ރައީސް ޑރ. މުހައްމަދު މުއިއްޒުގެ ޑިޖިޓަލައިޒިންގ ސިޔާސަތު ތަންފީޒުކުރުމުގެ އަމަލީ މަސައްކަތް ބާރު ސްޕީޑުގައި ފެށިގެން ދާނެ ކަމަށް މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ އަލީ އިހުސާން ވިދާޅުވެއްޖެއެވެ.
”މޯލްޑިވްސް 2.0 ސަމިޓް“ ގެ ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ އިހުސާން ވިދާޅުވީ، ދިވެހިރާއްޖެ އިންގިލާބީ ގޮތުން ޑިޖިޓަލައިޒް ކުރުމަށް އަދި އިންގިލާބީ ބަދަލުތަކެއް ޑިޖިޓަލައިޒޭޝަންގެ ދާއިރާއިން ރާއްޖެއަށް ގެނައުމަށް ރައީސުލްޖުމްހޫރިއްޔާ ވަނީ ސިޔާސަތެއް ކަނޑައަޅުއްވާފައި ކަމަށެވެ.
މިނިސްޓަރ އިހުސާން ފާހަގަކުރެއްވި ގޮތުގައި މިއަދު ތަންފީޒުކުރަން ފެށިގެން މިދަނީ ރައީސްގެ ހާއްސަ އިސްނެންގެވުމާއެކު އެކުލަވާލެވުނު ސިޔާސަތެކެވެ. މި ސިޔާސަތަކީ ދުނިޔޭގެ މި ދާއިރާގައި ކާމިޔާބު ހާސިލްކޮށްފައިވާ ގައުމުތަކުގެ ފަންނީ ލަފާގެ މަތިން، ދިވެހިރާއްޖޭގައި ތިބި ފުންނާބު އުސް މާހިރުންގެ މަސައްކަތާއެކު އެކުލަވާލެވުނު ސިޔާސަތެކެވެ.
”މާތްﷲގެ އިރާދަފުޅާއިއެކު ރައީސް ޑރ. މުހައްމަދު މުއިއްޒުގެ ޑިޖިޓަލައިޒިންގ ސިޔާސަތު ތަންފީޒުކުރުމުގެ އަމަލީ މަސައްކަތް ބާރު ސްޕީޑުގައި ފެށިގެން ދާނެ،“ މިނިސްޓަރ އިހުސާން ވިދާޅުވިއެވެ.
މުޅި މަސައްކަތް ކުރިއަށް ގެންދާނީ ރައީސުލްޖުމްހޫރިއްޔާ ޗެއަރ ކުރައްވާ، މި ދާއިރާގެ އެކްސްޕާޓުން ހިމެނޭ ރާއްޖޭގެ ޑިޖިޓަލް ޓްރާންސްފޮމޭޝަން ކައުންސިލްގެ ބެއްލެވުމުގެ ދަށުން ކަމަށް ވެސް އެމަނިކުފާނު ވިދާޅުވިއެވެ.
މި ސަމިޓުގެ ދަށުން ރާއްޖެ ޑިޖިޓަލީ ޓްރާންސްފޯމް ވެގެންދާނެ ގޮތް ފުޅާ ދާއިރާއެއްގައި ބަހުސް ކުރެވި، ހުރިހާ އިދާރާތަކުން އެއްބަސްވާ ކަންކަން ނިމިގެންދާނެ ކަމަށް މިނިސްޓަރ އިހުސާން ވިދާޅުވިއެވެ. އަދި މިނިސްޓަރ އިހުސާން ވަނީ އެސްޓޯނިއާގެ ރައީސް އޮފީހުގެ ބޭފުޅުންނާއި ރާއްޖޭގެ މި ޑިޖިޓަލް ދަތުރުގައި އެހީތެރިވެ ދެއްވި އީ-ގަވަރނެންސް އެކަޑަމީގެ ކޯފައުންޑަރ އަދި ހުރިހާ ފަންނީ ބޭފުޅުންނަށް ޝުކުރު އަދާކުރައްވާފައެވެ.
