހުންގެ މެދުގައި އިސްލާމީ މާލީ ޒިންމާތަކާ ބެހޭ ހޭލުންތެރިކަން އިތުރުކުރުމަށް މަސައްކަތް ކުރެވޭނެއެވެ.
