ހުޅުމާލޭގައި ދުއްވާފައި ދިޔަ ވޭނެއް ބަލައި ފާސްކޮށް ބަނގުރާ ފުޅިތަކަކާއިއެކު 2 ބިދޭސީއަކު ފުލުހުން ހައްޔަރުކޮށްފިއެވެ.
މިކަމާއި ގުޅިގެން މައުލޫމާތު ދެމުން ފުލުހުން ބުނެފައިވަނީ، ހުޅުމާލޭގެ މިދިލި މަގުން ދަތުރުކުރަމުންދިޔަ ވޭން (AB1B C4278) ހުއްޓުވައި، ބަލާފާސްކުރުމުގެ ތެރެއިން 500 އެމްލްއެގެ 40 ފުޅި ފެނުނުކަމަށެވެ.
އެގޮތުން، އެ ފުޅިތަކަކީ ބަނގުރާ އެކުލެވޭ ފުޅިތަކެއް ކަމަށް ތުހުމަތުކުރެވޭކަމަށް ފުލުުހުން ބުނިއެވެ.
މި މައްސަލާއަގައި ހައްޔަރުކުރެވުނު ދެ ބިދޭސީން ނިސްބަތްވާ ގައުމަކީ އިންޑިއާ އެވެ. އެއީ 47 އަހަރުގެ ރާޖަގޯޕާލް ސެލްވަގަނަޕަތީ އަދި 27 އަހަރުގެ ތަލަޕަތީ ޕުގަޒެންދީ އެވެ.
ފުލުހުން ބުނިގޮތުގައި، މި މައްސަލަ އިތުރަށް ތަހުގީގުކުރުމަށްޓަކައި ބަނގުރާ އުފުލާކަމަށް ތުހުމަތުކުރެވޭ ވޭން ވަނީ ޓޯކޮށްފައެވެ. އަދި މި މައްސަލަ އިތުރަށް ތަހުގީގު ކުރަމުން ދާކަމަށް ވެސް ފުލުހުން ބުނިއެވެ.
މަސްތުވާތަކެތީގެ މައްސަލައަކީ ދިވެހިރާއްޖެއަށް ކުރިމަތިވެފައިވާ މައްސަލަަތަކުގެ ތެރޭގައި ހިމެނޭ މައްސަލައެކެވެ. އެގޮތުން، މި މައްސަލަތައް މަދުކުރުމަށްޓަކައި ފުލުހުންގެ ޑްރަގު އެންފޯސްމެންޓް ޑިޕާޓްމެންޓާއި ޖާސޫސީ ޑީޕާޓްމެންޓުތަކުން ދަނީ މަސައްކަތްކުރަމުންނެވެ.
